- 1
- Na, ka tika nei tatou i te whakapono, ka mau ta tatou rongo ki te Atua, he mea na to tatou Ariki na Ihu Karaiti:
- 2
- Nāna hoki te whakatatanga mai ma tatou, i runga i te whakapono ki tenei aroha noa e tu nei tatou, a whakamanamana ana tatou, i te mea ka tumanako atu nei ki te kororia o te Atua.
- 3
- Ehara hoki i te mea ko tera anake, engari e whakamanamana ana ano tatou ki nga mamae: e mohio ana hoki tatou, ko ta te mamae e mahi ai he manawanui;
- 4
- Ta te manawanui he matauranga; ta te matauranga he tumanako:
- 5
- E kore ano hoki e whakama i a tatou e tumanako nei: kua ringihia hoki te aroha o te Atua ki o tatou ngakau e te Wairua Tapu kua homai nei ki a tatou.
- 6
- I a tatou hoki e ngoikore ana, i te wa i rite ai, ka mate a te Karaiti mo te hunga karakia kore.
- 7
- E mate whakauaua hoki tetahi mo te tangata tika: tera pea ia tetahi e maia ki te mate mo te tangata pai.
- 8
- Heoi e whakakitea nuitia ana e te Atua tona aroha ki a tatou, i a tatou hoki e hara ana, ka mate a te Karaiti mo tatou.
- 9
- Na, tera noa ake he whakaoranga mo tatou e ia i te riri, i a tatou ka tika nei i ona toto.
- 10
- I te mea hoki he hoa whawhai tatou, ka houhia ta tatou rongo ki te Atua, i runga i te matenga o tana Tama, na, ka mau nei te rongo, tera noa ake he whakaoranga mo tatou, i a ia kua ora nei.
- 11
- A, ehara i te mea ko tera anake, engari e whakamanamana ana ano tatou ki te Atua, he mea na to tatou Ariki na Ihu Karaiti, nana nei tenei houhanga rongo i a tatou.
- 12
- Na, ka rite ki te putanga mai o te hara ki te ao, he mea na te tangata kotahi, me te mate ano i runga i te hara, a horapa atu ana te mate ki nga tāngata katoa, no te mea kua hara katoa:
- 13
- (I te ao nei hoki te hara, a taea noatia te ture: otira e kore e whakairia te hara i te mea kahore he ture.
- 14
- Ahakoa ra he mana kingi ano to te mate no Arama iho ano taea noatia a Mohi, ki te hunga ano hoki kihai nei i rite to ratou hara ki to Arama pokanga ketanga, he ahua nei hoki ia no tenei i tāria atu nei.
- 15
- Otira kihai i rite ki te hara te mea i homai noa mai. Na te hara nei hoki o te kotahi mate ki te hunga tokomaha, whaihoki, tera noa atu te huanga ki te tokomaha o to te Atua aroha noa, o te mea homai hoki i runga o te aroha noa o te tangata kotahi, o Ihu Karaiti.
- 16
- Kihai ano hoki i rite te mea i homai ki te mea i puta mai i te kotahi i hara nei: no te kotahi hoki te whakahe hei whakamate, no nga hara maha ia te mea i homai noa mai hei whakatika.
- 17
- Na te hara nei hoki o te kotahi i kingi ai te mate, he mea na te tangata kotahi; whaihoki tera noa ake he kingitanga i runga i te ora mo te hunga ka riro mai nei i a ratou te aroha noa e hua tonu nei, me te tika i homai noa nei, he mea na te kotahi na Ihu Karaiti.)
- 18
- Ae ra, na te hara kotahi i puta mai ai ki nga tāngata katoa te kupu whakamate; whaihoki na te tika kotahi te mea homai noa ki nga tāngata katoa, e tika ai e ora ai.
- 19
- E rite ana hoki ki te tangata kotahi i tutū nei, a whai hara iho te hunga tokomaha, whaihoki ka ngohengohe nei te kotahi, ka whai tika te hunga tokomaha.
- 20
- I puta mai ano hoki te ture kia nui ai te hara. Heoi i te hara e nui noa ana, kua hua noa ake te aroha noa:
- 21
- Na, ko te hara te kingi i mua, a he mate tona tukunga iho; whaihoki hei kingi ano te aroha noa i runga o te tika, he oranga tonutanga te tukunga iho, he mea hoki na Ihu Karaiti na to tatou Ariki.
Address: 
Phone: 
Email: