Colossians Chapter 1 - Paipera Tapu 1868 | Te Paipera Tapu 1868

Colossians Chapter 1 - Paipera Tapu 1868

1
Na Paora, na te Apotoro a Ihu Karaiti, te Atua hoki i pai ai, na te teina hoki na Timoti,
2
Ki te hunga tapu i Korohe, ki nga teina whakapono hoki i roto i a te Karaiti: Kia tau ki a koutou te aroha noa, me te rangimarie, he mea na te Atua na to tatou Matua, na te Ariki hoki na Ihu Karaiti.
3
Tenei matou te whakawhetai atu nei ki te Atua, ara ki te Matua o to tatou Ariki o Ihu Karaiti, me te inoi tonu ano matou mo koutou,
4
No matou ka rongo nei ki to koutou whakapono ki a Karaiti Ihu, ki to koutou aroha hoki ki te hunga tapu katoa;
5
Mo to mea e tāria atu nei e takoto mai nei ma koutou i te rangi, ta koutou i rongo ai i mua ki te kupu o te pono o te rongo pai:
6
Kua tae atu nei ki a koutou, kua pera me tona pakutanga ki te ao katoa: a e whai hua ana, he pera hoki me ena i a koutou, no te ra ano i rongo ai, i mātau pono ai koutou ki te aroha noa o te Atua.
7
I whakaakona atu na hoki koutou ki tena e Epapara, e to matou hoa pononga e arohaina nei, he minita pono nei ia na te Karaiti ki a koutou;
8
Nāna hoki i whakakite mai ki a matou to koutou aroha i runga i te Wairua.
9
No konei hoki matou i te ra ano i rongo ai matou, kahore e mutu ta matou karakia mo koutou, e inoi ana kia whakakiia koutou ki te mohiotanga ki tana e pai ai, i runga i nga whakaaro nui katoa, i te mahara wairua ano hoki;
10
Kia tika ta koutou haere kia rite ki ta te Ariki, kia nui ai te whakamanawarekatanga, kia whai hua koutou, ara nga mahi pai katoa, kia neke ake i runga i te mohiotanga ki te Atua;
11
Kia whakanuia mai te kaha hei whakakaha mo koutou, kia rite ki ta te mana o tona kororia, e u tonu ai e whakamanawanui ai i runga i te hari;
12
Me te whakawhetai atu ano ki te Matua, nāna nei tatou i whai tikanga ai ki tetahi wahi o te kāinga o te hunga tapu, i roto i te māramatanga:
13
Nāna nei tatou i whakaora mai i te kaha o te pouri, a whakawhitia ake tatou e ia ki te rangatiratanga o tana Tama aroha;
14
Hei roto nei i a ia to tatou whakaoranga i runga i ona toto, ara, te murunga o nga hara;
15
Ko ia nei te ahua o te Atua e kore nei e kitea atu, te whanau matamua o nga mea hanga katoa:
16
Nāna hoki nga mea katoa i hanga, nga mea i te rangi, me nga mea i te whenua, nga mea e kitea ana, me nga mea e kore e kitea, nga torona, nga kawanatanga, nga rangatiratanga, nga mana: nāna, māna, te hanganga o nga mea katoa:
17
No mua ano hoki ia i nga mea katoa, nāna ano hoki nga mea katoa i mau ai;
18
Ko ia ano te upoko o te tinana, ara, o te hahi: ko ia te timatanga, te whanau matamua i roto i te hunga mate; kia waiho ai ia hei tuatahi i roto i nga mea katoa.
19
I pai hoki te Matua kia noho te hua noa iho o nga mea katoa i roto i a ia:
20
A hei runga i a ia he houhanga rongo ki a ia ma nga mea katoa, i te mea ka mau nei i a ia te rongo i runga i nga toto o tona ripeka; hei runga ano i a ia, ahakoa he mea no te whenua, ahakoa he mea no te rangi.
21
Me koutou hoki he tangata ke i mua, he hoa riri nga hinengaro i nga mahi kino, na, kua meinga nei e ia kia houhia ta koutou rongo,
22
He meatanga na te tinana o tona kikokiko, i te mea ka mate nei; mo koutou ano kia tapaea atu ki tona aroaro, he hunga tapu kahore nei he koha, kahore he hē;
23
Ki te pumau koutou ki te whakapono, u tonu, mau tonu, tē taea te whakaneke atu i runga i te tumanakotanga atu ki ta te rongo pai i rongo ai koutou, kua kauwhautia atu nei ki nga mea hanga katoa i raro o te rangi: a meinga ana ahau a Paora hei minita mo taua rongo pai;
24
Tenei ahau te hari nei ki oku mamae mo koutou, tenei te whakakapia nei e oku kikokiko nga mate o te Karaiti, kahore ano i rite noa, hei mea mo tona tinana, ara mo te hahi;
25
A meinga ana ahau hei minita mo taua hahi, rite tonu ki ta te Atua tikanga ki a koutou i homai nei ki a au, kia whakapaua te kauwhau o te kupu a te Atua;
26
Te mea ngaro i hunā i era wa noa atu, i era whakatupuranga, a kua whakakitea inaianei ki tona hunga tapu:
27
He meatanga hoki na te Atua, kia whakaaturia ki a ratou te taonga nui o te kororia o tenei mea ngaro ki roto ki nga tauiwi, ara a te Karaiti i roto i a koutou, e tumanako atu ai koutou ki te kororia:
28
Ko ta matou hoki tenei e kauwhau nei, i a matou ka whakatupato nei i nga tāngata katoa, ka whakaako nei i nga tāngata katoa i runga i nga whakaaro mohio katoa, he mea kia tapaea atu ai e matou nga tāngata katoa, he mea tino tika i roto i a Karaiti Ihu:
29
Ko taku tenei e uaua nei, e tohe nei i runga i tana mahinga e kaha nei te mahi i roto i a au.