- 1
- Kei tokomaha koutou ki te whakaako, e aku teina, e mātau ana hoki koutou e rahi ake te whakawakanga e whakawakia ai tatou.
- 2
- He maha hoki nga mea e tūtuki ai tatou katoa. Ki te kore tetahi e tūtuki i te kupu, he tino tika tenei tangata, e taea ano e ia te paraire te tinana katoa.
- 3
- Na, ka pangā nei e tatou nga paraire ki nga mangai o nga hoiho, kia rongo ai ratou ki a tatou; a pareparea ana e tatou to ratou tinana katoa.
- 4
- Whakaaroa nga kaipuke, nga mea nui rawa nei, he mea aki nei e nga hau kaha, heoi e pareparea ana e te urungi nohinohi rawa, ki te wahi e hiahia ai te hinengaro o te kai urungi:
- 5
- Whaihoki ko te arero he wahi nohinohi ia, nui atu hoki tona whakapehapeha. Nana, te nui o te wahie e whakaungia ana e te ahi nohinohi!
- 6
- He kapura ano hoki te arero, ko te ao maori o te kino: pera tonu te arero i roto i o tatou wahi, poke iho i a ia te tinana katoa, ngiha ana i a ia nga mea katoa a te tangata; a he mea whakau ano ia na te reinga.
- 7
- Nga tini tu kararehe hoki, nga manu, nga mea ngokingoki, nga mea i te moana, e whakararatatia ana, i whakararatatia ano hoki i mua e te tangata:
- 8
- Ko te arero ia e kore tena e taea e tetahi tangata te whakararata; he kino ia e kore e taea te pēhi, kī tonu i te wai whakamate.
- 9
- Ko ta tatou mea ia hei whakapai i te Atua i te Matua; ko ta tatou mea ano ia hei kanga i nga tāngata, i hangā kia rite ki te Atua.
- 10
- Kotahi tonu te mangai puta ake ana i roto ko te manaaki ko te kanga. Ehara i te pai, e aku teina, kia penei enei mea.
- 11
- E pupū ake ana ranei i te puna ko te reka ko te kawa i roto i te poka kotahi?
- 12
- E hua ranei he oriwa ma te piki, e aku teina, he piki ranei ma te waina? e kore ano hoki e pupū ake i roto i te puna kotahi te wai tai me te wai reka.
- 13
- Ko wai te tangata mātau te tangata mahara i roto i a koutou? kia whakakitea mai e ia i runga i te whakahaere pai ana mahi, kia māhaki ano te ngakau kia mātau.
- 14
- Tena ko tenei he hae nanakia ta koutou, he totohe i roto i o koutou ngakau, kaua koutou e whakamanamana, kaua hoki e teka ki te pono.
- 15
- Ehara tenei matauranga i te mea e heke iho ana no runga, no te whenua ia, no te ngakau maori, no te rewera.
- 16
- I te wahi hoki e noho ai te hae me te totohe, ko reira ano te noho kino me nga mahi hē katoa.
- 17
- Te matauranga ia o runga he mea kino kore i te tuatahi, muri iho ka rangimarie, ka ngawari, ka hohoro ki te whakarongo, kī tonu i te mahi tohu i nga hua pai, kahore ana whiriwhiringa i te tangata, kahore ona tinihanga.
- 18
- A e ruia ana nga hua o te tika i roto i te rangimarie ma te hunga hohou rongo.
Address: 
Phone: 
Email: