- 1
- Whakarongo mai ki tenei, e nga tohunga, mahara mai, e te whare o Iharaira, kia whai taringa mai, e te whare o te kingi; mo koutou hoki te whakarite whakawa; no te mea kua waiho koutou hei rore mo Mitipa, hei kupenga kua oti te hora ki runga ki a Taporo.
- 2
- Te patu a te hunga tutu, hohonu noa iho, he kai riri ano hoki ahau i te he o ratou katoa.
- 3
- E mohio ana ahau ki a Eperaima, kahore ano hoki a Iharaira e ngaro i a au, kei te puremu nei hoki koe inaianei, e Eperaima, kua poke a Iharaira.
- 4
- Kahore e whakatikaia e ratou a ratou mahi ki te hoki atu ki to ratou Atua; kei roto hoki i a ratou te wairua o te puremu, kahore ano hoki o ratou mohiotanga ki a Ihowa.
- 5
- E whakaaturia ana ta Iharaira e tona whakapehapeha ki tona aroaro ano: na, ka hinga a Iharaira raua ko Eperaima i runga i to raua he, me Hura ano hoki, ka hinga ngatahi ratou.
- 6
- Ka haere ratou me a ratou hipi me a ratou kau ki te rapu i a Ihowa; heoi e kore e kitea; kua mawehe atu ia i roto i a ratou.
- 7
- Kua tinihanga ratou ki a Ihowa: he tamariki tangata ke hoki a ratou tamariki: akuanei ka pau ratou me a ratou wahi i te marama kotahi.
- 8
- Whakatangihia te korenete ki Kipea, te tētere ki Rama: hamama i Pete-awene i muri i a koe, e Peniamine,
- 9
- Ka ururuatia a Eperaima i te ra e riria ai te he: kua whakaaturia atu nei e ahau i roto i nga hapu o Iharaira te mea kua takoto rawa te putanga mai.
- 10
- E rite ana nga rangatira o Hura ki te hunga e whakaneke atu ana i te rohe; ka rite ki te wai taku riri ka ringitia atu nei ki a ratou.
- 11
- E tukinotia ana, e whatīa ana a Eperaima i te whakaritenga whakawa, mona i pai ki te whai i te whakahaunga.
- 12
- Na, taku ki a Eperaima ka rite ki ta te purehurehu, ka rite ano hoki ki te pirau taku ki te whare o Hura.
- 13
- I te wa i kitea ai tona mate e Eperaima, tona marutanga e Hura, na, haere ana a Eperaima ki a Ahiria, tuku tangata ana ia ki a Kingi Iarepe: heoi kihai koutou i taea e ia te rongoa, kihai ano to koutou marutanga i ora i a ia.
- 14
- Ka rite hoki taku ki a Eperaima ki ta te raiona, taku ki te whare o Hura ka rite ki ta te kuao raiona: ka haehae ahau, ina, ahau ano, a ka haere; ka tangohia atu e ahau, kahore hoki he kai whakaora.
- 15
- Ka haere ahau ka hoki ki toku wahi, kia whakaae ra ano ratou ki ta ratou he, kia rapua ra ano toku mata e ratou: i a ratou e mate ana, moata tonu ta ratou rapu i a au.
Address: 
Phone: 
Email: