Jeremiah Chapter 2 - Paipera Tapu 1868 | Te Paipera Tapu 1868

Jeremiah Chapter 2 - Paipera Tapu 1868

1
I puta mai ano te kupu a Ihowa ki a au, i mea,
2
Haere, karanga atu ki nga taringa o Hiruharama, mea atu, Ko te kupu tenei a Ihowa, E mahara ana ahau ki a koe, ki te mahi pai a tou tamarikitanga, ki te aroha i tou marenatanga, i a koe i aru i a au i te koraha, i te whenua kihai i whakatokia.
3
He tapu a Iharaira ki a Ihowa, ko nga matamua ia o ona hua: te hunga katoa e kai ana i a ia he hē to ratou; ka pa te kino ki a ratou, e ai ta Ihowa.
4
Whakarongo ki te kupu a Ihowa, e te whare o Hakopa, e nga hapu katoa ano hoki o te whare o Iharaira.
5
Ko te kupu tenei a Ihowa, He aha toku kino i mau i o koutou mātua, i matara atu ai ratou i a au, i whai ai ratou i te horihori, a horihori iho ratou?
6
Kahore noa iho a ratou kianga ake, Kei hea a Ihowa, nāna nei tatou i kawe mai i te whenua o Ihipa, nāna nei tatou i arahi i te koraha, i te whenua titohea, i te whenua rua, i te whenua o te mate-wai, o te atarangi o te mate, i te whenua kihai i haerea e te tangata, kihai ano i nohoia e te tangata?
7
Naku nei hoki koutou i kawe mai ki te whenua hua maha, ki te kai i ona hua, i ona mea pai ano hoki. Na, to koutou taenga mai, kei te whakapoke koutou i toku whenua, meinga ana e koutou toku wahi tupu hei mea whakarihariha.
8
Kahore he kianga ake a nga tohunga, Kei hea a Ihowa; nga kai rahurahu o te ture, kahore ratou i matau ki a au; kua he ano nga hepara ki a au; nga poropiti, na Paara nga tikanga i poropiti ai ratou, whaia ana e ratou nga mea kahore nei he painga.
9
Mo reira ka totohe ano ahau ki a koutou, e ai ta Ihowa, ka totohe ano hoki ahau ki nga tamariki a a koutou tamariki.
10
Tena ra, whiti atu ki nga motu o Kitimi, titiro ai, unga tangata ano hoki ki Kerara, whakaaroa marietia kia kite ai koutou kua whai rite ranei tenei mea.
11
I whakaputaina ketia ranei ona atua e tetahi iwi? (ehara nei ano hoki ena i te atua) Na, toku iwi, to ratou kororia, puta ke ana i a ratou hei mea kahore ona painga.
12
Miharo mai, e nga rangi, ki tenei, kia nui te wehi, kia ngaro noa iho, e ai ta Ihowa.
13
Ka rua hoki nga he ka mahia nei e toku iwi, Ko ahau ko te puna o nga wai ora kua mahue i a ratou, haua iho e ratou etahi poka he poka pakaru, e kore nei e mau te wai ki roto.
14
He pononga ranei a Iharaira? he taurereka whakatupu ianei ia? he aha ia i pahuahuatia ai?
15
I ngengere atu nga raiona ki a ia; puta atu ana to ratou tangi, meinga ana e ratou tona whenua kia ururuatia; wera ake ona pa, kahore hoki he tangata hei noho.
16
I pakaru ano hoki tou tumuaki i nga tamariki o Nopo, o Tahapanehe.
17
He teka ianei nau tenei i mahi ki a koe, nau hoki i whakarere a Ihowa tou Atua, i a ia e arahi ana i a koe i te ara?
18
Tena ra, ko te aha mau i te ara ki Ihipa i inu ai koe i nga wai o Hihoro? he aha ranei mau i te ara ki Ahiria, i inu ai koe i nga wai o te awa?
19
Ko to he ano hei riri i tau, ko o tahuritanga ketanga ano hei papaki i a koe. Kia mohio koe, kia kite he kino, he kawa, kei to whakarerenga i a Ihowa i tou Atua, kahore hoki ou wehi ki a au, e ai ta te Ariki ta Ihowa o nga mano.
20
I wahia hoki tou ioka e ahau i mua, motumotuhia ana e ahau ou here, a ki mai ana koe, E kore ahau e poka ke; heoi kei runga koe i nga pukepuke tiketike katoa, kei raro ano i nga rakau kouru nui katoa, e kotiti ke ana, e puremu ana.
21
He waina pai ano koe i taku whakatokanga ai i a koe, he momo i pai katoa. Na te aha ra koe i puta ke ai ki a au, he mea kua heke te tupu, he waina ke?
22
Ahakoa i horoi koe i a koe ki te hora, a nui noa to hopi, e mau ana ano to he ki toku aroaro, e ai ta te Ariki ta Ihowa.
23
He pehea to ki, Kahore oku poke, kihai ahau i whai i a Paarimi? Tirohia iho ou huarahi i te raorao, kia mohio koe ki au mahi. Tou rite, kei te kamera tere, kopikopiko tonu ona huarahi;
24
Kei te kaihe mohoao kua mohio ki te koraha; he hiahia no tona ngakau i hongihongi ai ia ki te hau; i tona wa e kite ai ko wai hei whakahoki atu i a ia? e kore e ngenge tetahi kai rapu i a ia; i tona marama ano ka tutaki ratou ki a ia.
25
Kaiponuhia tou waewae, kei riro te hu, tou korokoro hoki kei mate i te wai. Na, kei te mea mai koe, Kua he: kahore; he tangata ke hoki aku i aroha atu ai, a ko ratou taku e whai atu ai.
26
Ka whakama te tahae ina mau, ka pena ano te whare o Iharaira; ka whakama, ratou ko o ratou kingi, ko o ratou rangatira, ko o ratou tohunga, ko o ratou poropiti,
27
I a ratou e mea na ki te rakau, Ko koe toku pāpā; ki te kamaka, I whanau ahau i roto i a koe, hurihia ake e ratou ko te kohamo ki a au, kahore hoki te aroaro: heoi i te wa e he ai ratou, ka ki mai ratou, Whakatika ki te whakaora i a matou.
28
Kei hea ra ou atua i hangā e koe mou? kia whakatika ratou, ki te mea ka ora koe i a ratou i te wa e he ai koe: rite tonu hoki ki ou pa te maha o ou atua, e Hura.
29
He aha te mea e totohe ai koutou ki a au? kua poka ke te mahi a koutou katoa ki a au, e ai ta Ihowa.
30
Maumau whiu noa ahau i ā koutou tamariki; kihai ratou i anga mai ki te ako: ko ta koutou hoari hei kai i ā koutou poropiti, hei pera ano me ta te raiona kai kino.
31
E te whakatupuranga nei, whakaaroa e koutou te kupu a Ihowa, He koraha ranei ahau ki a Iharaira? he whenua pouri? he aha toku iwi i mea ai, Kei a matou te rangatiratanga, heoi ano o matou taenga atu ki a koe?
32
E wareware ranei te kotiro ki ana whakapaipai, te wahine marena hou ki ana whitiki? taku iwi ia kua wareware ratou ki a au, e kore nga ra e taea te tatau.
33
He aha koe i whakapai ai i tou ara hei rapunga mau i te aroha? Na, kei te whakaako ano koe i nga mea kino ki ou huarahi.
34
Kua kitea ano hoki ki nga remu o ou kakahu te toto o nga wairua, o nga ware hara-kore. Ehara i te rapu puku i kitea ai e ahau, engari i runga i enei katoa.
35
Heoi kei te ki na koe, He hara-kore nei ahau; tera tana riri e tahuri atu i a au. Nana, ka whakawa ahau i a koe, mo to kianga, Kahore oku hara.
36
He aha koe i kopikopiko rawa ai, i mea ai kia pokaia ketia he ara mau? Ka whakama ano koe ki a Ihipa, ka pera ano me koe i whakama ra ki a Ahiria.
37
Ina, ka haere atu ano koe i reira, i runga ano ou ringa i tou mātenga, no te mea kua whakaparahako a Ihowa ki ou whakawhirinakitanga, e kore ano koe e whai wahi i ena.