- 1
- A, te kitenga o te iwi i roa te hekenga iho o Mohi i runga i te maunga, na ka huihui mai te iwi ki a Arona, a ka mea ki a ia, Whakatika, hangā etahi atua ma tatou, hei haere ki mua i a tatou; ko tenei Mohi hoki, te tangata nana tatou i kawe mai ki runga nei i te whenua o Ihipa, kahore tatou e mohio kua ahatia ranei ia.
- 2
- Na, ka mea atu a Arona ki a ratou, Whatiia mai nga whakakai koura i nga taringa o a koutou wahine, o a koutou tama, o a koutou tamahine, ka kawe mai ki a au.
- 3
- Na, whatiia mai ana e te iwi katoa nga whakakai koura i o ratou taringa, a kawea mai ana ki a Arona.
- 4
- Na, ka tangohia mai e ia i o ratou ringaringa, a hangā ana e ia ki te purupuru, i muri iho i tana whakarewanga hei kuao kau: na, ka mea ratou, Ko ou atua enei, e Iharaira, nana nei koe i kawe mai ki runga i te whenua o Ihipa.
- 5
- A, te kitenga o Arona, na, hangā ana e ia tetahi aata ki mua i taua mea; a ka karanga a Arona, ka mea, Ko apopo he hakari ki a Ihowa.
- 6
- Na, ka maranga wawe ratou i te aonga ake, a whakaekea atu ana e ratou he tahunga tinana, i kawea mai ano hoki he whakamarietanga; na, ka noho te iwi ki te kai, ki te inu, a ka whakatika ki te takaro.
- 7
- Na, ko te meatanga mai a Ihowa ki a Mohi, Haere, heke atu, kua he hoki tou iwi i kawea mai e koe i te whenua o Ihipa:
- 8
- Kua hohoro ratou te peka ke i te huarahi i kiia atu e ahau ki a ratou: kua hangā e ratou he kuao kau, he mea whakarewa, kua koropiko ano hoki ki taua mea, kua patu ano hoki i te patunga tapu mana, a e mea ana, Ko ou atua enei, e Iharaira, i kawea mai ai koe i te whenua o Ihipa.
- 9
- A i mea mai ano a Ihowa ki a Mohi, Kua kite ahau i tenei iwi, na, he iwi kaki maro ratou:
- 10
- Na, tukua atu ahau, a ka mura atu taku riri ki a ratou, a ka pau ratou i a au: ka hangā ano koe e ahau hei iwi nui.
- 11
- Na, ka inoi a Mohi ki a Ihowa ki tona Atua, a ka mea, Na te aha to riri i mura ai, e Ihowa, ki tou iwi i kawea mai nei e koe i te whenua o Ihipa i runga i te kaha nui, i te ringa maro hoki?
- 12
- Mo te aha ka tukua ai nga Ihipiana kia korero, kia mea, I whakaputaina atu ratou e ia ki te kino, kia whakamatea ai ratou e ia ki nga maunga, kia whakangaromia atu ai hoki ratou i runga i te mata o te whenua? Tahuri atu i to riri nui e mura nei, kia puta ke hoki tau whakaaro ki tenei kino mo tou iwi.
- 13
- Kia mahara ki o pononga, ki a Aperahama, ki a Ihaka, ki a Iharaira, ki tau oatitanga hoki i a koe ki a ratou, ki to meatanga ki a ratou, Ka whakanuia e ahau o koutou uri kia rite ki nga whetu o te rangi; ko tenei whenua katoa hoki i korerotia atu nei e ahau, ka hoatu e ahau ki o koutou uri, a ka nohoia e ratou, ake ake ake.
- 14
- Na, ka puta ke ta Ihowa i whakaaro ai mo te kino i kiia e ia kia meatia ki tona iwi.
- 15
- Na, ka tahuri a Mohi, a ka heke iho i te maunga, me nga papa e rua o te whakaaturanga i tona ringa: he mea tuhi nga taha e rua o nga papa; i tetahi taha i tetahi taha te tuhi.
- 16
- He mea mahi hoki na te Atua aua papa, me te tuhituhi hoki, na te Atua te tuhituhi, he mea whaowhao atu ki nga papa.
- 17
- A ka rongo a Hohua i te reo o te iwi e hamama ana, ka mea ia ki a Mohi, He nge whawhai kei te puni ra.
- 18
- Na, ka mea mai ia, Ehara tena reo i te hamamatanga mo te hinganga o te taua, ehara hoki tena reo i te hamamatanga o te hunga e hinga ana: he reo waiata taku e rongo ai.
- 19
- A ka whakatata atu ia ki te puni, na, ka kite ia i te kuao kau, me te kanikaninga: na, ka mura te riri a Mohi, a ka makā atu e ia nga papa i roto i ona ringa, a pakarua ana aua mea e ia ki raro i te maunga.
- 20
- Na, ka tango ia i te kuao kau i hangā e ratou, a tahuna ana e ia ki te ahi, a hurihia ana, a ngotangota noa, a ruiruia ana e ia ki te wai, a whakainumia atu ana ma nga tamariki a Iharaira.
- 21
- Na, ka mea a Mohi ki a Arona, I aha tenei iwi ki a koe, i takina mai ai e koe tenei hara nui ki runga ki a ratou?
- 22
- A ka mea mai a Arona, Kei mura mai te riri a toku ariki: e mohio ana koe ki tenei iwi, mo te kino tonu ratou.
- 23
- I mea mai hoki ratou ki a au, Hangā etahi atua ma tatou hei haere i mua i a tatou: ko tenei Mohi hoki, te tangata nana nei tatou i kawe mai i te whenua o Ihipa, kahore tatou e mohio kua ahatia ranei ia.
- 24
- Na, ko taku meatanga atu ki a ratou, Ki te mea he koura to tetahi, whatiia mai. Na, ka homai e ratou ki a au: a makā ana e ahau ki te ahi; a puta ake ko te kuao kau nei.
- 25
- A, te kitenga o Mohi i te iwi e tu tahanga ana; (na Arona hoki ratou i mea kia tu tahanga, e whakama ai ratou i roto i o ratou hoa riri:)
- 26
- Na, ka tu a Mohi ki te kuwaha o te puni, ka mea, Ko wai to Ihowa? haere mai ki a au. Na, ka huihui nga tamariki katoa a Riwai ki a ia.
- 27
- Na, ka mea ia ki a ratou, Ko te kupu tenei a Ihowa, a te Atua o Iharaira, Whakanohoia e tera tangata e tera tangata tana hoari ki tona taha, a haere atu na tetahi kuwaha, hoki atu na tetahi kuwaha, na roto atu i te puni, a patua e ia tangata tona teina, e ia tangata tona hoa e ia tangata tona hoa e noho tata ana.
- 28
- Na, rite tonu ki te kupu a Mohi ta nga tamariki a Riwai i mea ai: a tata tonu ki te toru mano nga tangata i hinga i taua rangi.
- 29
- Na Mohi hoki i mea, Hei runga i tana tama, i tona teina, te whakatohungatanga ki a Ihowa o ia tangata o ia tangata o koutou aianei; kia homai ai e ia he manaakitanga ki a koutou aianei.
- 30
- Na, i te aonga ake, ka mea a Mohi ki te iwi, Kua hara koutou, he nui te hara: na, me haere ahau aianei ki runga ki a Ihowa; tera pea e taea e ahau te whakamarietanga mo to koutou hara.
- 31
- Na, ka hoki a Mohi ki a Ihowa, a ka mea, Aue! kua hara tenei iwi, he nui te hara, kua hangā hoki e ratou etahi atua koura mo ratou.
- 32
- Na, mau e horoi atu to ratou hara—; a ki te kahore, tena ra, horoia atu ahau i roto i tau pukapuka i tuhituhia e koe.
- 33
- Na ka mea mai a Ihowa ki a Mohi, Te tangata e hara ana ki a au, ka horoia atu ia e ahau i roto i taku pukapuka.
- 34
- Na, haere ra, arahina atu te iwi ki te wahi i korerotia atu e ahau ki a koe: tena taku Anahera te haere atu na i mua i a koe; na, ko a te ra e mea ai ahau, ina, ka meinga e ahau to ratou hara kia tau ki runga ki a ratou.
- 35
- Na, ka whiua e Ihowa te iwi mo ta ratou hanganga i te kuao kau, i hangā nei e Arona.
Address: 
Phone: 
Email: