2nd Kings Chapter 21 - Paipera Tapu 1868 | Te Paipera Tapu 1868

2nd Kings Chapter 21 - Paipera Tapu 1868

1
Kotahi tekau ma rua nga tau o Manahe i tona kingitanga ai, a, e rima tekau ma rima nga tau i kingi ai ia ki Hiruharama; te ingoa o tona whaea ko Hepeti-pa.
2
A, he kino tana mahi ki te titiro iho a Ihowa, i rite tonu ki nga mea whakarihariha a nga tauiwi i peia nei e Ihowa i te aroaro o nga tamariki a Iharaira.
3
Hangā ana ano e ia nga wahi tiketike i whakakorea nei e Hetekia e tona pāpā: whakaarahia ake ana e ia nga aata ki a Paara, meatia ana e ia, he ngahere: pera ana ia me ta Ahapa kingi o Iharaira i mea ai; koropiko ana ki te ope katoa o te rangi, mahi ana ki a ratou.
4
Hangā ana ano e ia etahi aata ki te whare o Ihowa, ki ta Ihowa i ki ra ko Hiruharama hei waihotanga mo toku ingoa.
5
Hangā ana ano e ia etahi aata mo te ope katoa o te rangi ki nga marae e rua o te whare o Ihowa.
6
Meatia ana e ia tana tamaiti kia tika na waenganui i te ahi, rapua ana e ia he tohu i nga kapua, i nga nakahi, i whai ano ia ki nga atua maori, ki nga mata maori: nui atu tana kino i mahi ai ki te titiro iho a Ihowa, hei whakapataritari mona.
7
I whakaturia ano e ia he whakapakoko no te ngahere i meatia nei e ia ki te whare i ki ra a Ihowa ki a Rawiri raua ko tana tama ko Horomona, Hei tenei whare hei Hiruharama i whiriwhiria nei e ahau i roto i nga iwi katoa o Iharaira ahau waiho ai i toku ingoa, a, ake ake ake.
8
Heoi ano hoki aku whakanekehanga i nga waewae o Iharaira i te whenua, i hoatu e ahau ki o ratou mātua: kia mau raia ratou ki te mahi i nga mea katoa i whakahaua e ahau ki a ratou, kia rite ano hoki ki te ture katoa i whakahaua iho e Mohi e taku pononga ki a ratou.
9
Heoi kihai i whakarongona mai e ratou, na Manahe hoki ratou i whakapeau ke kia nui atu ta ratou mahi i te kino i ta nga iwi i hunā nei e Ihowa i te aroaro o nga tamariki a Iharaira.
10
I korero ano hoki a Ihowa, he mea mea mai na ana pononga, na nga poropiti, i mea,
11
Kua mahi nei a Manahe kingi o Hura i enei mea whakarihariha, kino atu tana i nga mea katoa i mea ai nga Amori i mua i a ia; kua mea ano hoki ia i a Hura kia hara ki ana whakapakoko.
12
Mo reira ko te kupu tenei a Ihowa Atua o Iharaira, Tenei au te kawe atu nei i te kino ki Hiruharama raua ko Hura, e paorooro ai nga taringa e rua o nga tangata e rangona ai.
13
Ka whakamarokia ano hoki e ahau te aho o Hamaria ki runga ki Hiruharama, me te parameti ano o te whare o Ahapa; ka horoia ano hoki a Hiruharama e ahau, ka peratia me ta te tangata horoi i te rihi; horoia ana e ia, hurihia ana ko tua.
14
Ka mahue ano hoki i a au te toenga o taku wahi tupu, ka hoatu ki nga ringa o o ratou hoa riri, a, hei taonga pārau ratou, hei mea parakete ma o ratou hoa riri katoa.
15
Mo ratou i mahi i te kino ki taku titiro iho, i whakapataritari ano hoki i a au no te ra iho ano i puta mai ai o ratou mātua i Ihipa, a taea noatia tenei ra.
16
I whakahekea ano hoki e Manahe he toto hara-kore, tona nui na, a kapi noa Hiruharama, tenei wahi, tera wahi; tapiritia ana tenei e ia ki tona hara i mea ai ia i a Hura kia hara, kia mea i te kino ki te titro a Ihowa,
17
Na, era atu meatanga a Manahe, me ana mahi katoa, me tona hara i hara ai ia, kihai ianei ena i tuhituhia ki te pukapuka o nga meatanga o nga ra o nga kingi o Hura?
18
Na, kua moe a Manahe ki ona mātua, a tanumia ana ki te kāri o tona whare, ki te kari a Uha, a, ko tana tama ko Amono te kingi i muri i a ia.
19
E rua tekau ma rua nga tau o Amono i tona kingitanga ai, a, e rua nga tau i kingi ai ia ki Hiruharama. Te ingoa o tona whaea, ko Mehuremete, he tamahine na Harutu, no Iotopa.
20
A, he kino tana mahi ki te titiro iho a Ihowa, rite tonu tana mahi ki ta tona pāpā ki ta Manahe.
21
I haere hoki ia i nga ara katoa i haere ai tona pāpā, i mahi ki nga whakapakoko, ki ā tona pāpā i mahi atu ai; koropiko ana ia ki aua mea.
22
Whakarerea ake e ia a Ihowa te Atua o ona mātua, kihai i haere i te ara o Ihowa.
23
Na, ka whakatupu nga tangata a Amono i te he mona, a, patua iho e ratou te kingi i roto i tona whare.
24
Katahi ka patua e nga tangata o taua whenua nga kai whakatupu katoa i te he mo Kingi Amono. Na, ka meinga e nga tangata o taua whenua Hohia tana tama hei kingi i muri i a ia.
25
Na, era atu meatanga i mea ai a Amono, kahore ianei i tuhituhia ki te pukapuka o nga meatanga o nga ra o nga kingi o Hura?
26
I tanumia ano hoki ia ki tona tanumanga ki te kāri a Uha, a, ko Hohia ko tana tama te kingi i muri i a ia.