- 1
- Na konei, i te mea kei a matou nei tenei mahi minita, a, ka tohungia nei matou, kahore matou e ngakaukore.
- 2
- Engari whakakahoretia ana e matou nga mea huna o te whakama, kore ake to matou haere i runga i te tinihanga, kahore hoki he maminga ki te kupu a te Atua; engari ka waiho i runga i te whakapuakanga o te pono ta matou whakaatu i ta matou pai ki nga hinengaro katoa o nga tāngata i te aroaro o te Atua.
- 3
- Na, ki te mea he mea hipoki ta matou rongo pai, he mea hipoki ki te hunga e whakangaromia ana:
- 4
- I roto nei i a ratou te atua o tenei ao e whakamatapo ana i nga whakaaro o te hunga whakapono kore, kei whitingia ratou e te māramatanga o te rongo pai o to te Karaiti kororia, ko ia nei te ahua o te Atua.
- 5
- He teka hoki ko matou te kauwhautia nei e matou, engari ko Karaiti Ihu hei Ariki; a ko matou nei hei pononga ma koutou, he whakaaro hoki ki a Ihu.
- 6
- Ko te Atua hoki nāna nei i ki te māramatanga kia whiti i roto i te pouri, kua whiti ia ki roto ki o matou ngakau, hei homai i te māramatanga, ara i te matauranga o te kororia o te Atua i te mata o Ihu Karaiti.
- 7
- Na, tenei taonga o matou kei roto i nga oko oneone, kia kiia ai te kaha e hira tonu nei no te Atua, ehara hoki i a matou.
- 8
- E tukinotia ana matou i nga taha katoa, heoi kahore e pau te whakaaro; e raruraru ana, heoi kahore e taea te raru.
- 9
- E whakatoia ana matou, heoi kahore i whakarerea; e turakina ana ki raro, heoi kahore i whakangaromia;
- 10
- E mau tonu ana te matenga o te Ariki o Ihu ki o matou tinana, i a matou e haereere nei; kia mārama ai to Ihu ora i roto i o matou tinana.
- 11
- Ko matou hoki e ora nei e tukua tonutia ana ki te mate mo te whakaaro ki a Ihu, kia mārama ai hoki to Ihu ora, i roto i o matou kikokiko matemate.
- 12
- Na, ko te mate te mahi ana i roto i a matou, ko te oranga ia i roto i a koutou.
- 13
- Na, kei a matou nei taua wairua ra ano o te whakapono, tera hoki i tuhituhia, I whakapono ahau, koia ahau i korero ai; whakapono ana ano matou, koia hoki matou ka korero nei;
- 14
- E mātau ana hoki matou, tera te kai whakaara o te Ariki o Ihu e whakaara ano hoki i a matou, he mea na Ihu, e whakatu ngatahi ano hoki i a matou i a koutou.
- 15
- Hei pai hoki ma koutou nga mea katoa, kia hira rawa ai te kororia o te Atua, i te aroha noa ka nui nei, i te tokomaha ano hoki e whakawhetai ana.
- 16
- Koia hoki tatou tē ngakaukore ai; heoi ahakoa haere iho tatou ki te pirau, ara, to waho tangata, e whakahoutia ana ano to roto i tenei ra i tenei ra.
- 17
- Ko to tatou mamae hoki, he mea māmā, he mea no naianei kau nei, hei whakawhiwhi i a tatou ki te kororia, tona nui whakaharahara o te taimaha, he mea mau tonu;
- 18
- I a tatou kahore nei e titiro atu ki nga mea e kitea ana, engari ki nga mea kahore e kitea: he mea no naianei hoki nga mea e kitea ana; he mea mau tonu ia nga mea e kore e kitea.
Address: 
Phone: 
Email: