- 1
- Te maramara kai, te mea maroke, a, tona kinaki ko te ata noho, engari tera i te whare e ki ana i nga patunga tapu e kinakitia ana ki te ngangare.
- 2
- Hei rangatira te pononga mahara mo te tamaiti i puta mai ai te whakama; ka wehea mai ano e ia tetahi wahi mona i roto i ta nga teina.
- 3
- Ko te oko tahu para mo te hiriwa, ko te oumu mo te koura; ko Ihowa ia hei whakamatau mo nga ngakau.
- 4
- E whakarongo ana te kai mahi i te he ki te ngutu kino; e whai taringa mai ana te tangata korero teka ki te arero kino.
- 5
- Te tangata e taunu ana ki te rawa-kore e tawai ana ki tona kai hanga: te tangata e koa ana ki nga aitua, e kore ia e whakaharakoretia.
- 6
- Hei karauna mo nga koroheke nga tamariki a nga tamariki: na, te kororia o nga tamariki ko o ratou mātua.
- 7
- E kore te ngutu korero nui e tau ki te kuare: hore rawa ano hoki te ngutu teka ki te rangatira.
- 8
- Te tangata i te mea homai noa mai, he kohatu whakapaipai tera ki tana titiro iho; te tahuritanga ake ki te aha ranei, ki te aha ranei, ka mana.
- 9
- Te tangata e hipoki ana i te he e whai ana i te aroha; na, te kai kawe korero e wehewehea ana e ia nga hoa tupu.
- 10
- Te ngotonga o te kupu riri ki roto ki te tangata matau, nui atu i to nga whiu kotahi rau ki roto ki te whakaaro-kore.
- 11
- He whakakeke kau ta te tangata kino e whai ai; na, he nanakia te karere e tukua ki a ia.
- 12
- Kia tutaki ki te tangata te pea kua tangohia nei ana kuao; pai atu i te whakaaro-kore i a ia e wairangi ana.
- 13
- Te tangata e homai ana i te kino hei utu mo te pai, e kore te kino e neke atu i tona whare.
- 14
- Te timatanga o te totohe, ano he tangata e tuku ana i te wai kia rere. Na, whakarerea atu te ngangare i te mea kahore ano koe kia uru noa.
- 15
- Te kai whakatikatika i te tangata kino, te kai whakahe i te tangata tika, he mea whakarihariha ki a Ihowa raua e rua.
- 16
- Hei aha te utu i te ringa o te whakaaro-kore hei hoko i te whakaaro nui, kahore nei hoki ona ngakau?
- 17
- E aroha ana te hoa i nga wa katoa; na, te teina, te tuakana, i whanau tera hei mea mo nga matenga.
- 18
- Ta te tangata ngakau-kore he papaki ringaringa; kua waiho hei whakakapi turanga i te aroaro o tona hoa.
- 19
- He aroha ki te kino to te tangata e aroha ana ki te ngangare; te tangata e whakaneke ake ana i tona kuwaha e rapu ana i te whakangaromanga.
- 20
- Te ngakau parori ke, e kore e kite i te pai; te tangata he whanoke tona arero, ka taka ki te kino.
- 21
- I whanau he whakaaro-kore ma tetahi tangata, hei whakapouri tera mona: e kore ano hoki e koa te pāpā o te poauau.
- 22
- He pai nga hanga o te ngakau koa, koia ano kei te rongoa; ki te maru te wairua, ka maroke nga wheua.
- 23
- E tangohia ana te moni whakapati e te tangata kino i roto i te uma, he mea kia whakariroia ketia ai e ia nga ara o te whakarite whakawa.
- 24
- Kei mua nga whakaaro nui i te tangata matau, kei nga pito ia o te whenua nga kanohi o te whakaaro-kore.
- 25
- Hei whakapouri mo tona pāpā te tamaiti whakaaro-kore, hei whakakawa ngakau ano hoki ki tona whaea.
- 26
- Ehara ano hoki i te mea pai kia whiua te tangata tika, kia patua ranei nga rangatira mo te tika.
- 27
- Te tangata kua whiwhi ki te matauranga ka kaiponuhia e ia ana kupu; he pai rawa ano hoki te wairua o te tangata matau.
- 28
- Te wairangi nei ano, ki te whakarongo puku, ka kiia he tangata whakaaro nui: te tangata ngutu kokopi ka kiia he tangata matau.
Address: 
Phone: 
Email: