- 1
- He mea hanga na te Atua i te timatanga te rangi me te whenua.
- 2
- A kahore he ahua o te whenua, i te takoto kau; a he pouri a runga i te mata o te hohonu. Na, ka whakapaho te Wairua o te Atua i runga i te kare o nga wai.
- 3
- A ka ki te Atua, Kia mārama: na ka mārama.
- 4
- A ka kite te Atua i te māramatanga, e pai ana: a ka wehewehe te Atua i waenganui o te mārama o te pouri.
- 5
- Na, ka huaina e te Atua te mārama he Awatea, a ko te pouri i huaina e ia he Po. A ko te ahiahi raua ko te ata te ra tuatahi.
- 6
- Na, ka mea te Atua, Kia whai kikorangi a waenganui o nga wai, a kia wehea e taua mea a waenganui o nga wai.
- 7
- Na, ka hangā e te Atua te kikorangi, a ka wehea e ia nga wai i raro iho o te kikorangi i nga wai o runga ake o te kikorangi: a ka oti.
- 8
- Na, ka huaina te kikorangi e te Atua he Rangi. A ko te ahiahi raua ko te ata te ra tuarua.
- 9
- Na, ka mea te Atua, Kia huihuia nga wai i raro i te rangi, kia kotahi te wahi, a kia puta ake te tuawhenua: a ka oti.
- 10
- Na, ka huaina te tuawhenua e te Atua he Whenua; ko te huihuinga wai hoki i huaina e ia ko nga Moana: a ka kite mai te Atua, e pai ana.
- 11
- Na, ka mea te Atua, Kia pihi ake te taru hou i te whenua, te otaota whai purapura, me te rakau hua ki runga ki te whenua, e hua ana ona hua, he mea rite tonu ki a ia, kei roto nei i a ia ona purapura: a ka oti.
- 12
- Na, ka whakaputaina ake te taru hou e te whenua, te otaota hoki e hua ana ona hua, he mea rite tonu ki a ia, me te rakau whai hua, kei roto nei i a ia ona purapura, he mea rite tonu ki a ia: a ka kite mai te Atua, e pai ana.
- 13
- A ko te ahiahi raua ko te ata te ra tuatoru.
- 14
- Na, ka mea te Atua, Kia whai mea whakamārama te kiko o te rangi, hei wehe i te awatea i te po; a hei tohu ano aua mea, hei taima, hei ra, hei tau:
- 15
- A hei whakamārama aua mea i te kiko o te rangi, hei whakamārama mo te whenua: a ka oti.
- 16
- Na, ka hangā e te Atua nga whakamārama nui e rua; te whakamārama nui hei tohutohu mo te awatea, me te whakamārama tuaiti hei tohutohu mo te po: me nga whetu ano hoki.
- 17
- A whakanohoia ana aua mea e te Atua ki te kiko o te rangi, hei whakamārama mo te whenua,
- 18
- Hei tohutohu ano hoki i te awatea i te po, hei wehe hoki i te mārama i te pouri: a ka kite mai te Atua, e pai ana.
- 19
- A ko te ahiahi raua ko te ata te ra tuawha.
- 20
- Na, ka mea te Atua, Kia ngahue ake i roto i nga wai te mea ora e ngoki ana, kia rere ano hoki te manu i runga i te whenua i te mata o te kiko o te rangi.
- 21
- Na, ka hangā e te Atua nga tohora nui, me nga mea ora katoa, nga mea ngokingoki i ngahue ake nei i roto i nga wai, o ia ahua o ia ahua me nga manu whai parirau katoa, o ia ahua o ia ahua: a ka kite te Atua, e pai ana.
- 22
- Na, ka manaaki te Atua i a ratou, ka mea, Kia hua koutou, kia tini, kia kapi hoki nga wai o nga moana i a koutou, kia tini ano hoki nga manu ki runga ki te whenua.
- 23
- A ko te ahiahi raua ko te ata te ra tuarima.
- 24
- Na, ka mea te Atua, Kia whakaputaina ake e te whenua te mea ora o ia ahua o ia ahua, te kararehe, me te mea ngokingoki, me te kirehe o te whenua, o ia ahua o ia ahua: a ka oti.
- 25
- Na, ka hangā e te Atua te kirehe o te whenua o ia ahua o ia ahua, me te kararehe o ia ahua o ia ahua, me nga mea ngokingoki katoa o te whenua o ia ahua o ia ahua: a ka kite mai te Atua, e pai ana.
- 26
- Na, ka mea te Atua, Kia hanga tatou i te tangata kia rite ki a tatou, hei to tatou hoki te ahua: a kia waiho ratou hei rangatira mo nga ika o te moana, mo te manu hoki o te rangi, mo nga kararehe hoki, mo te whenua katoa hoki, mo nga mea ngokingoki katoa ano hoki e ngokingoki ana i runga i te whenua.
- 27
- Na, ka hangā e te Atua te tangata, he mea rite ki a ia, i hangā ia e ia kia rite ki te Atua; i hangā raua he tane he wahine.
- 28
- Na, ka manaakitia raua e te Atua, a ka mea te Atua ki a raua, Kia hua, kia tini, kia kapi hoki te whenua, i a korua, kia mate hoki ona tara i a korua: a hei rangatira ano korua mo te ika o te moana, mo te manu hoki o te rangi, mo nga mea ora katoa hoki e ngokingoki ana i runga i te whenua.
- 29
- Na, ka mea mai te Atua, Na, kua oti nei te hoatu e ahau ki a korua nga otaota katoa e whai purapura ana i runga i te mata o te whenua katoa, me te rakau katoa, he hua rakau tona e whai purapura ana; hei kai ena ma korua.
- 30
- Me nga otaota matomato katoa, hei kai ma nga kararehe katoa o te whenua, ma nga manu katoa hoki o te rangi, ma nga mea katoa hoki e ngokingoki ana i runga i te whenua kei roto nei i a ratou he wairua ora: a ka oti.
- 31
- A, ka kite te Atua i nga mea katoa kua hangā, nei e ia, na, pai whakaharahara. A ko te ahiahi raua ko te ata te ra tuaono.
Address: 
Phone: 
Email: