- 1
- Engari te ingoa pai e whiriwhiria rawatia i nga taonga nui, me te manakohanga pai i te hiriwa, i te koura.
- 2
- Te tangata taonga me te rawa-kore tutaki ana raua ki a raua: ko Ihowa te kai hanga o ratou katoa.
- 3
- Te tangata tupato, ka kitea atu e ia te he, a piri ana: nga kuare, haere tonu atu, mamae tonu atu.
- 4
- To te mahaki, to te wehi ki a Ihowa, he taonga, he honore, he ora.
- 5
- He tataramoa, he mahanga kei te huarahi o te whanoke: ki te tiaki te tangata i tona wairua, ka matara atu ia i enei.
- 6
- Whakatupuria ake te tamaiti i te ara e haere ai ia, a ka kaumatua, e kore e mahue i a ia.
- 7
- Hei kai whakatakoto tikanga te tangata taonga mo nga rawa-kore; te tangata hoki i te nama hei pononga ia ma te tangata nana i whakatarewa mai.
- 8
- Te kai rui o te kino, ka kotia e ia te he, ka kahore noa iho ano hoki te patu o tana riri.
- 9
- Te kanohi ohaoha, ka manaakitia tera; e hoatu ana hoki e ia tetahi wahi o tana taro ma te rawa-kore.
- 10
- Peia atu te tangata whakahi, a ka riro te ngangare, ka mutu ano hoki te totohe me te whakahawea.
- 11
- Te tangata ko tana e matenui ai ko te ngakau kia ma, hei hoa te kingi mona; he ahuareka hoki no ona ngutu.
- 12
- E tiakina ana te matauranga e nga kanohi o Ihowa, e whakatakā ana hoki e ia nga kupu a te poka ke.
- 13
- He raiona kei waho, e ai ta te mangere, ka whakamatea ahau ki waenganui i nga huarahi.
- 14
- He poka hohonu te mangai o te wahine ke, ta Ihowa tangata e riri ai ka taka ki roto.
- 15
- Paihere rawa te wairangi i roto i te ngakau o te tamaiti: ma te rakau whiu e matara atu ai i a ia.
- 16
- Te tangata e tukino ana i te rawa-kore, he mea kia maha ai he mea mana, te tangata ano e hoatu mea ana ki te tangata taonga, ko te rawa-kore kau mo raua.
- 17
- Anga mai to taringa, whakarongo hoki ki nga kupu a te hunga whakaaro nui, kia tahuri mai hoki te ngakau ki toku matauranga.
- 18
- Ka ahuareka hoki, ki te puritia e koe i roto i tou kopu, ka pai ano hoki ma ou ngutu.
- 19
- He mea tenei, kia okioki atu ai koe ki a Ihowa; whakakitea atu ana e ahau ki a koe i tenei ra, ki a koe na ano.
- 20
- He teka ianei hira rawa nga mea kua tuhituhia atu nei e ahau ki a koe, he kupu ako, he kupu mohio,
- 21
- Kia mohio ai koe ki te tika o nga kupu o te pono, kia whakahokia ai e koe he kupu pono ki te hunga e ngare ana i a koe?
- 22
- Kaua e pahuatia te rawa-kore, he whakaaro hoki nau ki tona rawa-kore; kaua hoki e whakatupuria kinotia te tangata iti ki te kuwaha.
- 23
- No te mea ka tohea e Ihowa ta ratou tohe, ka pahuatia ano hoki e ia te wairua o te hunga e pahua ana i a ratou.
- 24
- Kei waiho koe hei hoa mo te tangata riri, kaua hoki korua ko te tangata aritarita e haere tahi;
- 25
- Kei akona e koe ona ara, a ka riro mai i a koe he mahanga mo tou wairua.
- 26
- Kei uru koe ki roto ki nga kai papaki ringa, ki nga kai whakakapi turanga mo te moni tarewa.
- 27
- Ki te kahore au mea hei utu, hei aha i tangohia ai to moenga i raro i a koe?
- 28
- Kaua e whakanekehia atu te rohe tawhito i whakatakotoria e ou mātua.
- 29
- Kua kitea ranei e koe he tangata e uaua ana ki tana mahi. Ka tu ia ki te aroaro o nga kingi: e kore ia e tu ki te aroaro o nga ware.
Address: 
Phone: 
Email: