- 1
- Na, i te wha o nga tau o Kingi Tariuha ka puta mai te kupu a Ihowa ki a Hakaraia i te wha o nga ra o te marama, ara, o Kihereu;
- 2
- I te mea kua ungā atu a Heretere raua ko Rekeme-mereke, me a raua tangata ano, ki te whare o te Atua, ki te inoi i te aroaro o Ihowa,
- 3
- Hei korero ano ki nga tohunga i te whare o Ihowa o nga mano, ratou ko nga poropiti, hei mea atu, Me tangi ranei ahau i te rima o nga marama, me whakamotuhake ahau i a au, me pera ranei me taku i mea ai i enei tau ka maha?
- 4
- Na, ka puta mai te kupu a Ihowa o nga mano ki a au, i mea ia,
- 5
- Korero atu ki nga tangata katoa o te whenua, ratou ko nga tohunga, mea atu, I a koutou i noho puku ra, i tangi, i te rima, i te whitu o nga marama, i enei tau e whitu tekau, he noho puku ranei ta koutou ki a au? ki a au koia?
- 6
- I a koutou i kai, i inu ra, he teka ianei ma koutou ano ta koutou i kai ai, i inu ai?
- 7
- Ehara ianei enei i nga kupu i karangatia mai e Ihowa, i era i whakapuakina mai e nga poropiti o mua, i te mea e nohoia ana a Hiruharama, a i runga ano i te pai, me nga pa ano i tetahi taha ona, i tetahi taha; i te mea ano e nohoia ana te taha ki te tonga raua ko te mānia?
- 8
- I puta mai ano te kupu a Ihowa ki a Hakaraia, i mea,
- 9
- Ko te kupu tenei a Ihowa o nga mano, e mea ana, Kia pono te whakarite o te whakawa, kia puta te aroha me te tohu tangata ki tona tuakana, ki tona teina.
- 10
- Kaua ano e tukinotia te pouaru, te pani, te manene, te ware; kaua ano hoki e whakaaroa he kino i roto i o koutou ngakau ki tona tuakana, ki tona teina.
- 11
- Heoi kihai ratou i pai ki te whakarongo, whakahokia atu ana e ratou te pokohiwi, o ratou taringa whakapuhoitia iho e ratou, kei rongo ratou.
- 12
- Kua meinga e ratou o ratou ngakau kia rite ki te raimona, he mea kei rongo ratou ki te ture, ki nga kupu ano hoki i ungā atu e Ihowa o nga mano, he mea na tona wairua i whakapuakina atu e nga poropiti o mua; puta atu ai he riri nui i a Ihowa o nga mano.
- 13
- Na, i tana karangatanga atu kihai ratou i whakarongo, waihoki i ta ratou karangatanga kihai ahau i whakarongo, e ai ta Ihowa o nga mano:
- 14
- A, aia atu ana ratou e taku paroro ki nga iwi katoa kihai i mohiotia e ratou, ururua iho te whenua i muri i a ratou, tē haerea, tē hokia; na ratou hoki i mea te whenua ahuareka kia ururuatia.
Address: 
Phone: 
Email: