- 1
- A, te rongonga o nga kingi katoa o nga Amori, o era ki te taha ki te hauauru o Horano, me nga kingi katoa hoki o nga Kanaani, o era i te moana, ki ta Ihowa whakamaroketanga i nga wai o Horano i te aroaro o nga tamariki a Iharaira, whiti noa mai matou, na, ngohe noa o ratou ngakau, kahore atu hoki o ratou wairua, i te wehi ki nga tamariki a Iharaira.
- 2
- A, i taua taima ano ka mea a Ihowa ki a Hohua, Hangā etahi maripi kohatu mau, tuaruatia ano hoki te kotinga o nga tamariki a Iharaira.
- 3
- A, hangā ana e Hohua etahi maripi kohatu mana, a kotia iho nga tamariki a Iharaira ki te pukepuke o nga kiri matamata.
- 4
- A, na konei i kokoti ai a Hohua: Ko te hunga katoa i puta mai i Ihipa, ko nga tane, nga tangata hapai patu, i mate ki te ara i te koraha, i to ratou putanga mai i Ihipa.
- 5
- Na, he mea kokoti kau te hunga katoa i puta mai: tena ko te hunga katoa i whanau ki te ara i te koraha i to ratou putanga mai i Ihipa, kihai ena i kotia e ratou.
- 6
- E wha tekau hoki nga tau i haere ai nga tamariki a Iharaira i te koraha, a poto noa te hunga hapai patu katoa i puta mai i Ihipa, mo ratou kihai i whakarongo ki te reo o Ihowa: nga tangata hoki i oati nei a Ihowa ki a ratou, e kore e whakakitea atu e ia te whenua i oati ai a Ihowa ki o ratou matua kia homai e ia ki a tatou, te whenua hoki e rerengia ana e te waiu me te honi.
- 7
- A ko a ratou tamariki i whakaarahia ake e ia hei whakakapi mo ratou, ko ratou i kotia e Hohua: no te mea kahore o ratou kotinga; kahore nei hoki ratou i kotia i te huarahi.
- 8
- Ano ka poto katoa nga tangata te kokoti e ratou, na, ka noho ratou ki te puni ki tona wahi ki tona wahi, a, mahu noa.
- 9
- Na, ka mea a Ihowa ki a Hohua, No tenei ra i hurihia atu ai e ahau te taunutanga o Ihipa i a koutou. No reira i huaina ai te ingoa o taua wahi ko Kirikara, a tae noa ki tenei ra.
- 10
- A i noho nga tamariki a Iharaira ki Kirikara, i whakarite i te kapenga i te tekau ma wha o nga ra o te marama i te ahiahi, i nga mānia o Heriko.
- 11
- A, no te aonga ake i te kapenga i kai ai ratou i te witi o te whenua, he keke kihai i rewenatia, me te witi pahuhu, no taua rangi pu ano.
- 12
- A no te aonga ake o te ra i kai ai ratou i te witi o te whenua, ka whakamutua te mana; kahore atu hoki he mana ma nga tamariki a Iharaira; heoti, kai ana ratou i nga hua o te whenua, o Kanaana i taua tau ano.
- 13
- A i a Hohua i Heriko, na, ka anga ake ona kanohi, ka titiro atu, na ko tetahi tangata e tu mai ana i tona aroaro, ko tana hoari hoki i tona ringa, unu rawa: Na, ka haere atu a Hohua ki a ia, ka mea ki a ia, No matou ranei koe, no o matou hoa riri ranei?
- 14
- A ka mea mai ia, Kahore; engari he rangatira mo te ope a Ihowa ahau i haere mai nei. Na, ka hinga tapapa iho a Hohua ki te whenua ka koropiko atu, ka mea ki a ia, E pehea mai ana toku ariki ki tana pononga?
- 15
- A ka mea mai te rangatira o te ope a Ihowa ki a Hohua, Wetekina atu tou hu i tou waewae; e tapu ana hoki te wahi e tu na koe. A peratia ana e Hohua.
Address: 
Phone: 
Email: