- 1
- I kite ahau i te Ariki e tu ana i runga i te aata. Na ko tana meatanga ake, Patua te korupe, kia oioi ai nga pou; kia maru ano hoki o ratou māhunga, o ratou katoa; maku ano hoki e tukituki nga whakamutunga o ratou ki te hoari: te tangata o ratou e oma ana e kore e puta; te tangata o ratou e puta ana, e kore e mawhiti.
- 2
- Ahakoa keri noa ratou, a tae noa ki te reinga, ka tikina atu ratou e toku ringaringa i reira; ahakoa kake ratou ki te rangi, ka riro iho ano ratou i a au i reira.
- 3
- Ahakoa piri ratou ki te tihi o Karamere, ka rapua ratou e ahau, ka tangohia mai i reira; ahakoa i hunā atu ratou, kei kitea e ahau, ki te takere o te moana, ka whakahaua e ahau te nakahi i reira, a ka ngau ia i a ratou.
- 4
- Ahakoa haere ratou he pārau i te aroaro o o ratou hoa riri, ka whakahaua e ahau te hoari i reira hei tukituki i a ratou: ka u atu ano hoki oku kanohi ki a ratou mo te kino, kahore hoki he pai.
- 5
- Ko te Ariki hoki ko Ihowa te pa ana ki te whenua, rewa tonu iho, tangi ana nga tangata katoa e noho ana i reira: ka pari katoa ake ano hoki, ano he waipuke; ka paremo ano hoki, me te mea na te waipuke o Ihipa.
- 6
- Ko ia te hanga nei i ana ruma o runga ki te rangi, tu ana i a ia tana ope i runga i te whenua; ko ia te karanga nei ki nga wai o te moana, a ringitia ana e ia ki runga ki te mata o te whenua: ko Ihowa tona ingoa.
- 7
- He teka ianei, ki taku e rite ana koutou ki nga tamariki a nga Etiopiana, e nga tamariki a Iharaira? e ai ta Ihowa. He teka ianei naku a Iharaira i kawe mai i te whenua o Ihipa? nga Pirihitini ano hoki i Kapatoro? nga Hiriana ano hoki i Kiri?
- 8
- Nana, kei runga nga kanohi o te Ariki o Ihowa i te kingitanga hara, ka whakangaromia atu ano hoki e ahau i runga i te mata o te whenua; e kore ia e whakangaromia rawatia e ahau te whare o Hakopa, e ai ta Ihowa.
- 9
- No te mea, tenei ahau te whakahau nei, ka tātaria ano hoki e ahau te whare Iharaira ki roto ki nga iwi katoa, ka peratia me te witi e tātaria ana ki te tātari, e kore ano tetahi pata ririki e taka ki te whenua.
- 10
- Ka mate i te hoari te hunga hara katoa o toku iwi, era e ki ra, E kore tatou e mau, e kore ano e haukotia e te kino.
- 11
- I taua ra ka ara i a au te tapenakara o Rawiri kua hinga nei, ka tutakina ano e ahau ona wahi pakaru, ka ara ano i a au ona wahi i whakahoroa, ka hangā ano e ahau kia rite ki nga rangi o mua:
- 12
- Kia riro ai i a ratou te toenga o Eroma, o nga iwi katoa ano hoki kua oti nei toku ingoa te karanga ki a ratou, e ai ta Ihowa, nana nei tenei mahi.
- 13
- Nana, kei te haere mai nga ra, e ai ta Ihowa, e mau ai te kai kokoti i te kai parau, e mau ai ano hoki te kai whakato i nga purapura i te kai takahi o nga karepe, ka maturuturu ano te waina hou o nga maunga; nga pukepuke katoa ano hoki kuteretere noa iho.
- 14
- Ka whakatahuritia atu ano hoki e ahau te whakaraunga o toku iwi, o Iharaira, a ka hangā e ratou nga pa kua ururuatia, nohoia iho; ka whakatokia ano hoki e ratou nga māra waina, ka inumia ano e ratou te waina o aua māra: ka mahi kāri ano ratou, ka kai ano hoki i nga hua o aua kāri.
- 15
- Ka whakatokia ano ratou e ahau ki runga ki to ratou oneone; e kore ano ratou e unuhia atu i muri ake nei i to ratou oneone i hoatu e ahau ki a ratou, e ai ta Ihowa ta to Atua.
Address: 
Phone: 
Email: