- 1
- Na, ko tana kianga mai ki a au, E te tama a te tangata, tau i kite ai kainga, kainga tenei pukapuka, ka haere ka korero atu ki te whare o Iharaira.
- 2
- Na, kua hamama toku mangai, a meinga ana ahau e ia kia kai i taua pukapuka.
- 3
- I mea mai ano ia ki a au, E te tama a te tangata, kia kai to kopu, kia ki ano hoki tou puku i tenei pukapuka ka hoatu nei e ahau ki a koe. Katahi ka kainga atu e ahau, a ano he honi taua mea i roto i toku mangai te reka.
- 4
- Na, ko tana meatanga mai ki a au, E te tama a te tangata, haere koe, e tae ki te whare o Iharaira, korerotia atu aku kupu ki a ratou.
- 5
- Ehara hoki i te mea e ungā atu ana koe ki te iwi he pakeke tona reo, e ngaro ana āna korero; engari ki te whare o Iharaira.
- 6
- Ehara i te mea e maha ana nga iwi e pakeke ana te reo, e ngaro ana nga korero, he hunga e kore nei a ratou kupu e rangona e koe. He pono me i ungā atu koe e ahau ki a ratou, kua whakarongo ratou ki a koe.
- 7
- Na, e kore te whare o Iharaira e pai ki te whakarongo ki a koe; no te mea e kore ratou e pai ki te whakarongo ki a au; he rae pakeke hoki to te whare katoa o Iharaira, he ngakau pakeke.
- 8
- Nana, kua oti to mata te mea e ahau kia pakeke ki o ratou mata; to rae ano hoki kia pakeke ki o ratou rae.
- 9
- Kua oti to rae te mea e ahau kia rite ki te raimona e pakeke atu ana i te kiripaka: kaua e wehi i a ratou, kaua hoki e pairi ina titiro mai ratou, he whare whakakeke hoki ratou.
- 10
- I mea mai ano ia ki a au, E te tama a te tangata, Aku kupu katoa ka korerotia e ahau ki a koe rongoatia ki roto ki to ngakau, whakarangona mai ano e ou taringa.
- 11
- Na, haere, e tae ki nga whakarau ki nga tamariki a to iwi, korero atu ki a ratou, mea atu, Ko te kupu tenei a te Ariki a Ihowa; ma ratou e whakarongo, ma ratou ranei e kore e whakarongo.
- 12
- Na, kua hapainga ake ahau e te wairua, a ka rangona e ahau i muri i a au he reo, he haruru nui e mea ana, Kia whakapaingia te kororia o Ihowa i tona wahi.
- 13
- I rongo ano ahau i te haruru o nga parirau o nga mea ora e pa ana tetahi ki tetahi, i te haruru ano o nga wīra i to ratou ritenga atu, me tetahi atu haruru, nui atu te ngateritanga.
- 14
- Na, ka hapainga ahau e te wairua, kahakina ana ahau e ia, a haere matakawa ana ahau, mura tonu taku riri; otiia i kaha ano te ringaringa o Ihowa ki runga ki a au.
- 15
- Na, haere ana ahau ki nga whakarau i Tere-apipi, ki era e noho ana i te awa i Kepara, noho ana ahau i te wahi i noho ai ratou, e whitu nga rangi oku e noho ketekete ana i roto i a ratou.
- 16
- Na, i te mutunga o nga rangi e whitu, ka puta mai te kupu a Ihowa ki a au, i mea ia,
- 17
- E te tama a te tangata, kua oti koe te mea e ahau hei kai tutei ma te whare o Iharaira. Na, whakarongo ki te kupu a toku mangai, a ko koe hei kai whakatupato maku i a ratou.
- 18
- Ki te mea atu ahau ki te tangata kino, Ko te mate kau mou, a ka kore koe e whakatupato i a ia, ka kore e korero, e whakatupato i taua tangata kino ki tona ara kino kia ora ai ia; ka mate taua tangata kino i runga i tona he, a ka rapua e ahau he utu mo ona toto i tou ringaringa.
- 19
- Ki te whakatupato ia koe i taua tangata kino, a ka kore ia e tahuri mai i tona kino, i tona ara kino, ka mate ia i runga i tona he; ka ora mai ano ia i a koe tou wairua.
- 20
- Na, ki te tahuri atu te tangata tika i tana tika, a ka mahia e ia te kino, a ka hoatu e ahau he tūtukitanga waewae ki tona aroaro, ka mate ia: kihai na hoki koe i whakatupato i a ia, ka mate ia i runga i tona hara, e kore ano tana tika i mahia e ia e maharatia, ka rapua ano e ahau he utu mo ona toto i tou ringaringa.
- 21
- Na, ki te whakatupato koe i te tangata tika kia kaua te tangata tika e hara, a ka kore ia e hara, ka ora ia, nona hoki ka oti te whakatupato, a ka ora mai to wairua i a koe.
- 22
- Na, kua tae iho te ringa o Ihowa ki runga ki a au, a ka mea ia ki a au, Whakatika, haere ki te mānia, a ka korero ahau ki a koe ki reira.
- 23
- Na, whakatika ana ahau, a haere ana ki te mānia: na, ko te kororia o Ihowa i reira e tu ana, rite tonu ki te kororia i kitea e ahau ki te awa ki Kepara, a tapapa atu ana ahau.
- 24
- Katahi ka uru te wairua ki roto ki a au, a ka meinga e ia oku waewae kia tu ki runga: na, ka korero mai ia ki a au, a ka mea ki a au, Haere, tutakina atu koe ki roto ki to whare.
- 25
- Na, ko koe, e te tama a te tangata, nana, ka meatia iho e ratou he here ki a koe, a ka herea koe ki aua here, e kore ano koe e puta mai ki roto ki a ratou.
- 26
- Ka meinga ano e ahau to arero kia piri ki to ngao, a ka reo-koretia koe, e kore ano koe e waiho hei kai riri mo to ratou he; no te mea he whare whakakeke ratou.
- 27
- Na, i te wa e korero ai ahau ki a koe, ka whakatuwheratia e ahau to mangai, a ka mea koe ki a ratou, Ko te kupu tenei a te Ariki a Ihowa, Te tangata e rongo ana, mana e whakaron go; te tangata e kore e rongo, kaua ia e whakarongo: he whare whakakeke hoki ratou.
Address: 
Phone: 
Email: