- 1
- I kite ano ahau i tetahi anahera e heke iho ana i te rangi, kei a ia te ki o te poka torere me tetahi mekameka nui i tona ringaringa.
- 2
- Na, ka mau ia ki te tarakona, ki te nakahi onamata, ko ia nei te Rewera, ko Hatana hoki, a herehere ana i a ia kotahi mano nga tau;
- 3
- Na, makā ana ia e ia ki te poka torere uakina atu ana, whakapiri rawa te hiri ki runga ki a ia, kei whakapohehe ia i nga tauiwi i muri iho, kia taka ra ano nga tau kotahi mano: a muri iho i enei mea me wewete ia he taima iti kau ia.
- 4
- I kite ano ahau i nga torona, a e noho ana ratou i runga, i hoatu ano hoki te whakarite whakawa ki a ratou: ko nga wairua hoki tera o te hunga i poutoa mo te whakaaturanga i a Ihu, mo te kupu hoki a te Atua, te hunga kahore i te koropiko ki te kararehe, ki tona whakapakoko ranei, kihai hoki i meatia iho te tohu ki o ratou rae, ki o ratou ringaringa hoki; na, ka ora ratou ka kingi tahi me te Karaiti kotahi mano nga tau.
- 5
- A kihai i ora ake te toenga o nga tupapaku, a taka noa nga tau kotahi mano. Ko te aranga tuatahi tenei.
- 6
- Hari tonu tapu tonu te tangata ka whiwhi nei ki te aranga tuatahi: e kore te matenga tuarua e whai mana ki a ratou, engari hei tohunga ratou ma te Atua ma te Karaiti hoki, a kotahi mano nga tau e kingi tahi ai ratou me ia.
- 7
- Ano ka pahemo nga tau kotahi mano, ka wetekina a Hatana i roto i tona whare herehere,
- 8
- A ka haere atu ia ki te whakapohehe i nga tauiwi i nga pito e wha o te whenua, i a Koka raua ko Makoka, e huihui ai ratou ki te taua: te tokomaha o ratou rite tonu ki te onepu o to moana.
- 9
- Na, haere atu ana ratou ki te whanui o te whenua, karapotia ana e ratou te nohoanga o te hunga tapu, me te pa e arohaina ana: na, ko te heketanga iho o te kapura i te Atua i te rangi, pau ake ratou.
- 10
- Na, te Rewera i whakapohehe nei i a ratou, pangā ana ia ki te roto kapura whanariki, ki te wahi kei reira nei te kararehe me te poropiti teka, a ka whakamamaetia ratou i te ao i te po, ake ake ake.
- 11
- A i kite ano ahau i tetahi torona nui he mea ma, i tetahi hoki e noho ana i runga, rere ana te whenua me te rangi i tona kanohi; kahore hoki i kitea he wahi mo raua.
- 12
- I kite ano ahau i te hunga mate, i te hunga ririki, i te hunga nui, e tu ana i te aroaro o te Atua; na, kua whakatuwheratia nga pukapuka: kua whakatuwheratia ano hoki tetahi atu pukapuka, ara to te oranga: a kei nga mea i tuhituhia ki aua pukapuka he whakaritenga whakawa mo te hunga mate, he mea whakarite tonu ki a ratou mahi.
- 13
- I tukua mai ano e te moana te hunga mate i roto i a ia; i tukua mai ano e te mate e te po te hunga mate i roto i a raua: na, ka whakaritea te whakawa mo tetahi mo tetahi, he mea whakarite ki a ratou mahi.
- 14
- Na, ka pangā te mate me te po ki te roto ahi. Ko te tuarua tenei o nga mate.
- 15
- A te tangata kihai i kitea kua oti te tuhituhi ki te pukapuka o te ora, i pangā ia ki te roto ahi.
Address: 
Phone: 
Email: