- 1
- Katahi ka mea a Ihowa ki a Mohi, Haere ki a Parao, mea atu ki a ia, E penei ana te kupu a Ihowa a te Atua o nga Hiperu, Tukua mai toku iwi ki te mahi ki a au.
- 2
- Ta te mea hoki, ki te kore koe e rongo ki te tuku mai i a ratou, a ka pupuri tonu i a ratou;
- 3
- Nana, ka pa atu te ringaringa o Ihowa ki au kararehe i te parae, ki nga kaihe, ki nga kamera, ki nga kau, ki nga hipi ano hoki: he kino rawa te mate.
- 4
- A e wehewehe a Ihowa i nga kararehe a Iharaira, i nga kararehe ano hoki a Ihipa: a e kore e mate tetahi mea o a nga tamariki a Iharaira.
- 5
- A i whakaritea atu ano e Ihowa he taima, i mea ia, Ko apopo a Ihowa mea ai i tenei mea ki te whenua nei.
- 6
- A te aonga ake, na, meatia ana tena mea e Ihowa, a mate iho nga kararehe katoa o Ihipa; tena ko nga kararehe a nga tamariki a Iharaira, kihai i mate tetahi.
- 7
- A ka tonoa atu he kai titiro e Parao, na, kahore i mate kia kotahi o nga kararehe a nga tamariki a Iharaira. A ka whakapakeketia te ngakau o Parao, kihai hoki ia i tuku utu i te iwi.
- 8
- Katahi ka mea a Ihowa ki a Mohi raua ko Arona, Tikina atu etahi pungarehu ma korua i te oumu, kia ki nga ringa, a ma Mohi e ruke atu whaka-te-rangi i te tirohanga a Parao.
- 9
- A ka whakapuehu ririki ki te whenua katoa o Ihipa, a ka meinga hei whewhe e tupu ana me te pukupuku ki te tangata, ki te kararehe, puta noa i te whenua o Ihipa.
- 10
- Na, aohia ana e raua he pungarehu i te oumu, a ka tu ki te aroaro o Parao; a, te rukenga atu a Mohi whaka-te-rangi, na, whakawhewhe tonu iho, he mea tupu ake me te pukupuku ano i te tangata i te kararehe.
- 11
- A kihai nga tohunga i ahei te tu ki te aroaro o Mohi i nga whewhe; kei nga tohunga hoki te whewhe, kei nga Ihipiana katoa ano hoki.
- 12
- Na, ka whakapakeke a Ihowa i te ngakau o Parao, a kihai ia i whakarongo ki a raua; i rite tonu ki ta Ihowa i mea ai ki a Mohi.
- 13
- Katahi ka mea a Ihowa ki a Mohi, Kia maranga wawe koe i te ata, ka tu ki te aroaro o Parao, a ka mea ki a ia, E penei mai ana a Ihowa te Atua o nga Hiperu, Tukua mai toku iwi ki te mahi ki a au.
- 14
- Ta te mea hoki ko a tenei taima ka tukua atu e ahau aku whiu katoa ki tou ngakau, ki o tangata hoki, ratou tahi ko tou iwi; kia mohio ai koe kahore tetahi e rite ana ki a au i te whenua katoa.
- 15
- Ta te mea, ko akuanei takiritia ai toku ringaringa, a ka patu ahau i a koe, i tou iwi hoki, ki te mate uruta; a ka whakangaromia atu koe i te whenua.
- 16
- A mo konei ano hoki ahau i whakaara ai i a koe, kia ai koe hei whakakitenga mo toku kaha; kia korerotia ai hoki toku ingoa ki te ao katoa.
- 17
- E whakahirahira ana ano koe i a koe ki toku iwi, tē tuku mai ai koe i a ratou?
- 18
- Na, kia penei apopo, ka uaina iho e ahau he whatu, he mea nanakia rawa, kahore he pena i Ihipa o te pito nohoanga iho ano, a mohoa noa nei.
- 19
- Na, unga atu, huihuia mai au kararehe, me au mea katoa i te parae; ta te mea ko nga tangata katoa, me nga kararehe, e rokohanga atu ki te parae, a kihai i huihuia mai ki te whare, ina, ka rere iho te whatu ki runga ki a ratou, a ka mate.
- 20
- Te tangata a Parao i wehi i te kupu a Ihowa, i meatia e ia ana tangata, me ana kararehe, kia rere atu ki nga whare:
- 21
- A te tangata kihai i anga tona ngakau ki te kupu a Ihowa, i waiho atu e ia ana tangata me ana kararehe i te parae.
- 22
- Na, ko te meatanga mai a Ihowa ki a Mohi, Torona ake tou ringaringa whaka-te-rangi, kia puta iho ai he whatu ki te whenua katoa o Ihipa, ki te tangata, ki te kararehe, ki nga mea tupu katoa o te mara, puta noa i te whenua o Ihipa.
- 23
- A te whatoronga atu o te tokotoko o Mohi whaka-te-rangi: te tino tukunga mai a Ihowa i nga whatitiri me te whatu, a rere ana te ahi i runga i te whenua: a whakauaina iho ana e Ihowa te whatu ki te whenua o Ihipa.
- 24
- Na, he whatu tena, he ahi hoki e whakauru ana ki roto ki te whatu, he nanakia rawa, kahore ona rite i te whenua katoa o Ihipa, no te timatanga iho ano o taua iwi.
- 25
- Na, patua iho e te whatu, puta noa i te whenua katoa o Ihipa, nga mea katoa i te parae, te tangata, te kararehe; i patu ano te whatu i nga mea tupu katoa o te mara, a ko nga rakau katoa o te mara i whatiwhatiia.
- 26
- Ko te whenua anake o Kohena, i noho ai nga tamariki a Iharaira, kahore he whatu.
- 27
- Na, ka tono tangata atu a Parao hei karanga i a Mohi raua ko Arona, a ka mea atu ki a raua, Kua hara ahau i tenei wa: e tika ana ta Ihowa, tena ko au, matou tahi ko toku iwi, e kino ana.
- 28
- Inoi atu ki a Ihowa, (kua iro na hoki,) kia mutu nga whatitiri nui me te whatu; a ka tuku atu ahau i a koutou, a heoi ano to koutou nohoanga.
- 29
- Na, ka mea mai a Mohi ki a ia, Kia puta atu ahau ki waho i te pa, ka whakatuwhera atu ahau i oku ringa ki a Ihowa; a e mutu nga whatitiri, a ka kore noa iho te whatu; kia mohio ai koe no Ihowa te whenua.
- 30
- Ko koe ia, me o tangata, e mohio ana ahau kahore ano koutou i wehi noa i a Ihowa i te Atua,
- 31
- A i patua te korari me te parei; kua pupuku hoki te parei, kua pua hoki te korari.
- 32
- Ko te witi ia me te rai, kihai i patua; kahore hoki ena i tupu noa.
- 33
- A te mawehenga atu o Mohi i a Parao ki waho i te pa, na, ka whakatuwhera atu ia i ona ringaringa ki a Ihowa; a mutu iho nga whatitiri me te whatu, kihai hoki te ua i ringihia iho ki te whenua.
- 34
- A ka kite a Parao kua mutu te ua, te whatu, me nga whatitiri, na, ka hara ano ia, ka whakapakeke i tona ngakau, ratou tahi ko ona tangata.
- 35
- Heoi, whakapakeketia ana te ngakau o Parao, kihai hoki ia i tuku atu i nga tamariki a Iharaira; i rite ano ki ta Ihowa i korerotia e Mohi.
Address: 
Phone: 
Email: