- 1
- Kei hae atu koe ki te hunga kino, kei hiahia ano koe kia waiho hei hoa mo ratou.
- 2
- No te mea he whakangaromanga ta to ratou ngakau e whakaaro ai, he mahi nanakia ta o ratou ngutu e korero ai.
- 3
- Ma te whakaaro nui ka hangā ai te whare, ma te matauranga ano hoki ka u ai.
- 4
- Ma te mohiotanga ano hoki ka ki ai nga ruma i nga taonga utu nui katoa, i nga mea ahuareka.
- 5
- He kaha te tangata whakaaro nui, he whakanui kaha ta te tangata mohio.
- 6
- Kia ata whakaaroa marietia ano hoki, ka anga ai koe ki tau whawhai; kei te tokomaha ano hoki o nga kai whakatakoto whakaaro te oranga.
- 7
- Tiketike rawa atu te whakaaro nui i te wairangi, e kore tona mangai e kuihi i te kuwaha.
- 8
- Te tangata e whakaaro ana ki te kino, ka karangatia ia he whanoke.
- 9
- He hara te whakaaroaronga ki te mea wairangi, he mea whakarihariha ano ki te tangata te tangata whakahi.
- 10
- Ki te ngoi-kore koe i te ra o te he, he iti tou kaha.
- 11
- Ki te kore koe e pai ki te whakaora i te hunga e kawea ana kia whakamatea, i te hunga ano e meatia ana kia patua;
- 12
- Ki te mea koe, Nana, kihai i mohiotia e matou; e kore ianei te kai pauna ngakau e whakaaro? Te kai tiaki o te wairua, e kore ranei ia e mohio? E kore ranei e homai e ia ki te tangata nga mea e rite ana ki tona mahi?
- 13
- Kainga, e taku tamaiti, te honi, he mea pai hoki; me nga mea ano e maturuturu ana, he mea reka nei hoki ki to mangai;
- 14
- Ka pena ano hoki ki tou wairua te matauranga o te whakaaro nui: ki te mea ka kitea e koe, he tukunga iho ano hoki tona, e kore ano hoki tau i tumanako atu ai e hatepea atu.
- 15
- Kei whanga atu, e te tangata kino, ki te nohoanga o te tangata tika, kei tukino koe ki tona takotoranga.
- 16
- Ahakoa e whitu hinganga o te tangata tika, ka ara ano, ka taka atu ia te hunga kino ki te he.
- 17
- Ki te hinga tou hoa riri kei koa koe, kei whakamanamana ano hoki tou ngakau ina taka ia:
- 18
- Kei kite a Ihowa, a ka he ki tana titiro iho, a ka tahuri atu tana riri i a ia.
- 19
- Kei mamae atu koe ki te hunga he, kei hae ano hoki ki te hunga kino.
- 20
- Kahore hoki he mutunga pai o ta te he; ka keto te rama a te hunga kino.
- 21
- E wehi koe, e taku tamaiti, ki a Ihowa, ki te kingi; kaua hoki e uru ki roto ki te hunga e mea ana ki te whakaputa ke.
- 22
- No te mea ka puta tata te aitua mo ratou; ko wai hoki ka mohio ki te whakangaromanga o raua tokorua?
- 23
- He mea ano hoki enei ma te hunga whakaaro nui. E hara i te mea pai kia whakaaro ki te kanohi tangata i te mea ka whakarite whakawa.
- 24
- Te tangata e mea ana ki te tangata kino, He tika koe; ka kanga nga iwi ki a ia, ka whakarihariha nga tauiwi ki a ia.
- 25
- He ngakau koa ia to te hunga e riria ai tona he, ka tae iho ano hoki te manaakitanga pai ki runga ki a ratou.
- 26
- Ka kihitia nga ngutu o te tangata e whakahoki mai ana i nga kupu tika.
- 27
- Kia takoto pai to mahi i waho, kia rite ano hoki hei meatanga mau i te mara; muri iho ka hangā e koe to whare.
- 28
- Kei riro koe hei kai whakaatu hē mo tou hoa, i te mea kahore he take; kei tinihanga ou ngutu.
- 29
- Kei mea koe, Ka meatia ano e ahau ki a ia tana i mea ai ki a au: ka rite ki ta te tangata mahi taku e whakahoki atu ai ki a ia.
- 30
- I haere ahau i te taha o te mara a te mangere, i te taha ano o te mara waina o te tangata kahore ona ngakau.
- 31
- Na, kua tupuria katoatia e te tataramoa, kapi tonu taua mara i te ongaonga, tona taiepa kohatu kua oti te wahi.
- 32
- Katahi ahau ka titiro, ka anga atu toku ngakau, ka matakitaki atu, a ka riro mai he kupu ako moku.
- 33
- Kia iti ake nei te wahi e parangia ai, kia iti ake nei te moe, kia iti ake te awhinga o nga ringaringa i a koe e takoto na.
- 34
- Na ka rite ki te tangata e haere ana te putanga mai o te muhore ki a koe; tou rawa-kore ano he tangata he patu nei tana.
Address: 
Phone: 
Email: