- 1
- Te kupu i puta mai ki a Heremaia, he mea na Ihowa, i a Nepukaneha kingi o Papurona ratou ko tana ope katoa, ko nga kingitanga katoa o te whenua, āna i kingi ai ia, me nga iwi katoa, e whawhai ana ki Hiruharama ratou ko ona pa katoa; i mea ia,
- 2
- Ko te kupu tenei a Ihowa Atua o Iharaira, Haere, korero atu ki a Terekia kingi o Hura, mea atu ki a ia, Ko te kupu tenei a Ihowa, Nana, ka hoatu e ahau tenei pa ki te ringaringa o te kingi o Papurona, a ka tahuna e ia ki te ahi.
- 3
- E kore ano koe e mawhiti mai i roto i tona ringa, engari ka mau pu koe, ka tukua atu ano koe ki roto ki tona ringaringa; a ka kite o kanohi i nga kanohi o te kingi o Papurona, ka korero ano hoki tona mangai ki tou mangai, ka tae ano koe ki Papurona.
- 4
- Whakarongo ano hoki ki te kupu a Ihowa, e Terekia kingi o Hura; Ko te kupu tenei a Ihowa mou, E kore koe e mate i te hoari;
- 5
- Engari ka mate koe i runga i te rangimarie. Na, nga tahunga o ou mātua, o nga kingi o mua, i mua ra i a koe, ka pena ano he tahunga mou; ta ratou tangi ano mou, Aue, e te Ariki! naku nei hoki te kupu i korero, e ai ta Ihowa,
- 6
- I korerotia ano e Heremaia poropiti enei kupu katoa ki a Terekia kingi o Hura i Hiruharama,
- 7
- I te mea e whawhai ana te ope o te kingi o Papurona ki Hiruharama, ki nga pa katoa ano hoki o Hura i mahue, ki Rakihi, ki Ateka: ko enei hoki o nga pa o Hura i mahue, he pa taiepa.
- 8
- Te kupu i puta mai ki a Heremaia, he mea na Ihowa, i muri iho i ta Kingi Terekia whakaritenga kawenata ki te hunga katoa i Hiruharama, kia karangatia atu te haere noa ki a ratou;
- 9
- Kia tukua e tenei tangata, e tenei tangata, tana pononga tane, tana pononga wahine, ki te mea he tane no nga Hiperu, he wahine ranei no nga Hiperu, kia haere noa atu; kia kaua tetahi tangata e whakamahi i a ratou, ara, i tona teina, i te Hurai.
- 10
- A, te rongonga o nga rangatira katoa, ratou ko te iwi katoa i uru nei ki te kawenata, kia tukua e tenei tangata, e tenei tangata tana pononga tane, tana pononga wahine kia haere noa atu, kia kaua ratou e whakamahia i muri, na, rongo tonu ratou, a tukua atu ana e ratou.
- 11
- Na, muri iho hoki atu ana ratou, whakahokia mai ana e ratou nga pononga tane, nga pononga wahine i tukua nei e ratou kia haere noa atu, whakataurerekatia iho ratou hei pononga tane, hei pononga wahine.
- 12
- Na, ko te putanga o te kupu a Ihowa ki a Heremaia, he mea na Ihowa; i ki ia,
- 13
- Ko te kupu tenei a Ihowa Atua o Iharaira, I whakaritea e ahau he kawenata ki o koutou mātua i te ra i kawea mai ai ratou e ahau i te whenua o Ihipa, i te whare pononga; i mea ahau,
- 14
- I te mutunga o nga tau e whitu me tuku e koutou tona tuakana, tona teina, ki te mea he Hiperu i hokona ki a koe; na, e ono nga tau i mahi ai ki a koe, ka tukua ia e koe kia haere noa atu i tou taha. Heoi kihai o koutou mātua i whakarongo ki a au, Kihai ano o ratou taringa i anga mai.
- 15
- Na, i tahuri nei koutou i tenei ra, i mahi i te mea e tika ana ki taku titiro atu, i karangatia he haere noa atu e tera tangata, e tera tangata, ki tona hoa, ki tona hoa, i whakaritea ano hoki he kawenata ki toku aroaro i roto i te whare kua karangatia nei toku ingoa ki reira;
- 16
- Heoi hoki ana koutou, whakapokea ana e koutou toku ingoa, whakahokia mai ana e koutou tana pononga tane, tana pononga wahine i tukua ra e koutou kia haere noa atu ki ta ratou i pai ai, whakataurerekatia iho ratou e koutou hei pononga tane, hei pononga wahine ma koutou.
- 17
- Mo reira ko te kupu tenei a Ihowa, Kihai na koutou i whakarongo ki a au, kihai i karanga i te haere noa atu ki tona teina, ki tona tuakana, ki tona hoa, ki tona hoa: nana, ka karangatia e ahau ki a koutou he haere noa atu, e ai ta Ihowa, ma te hoari, ma te mate uruta, ma te hemo-kai, a ka meinga koutou e ahau kia kawea ki nga kingitanga katoa o te whenua.
- 18
- Ka hoatu ano e ahau nga tangata i whakataka nei i taku kawenata, a kihai i whakamana i nga kupu o te kawenata i whakaritea e ratou ki toku aroaro, i a ratou i tapahi i te kuao kau kia rua, a haere ana i te takiwa i ona wahi,
- 19
- Nga rangatira o Hura, nga rangatira o Hiruharama, nga unaka, nga tohunga, me te iwi katoa ano o te whenua i haere nei i te takiwa i nga wahi o te kuao kau;
- 20
- Ka hoatu ano ratou e ahau ki te ringaringa o o ratou hoa riri, ki te ringaringa ano hoki o te hunga e whai ana kia whakamatea ratou, a ka ai o ratou tinana hei kai ma nga manu o te rangi, ma te kararehe ano o te whenua.
- 21
- A ka hoatu ano e ahau a Terekia kingi o Hura, ratou ko ona rangatira, ki te ringaringa o o ratou hoa riri, ki te ringaringa ano o te hunga e whai ana kia whakamatea ratou, ki te ringaringa ano hoki o te ope o te kingi o Papurona i haere atu nei i a koutou.
- 22
- Nana, maku e whakahau atu, e ai ta Ihowa; ka whakahokia mai ano ratou e ahau ki tenei pa, a ka whawhai ratou ki konei, ka horo ano hoki i a ratou, ka tahuna ki te ahi; ka meinga ano hoki e ahau nga pa o Hura kia ururuatia, tē ai he tangata hei noho.
Address: 
Phone: 
Email: