- 1
- (He himene na Rawiri.) No Ihowa te whenua, me ona tini mea, te ao, me nga tangata e noho ana i runga.
- 2
- He mea whakatu hoki nana ki runga ki nga moana, he mea whakau ki runga ki nga roma.
- 3
- Ko wai e eke ki runga ki te maunga o Ihowa? ko wai ranei e tu ki tona wahi tapu?
- 4
- Ko te tangata e ma ana nga ringaringa, e hara-kore ana tona ngakau, kahore nei i ara ake tona wairua ki te horihori, kahore ano hoki i oati teka.
- 5
- Ka riro mai i a ia te manaakitanga a Ihowa, me te tika a te Atua o tona whakaoranga.
- 6
- Ko te whakatupuranga tenei o te hunga e rapu ana ki a ia, e rapu nei i to mata, e Hakopa. Hera.
- 7
- Kia ara ake o koutou mātenga, e nga tatau, kia whakaarahia ake ano hoki koutou, e nga tatau onamata; a ka tomo atu te Kingi o te kororia.
- 8
- Ko wai tenei Kingi kororia? ko Ihowa ko te kaha, ko te marohirohi, ko Ihowa ko te marohirohi ki te whawhai.
- 9
- Kia ara ake o koutou mātenga, e nga tatau, kia whakaarahia ake ano hoki koutou, e nga tatau onamata, a ka tomo atu te Kingi o te kororia.
- 10
- Ko wai tenei Kingi kororia? ko Ihowa o nga mano, ko ia te Kingi kororia. Hera.
Address: 
Phone: 
Email: