- 1
- Na Paora, na te pononga a te Atua, na te apotoro a Ihu Karaiti, i runga i te whakapono o te hunga whiriwhiri a te Atua, i te whakaaetanga atu ano hoki ki ta te pono e rite ai te karakia;
- 2
- I runga ano i te tumanakohanga atu ki te ora tonu, i whakaaria mai nei i mua atu o te ao e te Atua e kore nei e teka;
- 3
- Nāna nei ano i whakakite mai tana kupu i ona wa ake ano, i te kauwhautanga nei, i tukua mai ki ahau, he mea whakarite mai na te Atua na to tatou Kai whakaora;
- 4
- Ki a Taituha, ki taku tamaiti pono i runga i ta tatou whakapono tahi: Kia tau te aroha noa, te mahi tohu, te rangimarie, he mea na te Atua Matua, na te Ariki hoki na Ihu Karaiti, na to tatou Kai whakaora.
- 5
- Ko te mea tenei i waiho ai koe e ahau ki Kariti, kia whakatikaia ai e koe nga mea i mahue, kia whakaritea ano hoki he kaumatua ki ia pa ki ia pa, kia pera ai me taku i whakatakoto atu ai ki a koe:
- 6
- Ki te mea he tangata kahore e ekengia e te korero, he tahu no te wahine kotahi, he tamariki whakapono āna, kahore e korerotia to ratou toreretanga ki te kino, kahore e tutū.
- 7
- Te tikanga hoki mo te pihopa kia kaua e ekengia e te kupu, kia rite ki ta te Atua tuari; ehara i te mea tohe ki tana ake, kahore ona aritarita, kahore ana kakai waina, kahore ana papatu, kahore e whai i tē taonga hē;
- 8
- Engari e atawhai ana i te manuhiri, e aroha ana ki nga tāngata pai, e whai whakaaro ana, e tika ana, e tapu ana, e pēhi ana i ona hiahia;
- 9
- E u ana te pupuri i te kupu pono i whakaakona atu na, kia taea ai e ia, i te mea ka tika nei tana whakaako, te whakahauhau, te turaki ano i ta te hunga e totohe mai ana.
- 10
- He tokomaha hoki te hunga tutū, korero teka noa, tinihanga, nui atu ia to te hunga o te kotinga:
- 11
- Me mea kia kūtia o ratou waha; riro pu hoki etahi whare te whakaputa ke e ratou, e whakaako ana i nga mea e kore e tika, he whakaaro hoki ki te taonga hē.
- 12
- I mea tetahi o ratou, he poropiti no ratou ake, He teka tonu ta nga Kariti, he kararehe kino, he kopu mangere.
- 13
- Ka pono tenei korero. Na, kia koi to kupu riri ki a ratou; kia ora ai to ratou whakapono;
- 14
- Kei tahuri hoki ratou ki nga kupu tito a nga Hurai, ki nga ture a nga tāngata e whakaputa ke atu ana i te pono.
- 15
- E ma ana nga mea katoa ki te hunga ma: tena ki te hunga poke, kahore nei o ratou whakapono, kahore he mea ma; heoi he mea poke o ratou whakaaro o ratou hinengaro.
- 16
- Ki ta ratou ki kua mātau ratou ki te Atua; heoi ko a ratou mahi hei whakakahore ki a ia, he hunga whakarihariha ratou, he hunga tutū, e kore ano e tikangatia mo tetahi mahi pai.
Address: 
Phone: 
Email: