- 1
- Taukiri e, kua pouriuri te koura! kua puta ke te koura para-kore, te koura pai! kua ringitia nga kohatu o te wahi tapu ki te ahunga mai o nga huarahi katoa.
- 2
- Nga tamariki a Hiona, nga mea papai, i rite nei ki te koura para-kore, taukiri e, kua kīa ratou he hāka oneone, he mea hanga na nga ringa o te kai pokepoke.
- 3
- Nga tohora nei, e tukua ana te u e ratou, e whakangotea ana e ratou a ratou kuao: te tamahine a toku iwi, he nanakia, kua rite ki nga moa o te koraha.
- 4
- Te arero o te tamaiti ngote u, piri tonu ki tona ngao i te mate-wai, e tono ana nga kohungahunga ki te taro ma ratou, kahore he tangata hei wawahi atu ma ratou.
- 5
- Te hunga i kai i nga mea papai, kei te noho kau noa iho ratou i nga ara: te hunga he kakahu ngangana nei o ratou i a ratou e whakatupuria ana, kei te awhi ratou i nga puranga paru.
- 6
- Te whiu o te he o te tamahine a toku iwi nui atu i to te hara o Horoma i hurihia i mua, he mea pa whakarere, kihai ano hoki tetahi ringaringa kia u iho ki a ia.
- 7
- Ona Natari i mua pai atu i te hukarere te poke-kore, ma atu i te waiu, whewhero ake o ratou tinana i nga rupi, he hapaira ratou kua oti te whakaahua.
- 8
- Inaianei mangu iho to ratou kanohi i te ngarahu; e kore e mohiotia i nga huarahi, piri tonu o ratou kiri ki o ratou wheua, kua maroke, kua rite ki te rakau.
- 9
- Te hunga i patua e te hoari pai ake to ratou i to te hunga i patua e te hemo-kai; no te mea ka honia noatia enei, ka werohia putia e te kore o nga hua o te mara.
- 10
- Nga wahine, te hunga aroha, kei te kohua o ratou ringa i ā ratou tamariki: hei kai era ma ratou i te wawahanga o te tamahine a toku iwi.
- 11
- Kua whakapaua atu e Ihowa tana weriweri, kua ringitia mai e ia tana riri nui; kua ka te ahi ki Hiona, pau tonu ake ona turanga.
- 12
- Kihai i whakapono mai nga kingi o te whenua, ratou ko nga tangata katoa o te ao, kua tae te hoa riri, te hoa whawhai, ki nga kuwaha o Hiruharama.
- 13
- He hara no ona poropiti, he hē no ona tohunga i whakaheke nei i nga toto o te hunga tika ki waenganui ona;
- 14
- I kopikopiko ai ratou ano he matapo i nga huarahi; kua poke ratou i te tutu, tē pa atu ai nga tangata ki o ratou kakahu.
- 15
- I karanga ratou ki a ratou; Haere atu, e poke ana; haere atu, haere atu, kei pa atu. I to ratou whatinga, i a ratou e atiutiu noa atu ana, i ki nga tangata i roto i nga tauiwi, Kahore he nohoanga iho mo ratou i muri nei.
- 16
- Kua wehewehea ratou e te riri a Ihowa: e kore ia e titiro ki a ratou i muri nei: kihai ratou i whakaaro ki nga kanohi o nga tohunga, kihai i manako ki nga kaumatua.
- 17
- I a tatou ano i te ora, matawaia ana o tatou kanohi ki te awhina mo tatou, he mea teka kau ia, i ta tatou tirohanga atu i tirohia atu e tatou he iwi e kore e whakaora.
- 18
- E whaia ana e ratou o tatou hikoinga, tē haere ai tatou i o tatou waharoa: kua tata to tatou whakamutunga, kua rite o tatou ra; no te mea kua tae mai to tatou whakamutunga.
- 19
- Nui atu te tere o o tatou kai whai i to nga ekara o te rangi: i arumia tatou e ratou i runga i nga maunga; i whanga mai ano ratou ki a tatou i te koraha.
- 20
- Te manawa o o tatou pongaponga, ta Ihowa i whakawahi ai, kua mau ki roto ki ā ratou rua, ta tatou i ki ra, Ma tona taumurumarunga iho ka ora ai tatou i roto i nga tauiwi.
- 21
- Kia hari, kia koa, e te tamahine a Eroma e noho na i te whenua o Uhu; ka tae atu ano te kapa ki a koe; ka haurangi koe, ka whakarere ano koe i o kakahu.
- 22
- Kua rite te whiu mo to he, e te tamahine a Hiona; heoi ano tana whakaraunga atu i a koe: Ka whiua e ia to he, e te tamahine a Eroma, ka hurahia ano e ia o hara.
Address: 
Phone: 
Email: