Proverbs Chapter 5 - Paipera Tapu 1868 | Te Paipera Tapu 1868

Proverbs Chapter 5 - Paipera Tapu 1868

1
E taku tamaiti, tahuri mai ki aku whakaaro nui, kia anga mai tou taringa ki toku matauranga.
2
Kia u ai koe ki te ngarahu pai, kia mau ai te matauranga i ou ngutu.
3
Nga ngutu hoki o te wahine he, koia ano kei te maturuturunga iho o te honikoma, ngawari iho tona mangai i te hinu.
4
He kawa rawa hoki tona whakamutunga i te womawori, he koi, ano he hoari matarua.
5
Ona waewae e heke atu ana ki te mate, mau pu te reinga i ona takahanga.
6
He mea tana kei whakaaroa e koe te huarahi ki te ora, he kotiti ke ona ara, tē mohiotia e koe.
7
Na, whakarongo mai, e nga tamariki, ki a au, kei mahue nga kupu a toku mangai.
8
Kia matara atu tou ara i a ia, kaua hoki e whakatata atu ki te tatau o tona whare.
9
Kei hoatu e koe tou honore ki nga tangata ke, ou tau ki te hunga nanakia.
10
Kei makona nga tangata ke i tou kaha, kei riro o mauiwi ki te whare o te tangata ke;
11
A ka tangi koe i te whakamutunga, ina poto ou kikokiko me tou tinana.
12
A ka mea, Katae taku kino ki te ako; katae te whakahawea o toku ngakau ki te tohutohu!
13
Kihai hoki ahau i whakarongo ki te reo o oku kai whakaako, kihai toku taringa i anga ki te hunga e tohutohu ana i a au.
14
Wahi iti kei nga kino katoa ahau i waenganui o te whakaminenga o te huihui.
15
Inumia he wai i roto i tou rua ake, me nga wai ano e rere ana i roto i tou poka.
16
Kia tohatoha noa atu o puna wai, nga awa wai i nga huarahi.
17
Kia motuhia mai ano hoki ko āu anake, kaua ano nga tangata ke e waiho hei hoa mou.
18
Kia manaakitia to puna wai: kia koa ano koe ki te wahine o to taitamarikitanga.
19
Kia rite ia ki taua mea ahuareka ki te hāta, ki te mea ataahua ki te anaterope; kia makona koe i ona u i nga wa katoa, kia matenuitia tonutia e koe tona aroha.
20
He aha hoki koe i matenui ai, e taku tamaiti, ki tetahi atu wahine? i awhi ai i te uma o te wahine ke?
21
Kei mua hoki i nga kanohi o Ihowa nga ara o te tangata, a e whakaaroa ana e ia ona haerenga katoa.
22
Ko ona kino ano hei hopu i te tangata kino, hei taura ona hara e mau ai ia.
23
Ka mate ia, he mea kihai i whakaakona, ka pohehe ano hoki i te nui o tona wairangi.