- 1
- Na, tenei matou, ona hoa mahi, te whakahau nei i a koutou, kia kaua e hua-kore te rironga o te aroha noa o te Atua i a koutou.
- 2
- (E mea ana hoki ia, No te wa manakohanga atu i whakarongo ai ahau ki a koe, a awhinatia ana koe e ahau i te ra o te whakaoranga: nana, tenei te wa manakohanga mai; nana, tenei te ra o te whakaoranga.)
- 3
- E kore ano e hoatu e matou tetahi take whakahe, ahakoa he aha he aha, kei whakahengia te mahi minita:
- 4
- Engari i nga mea katoa e whakakite ana i a matou he minita matou na te Atua, i runga i te hua o te manawanui, i nga tukinotanga, i nga aitua, i nga rarunga,
- 5
- I nga whiunga, i nga whare herehere, i nga ngangaretanga, i nga mauiuitanga, i nga mataaratanga, i nga nohoanga pukutanga;
- 6
- I runga i te kino kore, i te matauranga, i te manawanui, i te ngakau ngawari, i te Wairua Tapu, i te aroha tinihanga-kore,
- 7
- I runga i te kupu o te pono, i te kaha o te Atua, me nga mea whawhai ano o te tika ki matau ki maui,
- 8
- I runga i te kororia, i te honore kore, i te kupu kino, i te kupu pai; me te mea he hunga tinihanga, a he hunga pono ano;
- 9
- Me te mea kahore e mohiotia, a e mohiotia nuitia ana; me te mea ka mate, heoi tenei ano te ora nei; me te mea e pakia ana, heoi kahore e whakamatea;
- 10
- Me te mea e pouri ana, heoi e hari tonu ana; me te mea e rawakore ana, heoi e mea ana i te tokomaha kia whai taonga; me te mea kahore a matou, a kei a matou nei nga mea katoa.
- 11
- Tuwhera tonu o matou mangai ki a koutou, e nga Koriniti, kua nui to matou ngakau.
- 12
- Ehara i te mea no matou te kuiti i a koutou, engari no o koutou ngakau te kuiti.
- 13
- Na, hei utu e rite ana, (he kupu tenei naku ki aku tamariki,) kia whakanuia ano hoki koutou.
- 14
- Kei iokatia ketia koutou ki te hunga whakapono kore: no hea hoki te urunga tahitanga o te tika rawa ko te tutū? no hea hoki te huihuinga tahitanga o te mārama o te pouri?
- 15
- Ko ehea korero a te Karaiti i huihuia ki a Periara? a na tehea wahi i huānga ai te tangata whakapono ki te tangata whakapono kore?
- 16
- Kei hea he tatanga mo te whare o te Atua ki nga whakapakoko? ko koutou hoki te whare o te Atua ora; ko ta te Atua tena i mea ai, Ka noho ahau i roto i a ratou, ka haereere ahau i roto i a ratou; a ko ahau hei Atua mo ratou, ko ratou hoki hei iwi moku.
- 17
- Mo konei ra puta mai koutou i roto i a ratou, kia motu ke, e ai ta te Ariki, kaua hoki e pa atu ki te mea poke; a ka riro mai koutou i a au;
- 18
- Ko ahau ano hoki hei Matua mo koutou, a ko koutou hei tamariki hei tamahine ki a au, e ai ta te Ariki Kaha rawa.
Address: 
Phone: 
Email: