Zechariah Chapter 6 - Paipera Tapu 1868 | Te Paipera Tapu 1868

Zechariah Chapter 6 - Paipera Tapu 1868

1
Na, ka tahuri ahau, a ka anga ake oku kanohi: taku tirohanga, na, e wha nga hariata e puta mai ana i te takiwa i nga maunga e rua, na, nga maunga he maunga parahi.
2
I te hariata tuatahi he whero nga hoiho; a i te hariata tuarua he mangu nga hoiho;
3
I te toru o nga hariata he ma nga hoiho, a i te wha o nga hariata he kotingotingo, he pakaka, nga hoiho.
4
Katahi ahau ka oho atu, a ka mea atu ki te anahera i korero ki a au, He aha enei, e toku ariki?
5
Na, ka whakahoki mai te anahera, a ka mea ki a au, Ko nga wairua e wha enei o te rangi, e haere atu ana i te tu i te aroaro o te Ariki o te whenua katoa.
6
Nga hoiho mangu na, e haere atu ana ratou ki te whenua ki te nota, ka haere atu ano nga mea ma i muri i a ratou; e haere atu ana hoki nga mea kotingotingo ki te whenua ki te tonga.
7
I haere atu ano nga mea pakaka, i whai kia haereere, kia kopikopiko i te whenua: i mea ano ia, Haere koutou, kopikopiko i te whenua. Na, kei te kopikopiko ratou i te whenua.
8
Katahi tera ka karanga mai ki a au, a ka korero ki a au, ka mea, Titiro, enei kua puta atu nei ki te whenua ki te nota kua marie i a ratou toku wairua i te whenua ki te nota.
9
I puta mai ano te kupu a Ihowa ki a au, i mea,
10
Tangohia ta nga whakarau, tera i a Hererai, i a Topia, i a Ieraia, i era i haere mai i Papurona, haere mai ano koe i taua rangi ano, haere ki te whare o Hohia tama a Tepania;
11
Me tiki ano e koe te hiriwa me te koura, ka hanga i etahi karauna, potaea tonutia atu ki runga ki te māhunga o te tino tohunga, o Hohua tama a Iohereke;
12
Me ki atu ano e koe ki a ia, me korero atu, Ko te kupu tenei a Ihowa o nga mano, e ki ana, Nana, te tangata ko tona ingoa nei ko te MANGA, ka tupu ake ano ia i tona wahi, a mana e hanga te temepara o Ihowa.
13
Mana ano e hanga te temepara o Ihowa, ki runga ano hoki i a ia te kororia; ka noho ano hoki ia, ka whakahaere tikanga i runga i tona torona; hei tohunga ano ia i runga i tona torona; he whakaaro ano hoki mo te rongo mau ta raua.
14
Ka ai ano hoki nga karauna hei whakamaharatanga ki a Hereme ratou ko Topia, ko Ieraia, ko Hene tama a Tepania, i roto i te temepara o Ihowa.
15
Ka haere mai ano te hunga i tawhiti, ka hanga i tetahi wahi o te temepara o Ihowa, a ka mohio koutou na Ihowa o nga mano ahau i unga mai ki a koutou. E puta mai ano tenei, ki te ata whakarongo koutou ki te reo o Ihowa o to koutou Atua.