- 1
- Kia mātau koe ki tenei, ko a nga ra o te whakamutunga puta mai ai nga wa o te hē.
- 2
- E aroha hoki nga tāngata ki a ratou ano, e aroha ki te moni, e whakapehapeha, e whakakake, e kohukohu, e tutu ki nga mātua, kahore he whakawhetai, kahore he tapu,
- 3
- Kahore he aroha, he hunga takahi kawenata, ngautuara, e kore e pēhi i te ngakau, he hunga nanakia, e kino ana ki nga tāngata pai,
- 4
- He hunga tuku tangata, he hunga hikaka, whakakake, to ratou aroha ki nga mahi takaro nui atu i to ratou ki te Atua;
- 5
- Ko te ahua o te karakia kei a ratou, tona kaha ia whakakahoretia iho: tahuri atu koe i nga tāngata pera.
- 6
- No ratou nei te hunga e tomo nei ki nga whare, a riro pārau ana i a ratou nga wāhine kuare, kua ikeike noa ake nei o ratou hara, he mea arahi na nga hiahia maha,
- 7
- E ako tonu ana, heoi kahore rawa kia tae atu ki te matauranga o te pono.
- 8
- E rite ana ki a Hani raua ko Hamapiri i totohe ki a Mohi, whaihoki ko enei tangata e totohe ana ki te pono: he hunga kua kino ke te hinengaro, he rukenga atu i roto i te whakapono.
- 9
- Heoi e kore ratou e kake haere: ka kitea hoki to ratou kuaretanga e te katoa, ka pera hoki me to raua.
- 10
- Na, kua mau na i a koe taku whakaakoranga, taku whakahaere, taku whakaaro whakatakoto, taku whakapono, taku puhoi ki te riri, taku aroha, taku manawanui,
- 11
- Oku whakatoinga, oku matenga i mate ai ahau i Anatioka, i Ikoniuma, i Raihitara; nga whakatoinga i whakatoia ai ahau: heoi whakaorangia ake ahau e te Ariki i roto i te katoa.
- 12
- A e whakatoia ano te hunga katoa e hiahia ana kia noho i runga i te karakia i roto i a Karaiti Ihu.
- 13
- Na, e kake haere ki te kino nga tāngata kino, me te hunga maminga, e tinihanga ana, e tinihangatia ana.
- 14
- Ko koe ia kia mau ki nga mea i akona ai koe, i whakaaetia ra e koe, e mātau ana hoki koe ki to kai whakaako ki ena mea;
- 15
- A no tou tamarikitanga ake tou mohiotanga ki nga Karaipiture tapu, ko nga mea era e mātau ai koe ki te oranga, i runga i te whakapono ki Karaiti Ihu.
- 16
- No te ha o te Atua nga Karaipiture katoa, a e pai ana hei whakaako, hei hopu i te hē, hei whakatikatika, hei whakaako ki te tika;
- 17
- Kia tino rite ai te tangata a te Atua, rite rawa mo nga mahi pai katoa.
Address: 
Phone: 
Email: