- 1
- Na, nui atu te karanga a te iwi, ratou ko a ratou wahine, he whakahe mo o ratou tuakana, teina, mo nga Hurai.
- 2
- I reira hoki etahi e mea ana, Ko matou, ko a matou tamariki, me a matou tamahine, he tokomaha, a, hokoa ana e matou he witi, kia kai ai matou, kia ora ai.
- 3
- I reira hoki etahi e ki ana, Kua waiho o matou whenua, a matou māra waina, o matou whare hei taunaha, kia riro mai ai he witi mo te mate-kai.
- 4
- Me etahi hoki e ki ana, Kua riro mai he moni tarewa i a matou hei takoha ma te kingi; ko o matou whenua, ko o matou māra waina te tarewatanga.
- 5
- Na, rite tonu o matou kikokiko ki nga kikokiko o o matou tuakana; rite tonu a matou tamariki ki a ratou tamariki: nana, e whakaponongatia ana e matou a matou tamariki me a matou tamahine hei pononga, kua oti ano hoki etahi o a matou tamahine te mea hei pononga, kahore hoki a matou mea hei whakahoki mai i a ratou; no te mea kei nga tangata ke o matou whenua, a matou māra waina.
- 6
- Na, nui atu taku riri i taku rongonga ai i ta ratou karanga, i enei kupu.
- 7
- Na, ka whakaaroaroa e toku ngakau i roto i a au, a ka riria e ahau nga rangatira me nga tangata rarahi; i ki atu hoki ahau ki a ratou, E tangohia ana e koutou he moni whakatuputupu i tona teina, i tona teina. Na, nui atu taku huihui hei whakahe mo ratou.
- 8
- I mea ano ahau ki a ratou, Kua poto ta matou hei whakahoki mai i o tatou teina i nga Hurai, kua oti nei te hoko ki nga tauiwi, a ka hokona atu ano ranei e koutou o koutou tuakana, teina? ka hokona ranei ratou ki a tatou? Heoi whakarongo kau ana ratou, kihai hoki i kitea he kupu ma ratou.
- 9
- I mea ano ahau, Ehara tena i te mea pai e meatia na e koutou; kaua ianei koutou e haere i runga i te wehi ki to tatou Atua? kaua ranei e whakaaro ki te tawainga mai a o tatou hoa riri, a nga tauiwi?
- 10
- Na, ahau, oku teina, me aku tangata, e tika ano me i tangohia e matou he hiriwa, he witi, i a ratou. Tena ra, kia whakarerea atu e tatou tenei mahi tango i te moni whakatuputupu.
- 11
- Tena, whakahokia atu ki a ratou i tenei ra nei ano o ratou whenua, a ratou māra waina, māra oriwa, me o ratou whare, me te wahi whakarau o te moni, o te witi, o te waina, o te hinu, e tangohia nei e koutou i a ratou.
- 12
- Na, ko ta ratou kianga mai, Me whakahoki atu ano e matou, e kore ano hoki e tonoa atu e matou: ka rite ta matou e mea ai ki tau i ki mai na. Katahi ka karangatia e ahau nga tohunga, a ka meinga ratou e ahau kia oati, ka rite ki tenei kupu ta ratou e mea ai.
- 13
- I ruperupea ano e ahau te uma o toku, me taku ki atu ano, Te tangata e kore e whakamana i tenei kupu, kia penei ta Ihowa ruperupenga i a ia i roto i tona whare, i tona mauiui; kia rite ano ia ki tenei, te ruperupe, te takoto kau. A ka ki mai te huihui katoa, Amine, ka whakamoemiti atu ano ratou ki a Ihowa. Na, pera tonu te mahi a te iwi katoa.
- 14
- No te ra ano hoki i kiia mai ai ahau hei kawana mo ratou ki te whenua o Hura, no te rua tekau o nga tau, a tae noa ki te toru tekau ma rua o nga tau o Kingi Arataherehe, kotahi tekau ma rua nga tau, kahore ahau, oku teina ranei, i kai i te taro kawana.
- 15
- Na, nga kawana o mua, era i mua i a au, he taimaha to ratou ki te iwi: i tangohia hoki e ratou he taro, he waina, i a ratou, me etahi hekere hiriwa e wha tekau; i whakatupu rangatira ano hoki a ratou tangata ki te iwi, kihai ia ahau i pera, i wehi hoki ki te Atua.
- 16
- I uaua tonu ano hoki ahau ki te mahi i tenei taiepa, kihai hoki matou i hoko whenua mo matou; i huihuia atu ano hoki aku tangata katoa ki reira ki te mahi.
- 17
- Kotahi rau e rima tekau ano hoki i taku tepu, no nga Hurai, no nga rangatira, me era atu ano hoki i haere mai nei ki a matou i roto i nga iwi i tetahi taha o matou, i tetahi taha.
- 18
- Na, nga mea i takā maku i te ra kotahi, kotahi puru, e ono nga hipi, he mea pai: i takā ano hoki etahi manu maku, a ka tekau nga ra, na, ko nga tu waina katoa, tona nui. Na, ahakoa ko tenei katoa, kihai ahau i mea ki te taro kawana; he taimaha rawa hoki te mahi a tenei iwi.
- 19
- Kia mahara mai ki a au, e toku Atua, mo te pai, kia rite ki aku mea katoa i mea ai ahau ki tenei iwi.
Address: 
Phone: 
Email: