- 1
- I aua ra ka mate a Hetekia, me kahore ka marere. Na, ko te haerenga mai o Ihaia poropiti tama a Amoho ki a ia, ka mea ki a ia, Ko te kupu tenei a Ihowa, Whakahaua iho tou whare, no te mea ka mate koe, e kore e ora.
- 2
- Te tino tahuritanga atu o tona mata ki te pakitara, ka inoi ki a Ihowa, ka mea,
- 3
- Tena ra, e Ihowa, kia mahara ra ki aku haereerenga i tou aroaro i runga i te pono, i te ngakau tapatahi, ki taku meatanga i te pai ki tau titiro iho. Na, tangi ana a Hetekia; nui atu te tangi.
- 4
- Heoi kahore ano a Ihaia kia puta noa ki to waenganui marae, kua puta mai te kupu a Ihowa ki a ia, ka mea,
- 5
- Hoki atu, mea atu ki te rangatira o toku iwi, ki a Hetekia, Ko te kupu tenei a Ihowa Atua o Rawiri o tou tupuna, Kua whakarangona tau inoi e ahau, kua kitea e ahau ou roimata: nana, me whakaora koe e ahau. I te toru o nga ra ka haere koe ki runga ki te whare o Ihowa.
- 6
- Ka tapiritia ano e ahau ou ra ki nga tau kotahi tekau ma rima, ka whakaorangia koe, me tenei pa, e ahau, i te ringa o te kingi o Ahiria; ka tiakina ano hoki e ahau tenei pa, he whakaaro ki a au, ki taku tangata ano hoki ki a Rawiri.
- 7
- I ki ano hoki a Ihaia, Tikina he papa piki. Na, tikina ana e ratou, whakapakia atu ana ki te whewhe, na kua ora.
- 8
- I mea ano a Hetekia ki a Ihaia, He aha te tohu moku ka whakaorangia e Ihowa? moku ka haere i te toru o nga ra ki te whare o Ihowa?
- 9
- Ano ra ko Ihaia, Ko te tohu tenei a Ihowa ki a koe mo te kupu i korero ai ia ka oti i a Ihowa: kia tekau ranei nga nekehanga e neke atu ai te atarangi; kia tekau ranei nga nekehanga e hoki ai?
- 10
- Ano ra ko Hetekia, He mea noa iho kia tekau nga nekehanga e neke atu ai te atarangi; erangi kia tekau nga nekehanga e hoki ai te atarangi ki muri.
- 11
- Katahi a Ihaia poropiti ka karanga atu ki a Ihowa, a, whakahokia mai ana e ia te atarangi, tekau nga nekehanga o nga nekehanga i heke iho ai i te whakaatu haora a Ahata.
- 12
- I taua wa ka tukua mai he pukapuka me tetahi hakari ki a Hetekia e Peroraka-pararana, tama a Pararana kingi o Papurona; no te mea i rongo ia, kei te mate a Hetekia.
- 13
- A, whakarongo tonu mai a Hetekia ki a ratou, whakakitea ana e ia ki a ratou te whare katoa o ana mea papai, te hiriwa, te koura, nga kinaki kakara, te hinu pai, me te whare katoa o ana mea mo te whawhai, me nga mea katoa i rokohanga ki roto ki ona taonga: kahore tetahi mea o tona whare, o tona kingitanga katoa, i kore te whakakitea atu e Hetekia ki a ratou.
- 14
- Katahi a Ihaia poropiti ka haere mai ki a Kingi Hetekia, ka mea ki a ia, I pehea mai enei tangata? i haere mai hoki ratou i hea ki a koe? Ano ra ko Hetekia, I haere mai ratou i te whenua hoi, i Papurona.
- 15
- Ano ra ko tera, Ko ehea mea i kitea e ratou i roto i tou whare? Ka mea atu a Hetekia, Kua kitea e ratou nga mea katoa i roto i toku whare. Kahore tetahi mea o oku taonga i kore te whakakitea atu e ahau ki a ratou.
- 16
- Na, ko te meatanga mai a Ihaia ki a Hetekia, Whakarongo mai ki te kupu a Ihowa.
- 17
- Nana, kei te haere mai nga ra e kawea ai ki Papurona nga mea katoa o tou whare, me nga mea kua rongoatia nei e ou mātua taea noatia tenei ra; e kore tetahi mea e mahue, e ai ta Ihowa.
- 18
- Ka tangohia atu ano hoki e ratou etahi o o tamariki e puta mai i roto i a koe, e whanau nei mau, a hei unaka ratou i roto i te whare o te kingi o Papurona.
- 19
- Ano ra ko Hetekia ki a Ihaia, Pai tonu te kupu a Ihowa i korerotia mai na e koe. I mea hoki ia, Ehara oti i te pai ki te mau te rongo, me te pono i oku ra?
- 20
- Na, era atu meatanga a Hetekia, me ana mahi toa katoa, me tana hanganga i te puna, i te awakeri, a, whakaputaina mai ana e ia he wai ki te pa, kihai ianei ena i tuhituhia ki te pukapuka o nga meatanga o nga ra o nga kingi o Hura?
- 21
- Na, kua moe a Hetekia ki ona mātua, a, ko tana tama ko Manahe hei kingi i muri i a ia.
Address: 
Phone: 
Email: