- 1
- Kia mahara, e Ihowa, ki te mea kua pa mai nei ki a matou: tirohia mai, kia kite ai koe i to matou ingoa kino.
- 2
- Kua riro to matou wahi tupu i nga tangata ke, o matou whare i nga tautangata.
- 3
- He pani matou, kahore he matua, he pouara o matou whaea.
- 4
- Na te moni matou i inu ai i te wai; a matou wahie he mea hoko.
- 5
- E whakatupuria kinotia ana o matou kaki; e mauiui ana matou, kahore he tānga manawa mo matou.
- 6
- Kua hoatu o matou ringaringa ki nga Ihipiana, ki nga Ahiriana, kia makona ai matou i te taro.
- 7
- I hara o matou mātua, a kua kore; kei te pikau nei matou i o ratou he.
- 8
- O matou rangatira ko nga pononga; kahore he kai whakaora mo matou i roto i o ratou ringaringa.
- 9
- Tata tonu matou ki te mate ina tiki taro ma matou, i te hoari hoki i te koraha.
- 10
- Ka tonu o matou kiri me te mea he oumu i te akinga ano a to hemo-kai.
- 11
- Taea ana e ratou nga wahine o Hiona, nga wahina i nga pa o Hura.
- 12
- Nga rangatira taronatia ake e o ratou ringaringa; kihai nga kanohi o nga kaumatua i whakahonoretia.
- 13
- Kua tangohia nei e ratou nga taitamariki hei huri; hinga ana nga tamariki i nga pikaunga wahie.
- 14
- Nga kaumatua i nga kuwaha kua kore, me te waiata ano a nga taitamariki.
- 15
- Kua mutu te koa o o matou ngakau, kua puta ke to matou kanikani hei tangihanga.
- 16
- Kua taka te karauna o to matou māhunga; aue, te mate mo matou! kua hara hoki matou.
- 17
- Na reira whakaruhi noa iho o matou ngakau, na reira pouriuri ana o matou kanohi.
- 18
- Na te maunga hoki o Hiona kua ururuatia nei, e haerererea nei e nga pokiha.
- 19
- Tūturu tonu to noho, e Ihowa; to torona kei tera whakatupuranga, kei tera whakatupuranga.
- 20
- He aha koe i wareware tonu ai ki a matou? he aha koe i whakarere ai i a matou, a roa noa iho nga ra?
- 21
- Whakatahuritia atu matou ki a koe, e Ihowa, a ka tahuri matou: whakahoutia o matou ra, kia rite ki o mua.
- 22
- E tino whakakahore rawa oti koe ki a matou? e nui noa atu ranei to riri ki a matou?
Address: 
Phone: 
Email: