- 1
- A i korero ano a Ihowa ki a Mohi, i mea,
- 2
- Korero atu ki te whakaminenga katoa o nga tamariki a Iharaira, mea atu ki a ratou, Kia tapu koutou: e tapu ana hoki ahau a Ihowa to koutou Atua.
- 3
- Me wehi koutou ia tangata ia tangata ki tona whaea, ki tona papa, kia mau hoki ki aku hapati: ko Ihowa ahau ko to koutou Atua.
- 4
- Kei tahuri koutou ki nga whakapakoko, kei whakarewaina hoki etahi atua ma koutou: ko Ihowa ahau ko to koutou Atua.
- 5
- Ki te whakaherea ano hoki e koutou he patunga whakamarietanga ki a Ihowa, hei te patunga e manakohia ai koutou.
- 6
- Me kai i te rangi ano i whakaherea ai, i te aonga ake ano hoki: a ki te toe tetahi wahi ki te toru o nga ra, me tahu ki te ahi.
- 7
- Ki te kainga hoki tetahi wahi i te toru o nga ra, ka whakariharihangia; e kore e manakohia.
- 8
- A ka wahā o ratou hara e nga tangata katoa i kainga ai, no te mea kua whakanoatia te mea tapu a Ihowa; a ka hatepea atu taua tangata i roto i tona iwi.
- 9
- Ka kotia ano hoki e koutou nga hua o to koutou whenua, kaua e kotia rawatia nga kokonga o te mara, kaua ano hoki e hamua nga toenga o o hua.
- 10
- Kaua hoki e hamua to mara waina, kaua ano e kohia nga karepe katoa o to mara waina; me waiho ma te rawa-kore raua ko te tangata iwi ke: ko Ihowa ahau ko to koutou Atua.
- 11
- Kaua koutou e tahae, kaua hoki e teka, kaua ano hoki e horihori tetahi ki tetahi.
- 12
- Kei oatitia tekatia hoki toku ingoa, kaua ano hoki e whakanoatia te ingoa o tou Atua: ko Ihowa ahau.
- 13
- Kaua e tukinotia tou hoa, kaua ano hoki e pahuatia: kaua nga utu o te kai mahi e takoto tonu ki a koe i te po, a tae noa ki te ata.
- 14
- Kaua e kangā te turi, kaua ano hoki e makā he whakatutuki ki te aroaro o te matapo, engari me wehi ki tou Atua: ko Ihowa ahau.
- 15
- Kei whakahaere he koutou ina whakarite whakawa; kaua e whakaaro ki te kanohi o te rawakore, kaua hoki e whakahonoretia te kanohi o te nui: me whakarite whakawa koe mo tou hoa i runga i te tika.
- 16
- Kaua e kopikopiko i roto i tou iwi ngautuara ai: kaua ano hoki e tu kia whakahekea te toto o tou hoa: ko Ihowa ahau.
- 17
- Kei kino koe ki tou teina i roto i tou ngakau: riria marietia tou hoa, kaua e waiho he hara i runga i a ia.
- 18
- Kaua e rapu utu, kaua hoki e maharahara ki nga tamariki a tou iwi; engari arohaina tou hoa ano ko koe: ko Ihowa ahau.
- 19
- Kia mau ki aku tikanga. Kaua e whakatupuria he uri mo au kararehe ki tera atu tu kararehe: kaua e whakauruurua nga purapura e whakatongia e koe ki to mara: kaua ano hoki e meatia ki a koe he kakahu ko tetahi wahi he rinena ko tetahi he huruhuru.
- 20
- Ki te takoto puremu hoki tetahi ki te wahine pononga kua oti te taumau ma te tane, ki te mea kihai i utua i whakahokia, kihai ano hoki i tukua kia haere noa atu; ka whuia te wahine; e kore raua e whakamatea, no te mea kihai ia i tukua kia haere noa atu.
- 21
- A me kawe mai e te tane tana whakahere mo te he ki a Ihowa, ki te whatitoka o te tapenakara o te whakaminenga, he hipi toa hei whakahere mo te he.
- 22
- A ka mea whakamarietanga te tohunga mona ki te hipi toa, ki te whakahere mo te he, ki te aroaro o Ihowa, mo tona hara i hara ai ia; a ka murua tona hara i hara ai ia.
- 23
- E tae hoki koutou ki te whenua, a ka whakatongia e koutou nga rakau kai katoa; na me waiho nga hua hei mea kokoti-kore, kia toru nga tau e waiho ai e koutou hei mea kokoti-kore: e kore e kainga.
- 24
- I te wha ia o nga tau ka tapu nga hua katoa o reira, hei whakamoemititanga ki a Ihowa.
- 25
- Engari i te rima o nga tau me kai e koutou nga hua o reira, a ka maha ake ona hua ma koutou: ko Ihowa ahau, ko to koutou Atua.
- 26
- Kaua e kinakitia nga toto ki tetahi mea hei kai: kaua ano hoki e rapu tikanga i nga tohu, i nga kapua.
- 27
- Kaua e whakaporotakatia nga taha o o koutou mahunga, kaua ano hoki e whakaahuatia kinotia nga taha o tou pahau.
- 28
- Kaua e haea o koutou kikokiko mo te tupapaku, kaua ano hoki e taia he tohu ki a koutou: ko Ihowa ahau.
- 29
- Kaua e whakanoatia to tamahine, e meinga hei wahine puremu; kei riro te whenua i te puremu, a ka ki te whenua i te kino.
- 30
- Kia mau ki aku hapati, kia hopohopo hoki ki taku wahi tapu: ko Ihowa ahau.
- 31
- Kaua e whakaaro atu ki nga waka atua, kaua ano hoki e whai atu ki nga mata maori, whakapokea ai e ratou: ko Ihowa ahau ko to koutou Atua.
- 32
- Me whakatika ake koe i te aroaro o te mātenga hina, me whakahonore hoki te mata o te koroheke, me wehi ano hoki ki tou Atua: ko Ihowa ahau.
- 33
- Ki te noho hoki te tangata iwi ke ki a koe ki tou whenua, kaua koutou e whakatetetete ki a ia.
- 34
- Ki ta koutou kia rite ki tetahi o o koutou tangata whenua te manene e noho ana i a koutou, arohaina ia ano ko koe; he manene hoki koutou i mua i te whenua o Ihipa: ko Ihowa ahau ko to koutou Atua.
- 35
- Kei he ta koutou whakahaere ina whakarite i te whakawa, i te ruri ranei, i te pauna-taimaha ranei, i te mehua ranei.
- 36
- Kia tika a koutou pauna, kia tika nga whakataimaha, kia tika te epa, kia tika hoki te hine: ko Ihowa ahau ko to koutou Atua, nana nei koutou i whakaputa mai i te whenua o Ihipa.
- 37
- Mo reira kia mau ki aku tikanga katoa, me aku whakariteritenga katoa, mahia ano hoki: ko Ihowa ahau.