- 1
- Whakarongo, e nga tamariki, ki te whakaako a te matua, tahuri mai hoki kia matauria ai nga whakaaro mohio.
- 2
- He pai hoki te kupu mohio ka hoatu nei e ahau ki a koutou, kaua taku ture e whakarerea.
- 3
- Ko te tamaiti hoki ahau a toku pāpā, he ngawari, he mea matenui na toku whaea.
- 4
- I whakaako ano ia i a au, i mea mai ki a au, Kia puritia aku kupu e tou ngakau; kia mau ki aku whakahau, a, e ora koe.
- 5
- Tau taonga e mea ai mau ko te whakaaro nui; tau e mea ai mau ko te matauranga; kaua e wareware; kaua hoki e neke atu i nga kupu a toku mangai.
- 6
- Kaua e whakarerea, a mana koe e tiaki; arohaina, a mana koe e mau ai.
- 7
- Te tino mea, ko te whakaaro nui; tau e mea ai mau ko te whakaaro nui: a i o whiwhinga katoatanga, kia whiwhi koe ki te matauranga.
- 8
- Whakanuia e koe, a mana koe ka kake ai; ka whakahonore ia i a koe ki te awhitia ia e koe.
- 9
- Ka homai e ia he whakapaipai ataahua ki tou mahunga, ka potaea ano koe e ia ki te karauna honore.
- 10
- Whakarongo, e taku tamaiti, maharatia aku kupu, a he maha nga tau e ora ai koe.
- 11
- He mea whakaako koe naku ki te ara o te whakaaro nui; he mea arahi koe naku i nga ara tika.
- 12
- Ka haere koe, e kore ou takahanga e whakakikītia mai; ki te rere koe, e kore koe e tūtuki.
- 13
- Kia mau ki te ako, kaua e tukua atu; matapoporetia iho, ko tou oranga hoki ia.
- 14
- Kaua e haere i te ara o te hunga kino, kaua hoki e takahia te huarahi o te hunga he.
- 15
- Anga ke atu, kaua e tika na reira; peka atu i taua ara, haere tonu atu.
- 16
- E kore hoki ratou e moe, ki te kore e oti tetahi mahi hē ma ratou; riro rawa to ratou moe, ki te kahore tetahi tangata e hinga i a ratou.
- 17
- No te kino hoki te taro e kainga ana e ratou, no te nanakia te waina e inumia ana e ratou.
- 18
- Te huarahi ia o te hunga tika, koia ano kei te māramatanga e whiti ana, neke tonu ake tona māramatanga, a taea noatia te tino ra.
- 19
- Te ara o te hunga kino, rite tonu ki te pouri; e kore ratou e mohio ki te mea i tūtuki ai o ratou waewae.
- 20
- E taku tamaiti, tahuri mai ki aku kupu; anga mai to taringa ki aku korero.
- 21
- Kei kotiti ke atu enei i ou kanohi; puritia i waenganui o tou ngakau.
- 22
- He oranga enei mo te hunga i kitea ai, he rongoa mo o ratou kikokiko katoa.
- 23
- Kia pau ou mahara ki te tiaki i tou ngakau; no reira hoki nga putanga mai o te ora.
- 24
- Whakarerea atu te mangai whanoke, kia matara atu ano hoki i a koe nga ngutu tutu.
- 25
- Kia hangai tonu atu te titiro a ou kanohi; kia titiro atu ou kamo ki mua i a koe.
- 26
- Ata whakaaroa te huarahi o ou waewae, kia u ano hoki ou ara katoa.
- 27
- Kaua e peka atu ki matau, ki maui; kia anga atu tou waewae i te kino.
Address: 
Phone: 
Email: