- 1
- A i korero ano a Ihowa ki a Mohi, i mea,
- 2
- Titiro, kua whakahuatia nei e ahau te ingoa o Petareere, tama a Uri, ko ia nei he tama na Huru, no te iwi o Hura:
- 3
- Kua whakakiia ano ia e ahau ki te wairua o te Atua, ki te ngakau tupato, ki te whakaaro, ki te mohio, ki nga mahi katoa hoki,
- 4
- Hei whakaaro ki nga mahi a te tohunga, hei mahi i te koura, i te hiriwa, i te parahi,
- 5
- Mo te whakairo kohatu hoki, mo te whakanoho hoki, mo te whakairo rakau, mo te mahi ano hoki i nga mahi katoa.
- 6
- Tenei ano te hoatu nei e ahau hei hoa mona a Ahoriapa, te tama a Ahihamaka, no te iwi o Rana: kua whakanohoia ano hoki e ahau he mahara ki nga ngakau o te hunga ngakau mahara katoa, kia hangā ai e ratou nga mea katoa i whakahaua atu nei e ahau ki a koe;
- 7
- Te tapenakara o te whakaminenga, me te aaka o te whakaaturanga, me te taupoki whakamarietanga i runga i taua mea, me nga mea katoa o te tapenakara,
- 8
- Me te tepara me ona mea, me te turanga para-kore o nga rama, me ona mea katoa, me te aata mo te whakakakara,
- 9
- Me te aata mo te tahunga tinana, me ona mea katoa, me te takotoranga wai raua ko tona turanga,
- 10
- Me nga kakahu mo te mahi minita, me nga kakahu tapu mo Arona mo te tohunga, me nga kakahu mo ana tama mo te mahi tohunga,
- 11
- Me te hinu whakawahi, me te whakakakara reka mo te wahi tapu: kia rite ta ratou e mea ai ki nga mea katoa i whakahaua atu nei e ahau ki a koe.
- 12
- A i korero ano a Ihowa ki a Mohi, i mea,
- 13
- Korero atu ano ki nga tamariki a Iharaira, mea atu, Me whakarite ano e koutou aku hapati: hei tohu hoki ki te takiwa oku o koutou, puta noa atu i o koutou whakatupuranga: kia mohio ai koutou ko ahau ko Ihowa te whakatapu nei i a koutou.
- 14
- Mo reira me whakarite e koutou te hapati; he tapu hoki tena ki a koutou: he mate kau mo te tangata e whakanoa ana i taua ra: ko nga tangata katoa hoki e mahi ana i tetahi mahi i reira, ka hatepea atu taua wairua i waenga i tona iwi.
- 15
- E ono nga ra e mahia ai te mahi; kei te whitu ia o nga ra te hapati okiokinga, he tapu ki a Ihowa: ko nga tangata katoa e mahi ana i tetahi mahi i te ra hapati he mate kau mo ratou.
- 16
- No reira me mahara nga tamariki a Iharaira ki te hapati, kia whakaritea te hapati puta noa i o ratou whakatupuranga: kia mau tonu tenei kawenata.
- 17
- He tohu tena ra ki te takiwa oku o nga tamariki a Iharaira, ake ake ake: e ono hoki nga ra i hangā ai e Ihowa te rangi me te whenua, a i te whitu o nga ra ka okioki, a ta ana tona manawa.
- 18
- A i homai ano e ia ki a Mohi i te mutunga o tana korerotanga ki a ia i runga i Maunga Hinai, e rua nga papa whakaaturanga, he papa kohatu, he mea tuhituhi na te ringa o te Atua.
Address: 
Phone: 
Email: