- 1
- Te mea i kitea e Oparia. Ko te kupu tenei a te Ariki a Ihowa mo Eroma, Kua rongo matou i tetahi korero, he mea na Ihowa, kua oti ano hoki tetahi karere te unga atu ki nga tauiwi, Whakatika, kia whakatika atu hoki tatou ki a ia ki te whawhai.
- 2
- Nana, kua oti koe te mea e ahau kia ririki i roto i nga tauiwi: nui atu te whakahawea ki a koe.
- 3
- Kua oti koe te tinihanga e te whakapehapeha o tou ngakau, e koe e noho na i nga kapiti o te kamaka, kei runga na tona nohoanga; e mea ana i roto i tona ngakau, Ko wai hei whakahoki iho i a au ki raro ki te whenua?
- 4
- Ahakoa i rite to kakenga atu ki to te ekara, ahakoa i hangā e koe to kohanga ki roto ki nga whetu, ka whakahokia iho ano koe e ahau i reira, e ai ta Ihowa.
- 5
- Ki te mea kua tae atu nga kai tahae ki a koe, nga kai pahua ranei i te po, (taukiri e, to whakangaromanga!) e kore ranei ratou e tahae, a kia maha ra ano nga mea ma ratou? ki te mea i haere mai nga kai whawhaki karepe ki a koe, e kore ranei etahi karepe e whakatoea e ratou?
- 6
- Taukiri e, te rapunga atu o nga mea a Ehau! te kimihanga atu o ana mea ngaro!
- 7
- Nga tangata katoa o to kawenata, kua riro koe i a ratou ki te rohe: nga tangata i mau nei ta ratou rongo ki a koe, kua tinihanga ratou ki a koe, a taea ana koe e ratou; te hunga i kai i to taro kua takoto i a ratou te he i raro i a koe: kahore he matauranga i a ia.
- 8
- He teka ianei, e ai ta Ihowa, ka whakakahoretia e ahau i taua rangi nga tangata whakaaro nui i roto i Eroma, te matauranga ano hoki o te maunga o Ehau?
- 9
- Ka wehi ano hoki o marohirohi e Temana, he mea e hatepea atu ai nga tangata katoa o te maunga o Ehau, tukituki rawa.
- 10
- Ka taupokina koe e te whakama hei utu mo to mahi tutū ki to teina ki a Hakopa, ka hatepea atu ano hoki koe, a ake ake ake.
- 11
- I te ra i tu ai koe i te ritenga mai, i te ra i whakaraua ai ona rawa e nga tau tangata, a tapoko ana nga tangata iwi ke ki roto ki ona kuwaha, kokiritia ana e ratou nga niu mo Hiruharama, i rite ano koe ki tetahi o ratou.
- 12
- I pai me i kaua koe te titiro i te ra o to teina, i te ra i whaka-tangata-ketia ai ia, me i kaua ano koe te koa ki nga tamariki a Hura, i te ra i whakangaromia ai ratou; me i kaua ano te whakanuia to mangai i te ra o te raru;
- 13
- Me i kaua koe te tapoko atu ki roto ki te kuwaha o toku iwi i te ra o to ratou aitua, me i kaua ano koe te matakitaki atu ki to ratou matenga i te ra o to ratou aitua, me i kaua ano koe te pa atu ki o ratou rawa i te ra o to ratou aitua;
- 14
- Me i kaua ano koe te tu ki te pekanga o te ara ki te hatepe atu i ona morehu; me i kaua ano te tukua atu e koe ona oranga i te ra o te raru.
- 15
- Kua tata hoki te ra o Ihowa ki nga tauiwi katoa; tau i mea ai ka meatia mai ano ki a koe; ka hoki mai to utu ki runga ki to māhunga.
- 16
- Ka rite hoki ki ta koutou inumanga i runga i toku maunga; ka pena ano te inu a nga tauiwi katoa, a ake nei ake nei; ina, ka inu ratou, ka horomia ano e ratou, a me te mea he kore rawa nei ratou.
- 17
- Ka whai whakaoranga ia a Maunga Hiona, ka whai tapu ano hoki, ka riro ano hoki o ratou wahi i te whare o Hakopa.
- 18
- Ka ai ano hoki te whare o Hakopa hei ahi, te whare ano o Hohepa hei mura, te whare ano hoki o Ehau hei kakau witi, ka ngiha ano hoki ratou i roto i a ratou, a pau ake ratou, kahore ano hoki he morehu o te whare o Ehau: na Ihowa nei hoki te kupu.
- 19
- Ka riro ano hoki te maunga o Ehau i te hunga o te tonga; nga Pirihitini ano hoki i te hunga o te mānia; ka riro ano i a ratou nga māra o Eperaima me nga māra ano a Hamaria; ka riro ano hoki a Kireara i a Peniamine.
- 20
- Na, nga whakarau o tenei ope, o nga tamariki a Iharaira, ka riro i a ratou to nga Kanaani, tae noa ki Harepata; na, nga whakarau o Hiruharama, era i Teparara, ka riro i a ratou nga pa o te tonga.
- 21
- Ka tae ake ano hoki nga kai whakaora ki runga ki Maunga Hiona hei whakarite i te whakawa mo te maunga o Ehau; a ka riro i a Ihowa te kingitanga.
Address: 
Phone: 
Email: