- 1
- Na, ki te mea kua ara tahi koutou me te Karaiti, rapua nga mea o runga, o te wahi e noho mai nei a te Karaiti i te ringa matau o te Atua.
- 2
- Whakaaroa nga mea o runga, kauaka o te whenua.
- 3
- Kua mate hoki koutou, a kua oti to koutou oranga te huna ki a te Karaiti i roto i te Atua.
- 4
- I te whakakitenga mai o te Karaiti, o to tatou oranga, ko reira hoki koutou whakakitea tahitia ai me ia i runga i te kororia.
- 5
- Na, whakamatea o koutou wahi i runga i te whenua; te moe tahae, te poke, te minamina ki te hē, te hiahia kino, me te apo, he karakia whakapakoko hoki ia:
- 6
- He mea hoki enei e puta mai ai te riri a te Atua ki nga tamariki a te tutū:
- 7
- I roto hoki i enei mea koutou e haere ana i mua, i a koutou e noho ana i roto i a ratou.
- 8
- Tena ko tenei whakarerea enei mea katoa; te aritarita, te riri, te mauahara, te korero kino, te korero whakarihariha, i roto i o koutou mangai.
- 9
- Kaua e teka tetahi ki tetahi, kua unuhia atu hoki te tangata tawhito me ana hanga;
- 10
- A kua kakahuria nei te tangata hou, e whakahoutia nei i runga i te matauranga kia rite ki te ahua o tona kai hanga:
- 11
- Kahore o tena Kariki, Hurai ranei, kotinga, kotinga kore ranei, tau tangata, Haitiana, pononga, rangatira ranei: engari ko te Karaiti te katoa, i roto ano i te katoa.
- 12
- Na, kia rite ki te hunga whiriwhiri a te Atua, ki te hunga e tapu ana, e arohaina ana, a kakahuria iho te ngakau tohu tangata, te ngawari, te ngakau papaku, te ngakau mahaki, te manawanui;
- 13
- Kia ata hanga koutou tetahi ki tetahi, me te hohou i te rongo tetahi ki tetahi, ki te mea kei tetahi he take riri ki tetahi: kia rite ki ta te Karaiti i hohou nei i te rongo ki a koutou, kia pera ano hoki koutou.
- 14
- A hei waho i enei katoa ko te aroha, ko te tauhere tika rawa ia.
- 15
- A waiho ma te rangimarie o te Atua te whakahaere tikanga i roto i o koutou ngakau: i karangatia hoki koutou ki tenei i roto i te tinana kotahi; kia whakawhetai hoki koutou.
- 16
- Kia noho nui te kupu a te Karaiti i roto i a koutou i runga i nga matauranga katoa; me whakaako me whakatupato tetahi e tetahi ki nga waiata tapu, ki nga himene, ki nga waiata wairua, me te waiata ano ki te Ariki i runga i te aroha noa, i roto i o koutou ngakau.
- 17
- A, nga mea katoa e mea ai koutou, nga kupu nga mahi ranei, kia meinga katoatia i runga i te ingoa o te Ariki o Ihu, me te whakawhetai ano ki te Atua, ara ki te Matua, i roto i a ia.
- 18
- E nga wāhine, kia ngohengohe ki a koutou tāne ake, kia rite ta te Ariki tikanga.
- 19
- E nga tāne, arohaina a koutou wāhine, kei kaha hoki te riri ki a ratou.
- 20
- E nga tamariki, kia ngohengohe ki o koutou mātua i nga mea katoa: he mea pai hoki tenei ki te Ariki.
- 21
- E nga mātua, kei whakatakariritia a koutou tamariki, kei ngakaukore ratou.
- 22
- E nga pononga, kia ngohengohe ki nga rangatira o te wahi ki te kikokiko i nga mea katoa: kaua hei ta te kanohi mahi, he whakamanawareka tangata hoki tera; engari hei runga i te ngakau tapatahi, me te wehi ano ki te Atua:
- 23
- A, nga mea katoa e mea ai koutou mahia ngakautia, hei mea ki te Ariki, ehara i te mea ki nga tangata;
- 24
- E mātau ana hoki, ka riro i a koutou ta te Ariki utu, te kāinga a mua: he pononga hoki koutou na te Ariki na te Karaiti.
- 25
- Na, te tangata e hē ana te mahi, ka whakawhiwhia ano ia ki tana hē i mahi ai: kahore hoki he whakapai kanohi.
Address: 
Phone: 
Email: