- 1
- Na, ko te rua o nga putanga o te kupu a Ihowa ki a Heremaia, i a ia ano kua tutakina atu ki roto ki te marae o te whare herehere; i ki ia;
- 2
- Ko te kupu tenei a Ihowa nana nei tena i mahi, a Ihowa nana nei i whakaahua, i pumau ai, ko Ihowa tona ingoa;
- 3
- Karanga mai ki a au, a ka whakao atu ahau ki a koe; he nui, he pakeke nga mea e whakakitea e ahau ki a koe, he mea kihai i mohiotia e koe.
- 4
- No te mea ko te kupu tenei a Ihowa Atua o Iharaira, mo nga whare o tenei pa, mo nga whare ano o nga kingi o Hura ka oti nei te wahi iho e nga puke, e te hoari;
- 5
- E haere mai ana ratou ki te whawhai ki nga Karari, ki te whakaki ano ia i aua wahi ki nga tinana mate o nga tangata i patua e ahau i a au e riri ana, e weriweri ana, o te hunga no ratou nga kino katoa i hunā ai e ahau toku mata ki tenei pa.
- 6
- Nana, ka whakanekehia ake tenei pa e ahau ki te ora, ki te mahu; ka rongoatia hoki ratou e ahau, nui atu hoki te rangimarie me te pono e whakakitea e ahau ki a ratou.
- 7
- Ka whakatahuritia atu ano e ahau te whakaraunga o Hura me te whakaraunga ano o Iharaira, a ka hangā ratou e ahau, koia ano kei to te timatanga.
- 8
- Ka purea ano hoki e ahau to ratou kino katoa i hara ai ratou ki a au, ka murua ano e ahau o ratou kino katoa i hara ai ratou ki a au, i poka ke ai ta ratou mahi ki a au.
- 9
- A hei ingoa koa tenei moku, hei whakamoemititanga, hei kororia, ki ta nga iwi katoa o te whenua e rongo ana ki nga pai katoa e meatia e ahau ki a ratou, a ka wehi ratou, ka wiri i te pai katoa, i te rangimarie katoa, e meatia e ahau ki konei.
- 10
- Ko te kupu tenei a Ihowa, Tera ano ka rangona ki tenei wahi e ki na koutou, Ka ururuatia, kahore he tangata, kahore he kararehe, ki nga pa ano o Hura, ki nga huarahi o Hiruharama e mokemoke nei, tē ai he tangata, tē ai he kai noho, tē ai he kararehe,
- 11
- Te reo koa, te reo hari, te reo o te tane marena hou, te reo o te wahine marena hou, te reo o te hunga e ki ana, Whakawhetai atu ki a Ihowa o nga mano; no te mea e pai ana a Ihowa, e mau tonu ana hoki tana mahi tohu: o te hunga ano e kawe mai ana i nga whakawhetainga ki te whare o Ihowa. No te mea ka whakatahuritia atu e ahau te whakaraunga o te whenua, ka rite ano ki to te timatanga, e ai ta Ihowa.
- 12
- Ko te kupu tenei a Ihowa o nga mano, Tenei wahi kua ururuatia nei, kahore he tangata, kahore he kararehe, ona pa katoa ano hoki, ka nohoia ano e nga hepara e mea ana i nga hipi kia takoto.
- 13
- I nga pa o nga maunga, i nga pa o te mānia, i nga pa o te taha ki te tonga; i te whenua o Peniamine, i nga taha o Hiruharama, i nga pa ano o Hura, ka haere atu ano nga hipi amua i raro i nga ringaringa o te kai tatau, e ai ta Ihowa.
- 14
- Nana, kei te haere mai nga ra, e ai ta Ihowa, e whakamanā ai e ahau te kupu pai i korerotia e ahau mo te whare o Iharaira, mo te whare ano o Hura.
- 15
- I aua rangi ano, i taua wa ano, ka meinga e ahau tetahi manga a Rawiri kia tupu, he mea tika, a ka mahia e ia te whakarite whakawa me te tika ki runga ki te whenua.
- 16
- I aua rangi ka whakaorangia a Hura, ka noho humarie ano hoki a Hiruharama; a ko te ingoa tenei e karangatia ki a ia, Ko Ihowa, ko to tatou tika.
- 17
- No te mea ko te kupu tenei a Ihowa, E kore e whakakorea he tangata ma Rawiri hei noho ki runga ki te torona o te whare o Iharaira.
- 18
- E kore ano e whakakorea atu i toku aroaro he tangata ma nga tohunga, ma nga Riwaiti, hei whakaeke i nga tahunga tinana, hei tahu i nga whakahere toto-kore, hei mahi i te patunga tapu i tena rangi, i tena rangi.
- 19
- A i puta mai ano te kupu a Ihowa ki a Heremaia; i ki ia,
- 20
- Ko te kupu tenei a Ihowa, Ki te taea e koutou te whakataka taku kawenata o te awatea, me taku kawenata ano o te po, a ka kore te ao, te po, i o raua wa e tika ai,
- 21
- Ka whakatakā ano taku kawenata ki taku pononga, ki a Rawiri, a ka kore he tamaiti mana hei kingi ki runga ki tona torona; taku ano ki aku minita, ki nga Riwaiti, ki nga tohunga.
- 22
- E kore nei te ope o te rangi e taea te tatau, e kore ano te onepu o te moana e taea te mehua, ka pena ano taku whakanuinga i nga uri o taku pononga o Rawiri, i nga Riwaiti ano hoki e minita nei ki a au.
- 23
- A i puta mai ano te kupu a Ihowa ki a Heremaia; i mea ia,
- 24
- Kahore ranei koe i mahara ki ta tenei iwi e korero nei, ki ta ratou e mea ra, Nga hapu e rua whiriwhiria ra e Ihowa, kua paopaongia ratou e ia? Na, whakahaweatia iho e ratou toku iwi; i to ratou aroaro kua kore tenei iwi, a ake ake ake.
- 25
- Ko te kupu tenei a Ihowa, Ki te mea kahore aku kawenata ki te ao, ki te po, a ehara nga tikanga o te rangi, o te whenua, i te mea whakatakoto naku;
- 26
- Katahi ka paopaongia e ahau nga uri o Hakopa, raua ko taku pononga ko Rawiri, a, e kore e tangohia mai tetahi o ona uri hei kai whakahaere tikanga mo nga uri o Aperahama, o Ihaka, o Hakopa: ka whakatahuritia atu nei hoki e ahau to ratou whakaraunga, ka tohungia ano hoki ratou e ahau.
Address: 
Phone: 
Email: