- 1
- Ko te hunga ano tenei i haere mai ki a Rawiri ki Tikiraka, i a ia ano e putiki tonu ana i roto i te pa i te wehi o Haora tama a Kihi. No nga marohirohi ano hoki ratou, hei tuara mona ki te whawhai.
- 2
- He hunga kukume kopere ratou; ko te maui, ko te matau, ki te kotaha kohatu, ki te kopere pere i te kopere; no nga teina ano o Haora, no Peniamine.
- 3
- Ko Apietere hei upoko, na, ko Ioaha; he tamariki raua na Hemaa Kipeati; ko Ietiere, ko Perete, he tama na Atamawete; ko Peraka, ko Iehu Anatoti,
- 4
- Ko Ihimaia Kipeoni, he marohirohi ia i roto i te toru tekau, he rangatira ano no te toru tekau; ko Heremaia, ko Tahatiere, ko Iohanana, ko Iohapara Kererati,
- 5
- Ko Erutai, ko Terimoto, ko Pearia, ko Hemaria, ko Hepatia Harupi,
- 6
- Ko Erekana, ko Ihiia, ko Atareere, ko Toetere, ko Iahopeama; he Korahi ratou,
- 7
- Ko Toera, ko Teparia, he tamariki na Ierohama o Keroro.
- 8
- A, i maunu mai ki a Rawiri etahi o nga Kari ki te pourewa ki te koraha, he hunga marohirohi, e pai ana mo te whawhai, he hunga hapai i te whakangungu rakau, i te tao: o ratou kanohi me te mea he kanohi raiona, rite tonu ratou ki nga aneterope i runga i nga maunga te tere.
- 9
- Te tuatahi, ko Etere. Te tuarua, ko Oparia. Te tuatoru, ko Eriapa.
- 10
- Te tuawha, ko Mihimana. Te tuarima, ko Heremaia,
- 11
- Te tuaono, ko Atai. Te tuawhitu, ko Eriere,
- 12
- Te tuawaru, ko Iohanana. Te tuaiwa, ko Eretapara,
- 13
- Te tekau, ko Heremaia. Te tekau ma tahi, ko Makapanai.
- 14
- No roto enei i nga tamariki a Kara, he rangatira no te ope: kotahi o nga mea nohinohi hei rangatira mo te rau; a, ko te mea nui hei rangatira mo te mano.
- 15
- Ko te hunga tenei i whiti nei i Horano i te marama tuatahi, i te mea kua ngawha ki runga i ona pareparenga katoa, a, whati ana i a ratou te hunga katoa o nga raorao, ki te taha ki te rawhiti, ki te taha ki te hauauru.
- 16
- I haere mai ano etahi o nga tamariki a Peniamine me etahi o a Hura ki te pourewa ki a Rawiri.
- 17
- Na, ka puta atu a Rawiri ki te whakatau i a ratou, a ka oho atu, ka mea atu ki a ratou, Ki te mea he haere pai mai ta koutou ki a au, he whakauru, ka kotahi tonu o tatou ngakau. Tena ko tenei he tinihanga, he tuku i a au ki oku hoa riri, i te mea kahore nei he tutu a oku ringa, ma te Atua o o tatou mātua e titiro mai, e riri.
- 18
- Na, kua tau te wairua ki a Amahai; ko ia nei te tino rangatira. A ka ki atu ia, Kei a koe matou, e Rawiri, hei hoa ano mou, e te tama a Hehe. Kia mau, kia mau te rongo ki a koe; kia mau ano hoki ki o whakauru; ko tou Atua hoki hei whakauru mou. Na, kua riro mai ratou i a Rawiri, a, meinga ana ratou e ia hei rangatira rangapu.
- 19
- I papahoro mai ano hoki etahi o Manahe ki a Rawiri, i tona haerenga mai i roto i nga Pirihitini ki te whawhai ki a Haora; kihai ia ratou i meinga hei hoa mo ratou: i tonoa atu na hoki ia e nga rangatira o nga Pirihitini i ta ratou whakatakotoranga whakaaro i a ratou i mea ra, Ma o tatou upoko e whai haerenga atu ai ia ki tona ariki ki a Haora,
- 20
- I tona haerenga ki Tikiraka, ka papahoro mai ki a ia o Manahe, ko Arana, ko Iotapara, ko Teriaere, ko Mikaera, ko Iotapara, ko Erihu, ko Tiritai, he rangatira no nga mano i Manahe.
- 21
- Ko ratou nga whakauru mo Rawiri ki te whawhai ki nga torohe; he marohirohi hoki, he toa ratou katoa, he rangatira ope ano hoki.
- 22
- I haere mai hoki ratou i taua wa ki a Rawiri i tena ra, i tena ra, hei whakauru mona, no kua nui te ope, ano he ope Atua.
- 23
- Ko te tokomahatanga tenei o nga rangatira, he hunga i rite rawa mo te whawhai, a, haere mai ana ki a Rawiri ki Heperona hei whakariro mai i te kingitanga o Haora ki a ia; kia rite ai ki ta Ihowa kupu.
- 24
- Nga tamariki a Hura, he hunga hapai i te whakangungu rakau, i te tao, e ono mano e waru rau, rite rawa i te patu mo te whawhai.
- 25
- O nga tamariki a Himeona, he hunga marohirohi, he toa mo te whawhai, e whitu mano kotahi rau.
- 26
- O nga tamariki a Riwai, e wha mano e ono rau.
- 27
- Na, ko Iehoiara te rangatira o nga Aroni; e toru mano e whitu rau ona hoa.
- 28
- Me Haroko ano, he taitamariki marohirohi, he toa, ratou ko te whare o tona pāpā, e rua tekau ma rua nga rangatira.
- 29
- Na, o nga tamariki a Peniamine o nga teina o Haora, e toru nga mano; ko te tokomahatanga hoki o ratou hei kai tiaki mo te whare o Haora, a taea noatia taua ra.
- 30
- Na, o nga tamariki a Eperaima, e rua tekau mano e waru rau, he marohirohi, he toa, he hunga whai ingoa i roto i te whare o o ratou mātua.
- 31
- O tetahi tānga o te iwi o Manahe, kotahi tekau ma waru nga mano, he mea whakahua tonu o ratou ingoa, hei haere mai ki te whakakingi i a Rawiri.
- 32
- A, o nga tamariki a Ihakara, he hunga mohio ki nga wa, i mohio ai ki nga mahi ma Iharaira, e rua rau o ratou ariki; kei o enei mangai ano he tikanga ma o ratou teina.
- 33
- O Hepuruna, te hunga haere ki te whawhai, he mohio ki te tatauranga, e mau ana i nga mea katoa mo te whawhai, e rima tekau nga mano, he hunga e tika tonu ana te rarangi, kahore nei o ratou ngakau rua.
- 34
- A, o Napatari, kotahi mano nga rangatira, a e toru tekau ma whitu nga mano o ratou hoa, rite rawa i te whakangungu rakau, i te tao.
- 35
- Na, o nga Rani, he hunga mohio ki te tatauranga, e rua tekau ma waru nga mano e ono nga rau.
- 36
- A, o Ahera he hunga haere ki te whawhai, he mohio ki te tatauranga, e wha tekau nga mano.
- 37
- Na, o tera taha o Horano, o nga Reupeni, o nga, Kari, o tetahi tānga o te hapu o Manahe, e mau ana i nga mea whawhai katoa mo te tatauranga, kotahi rau e rua tekau nga mano.
- 38
- Enei tangata whawhai katoa, i tika tonu nei te rarangi, tapatahi tonu te ngakau i haere mai ai ratou ki Heperona ki te mea i a Rawiri hei kingi mo Iharaira katoa. Na, era atu katoa o Iharaira, kotahi tonu te ngakau mo te whakakingi i a Rawiri.
- 39
- Na, i reira ratou i a Rawiri, e toru nga ra e kai ana, e inu ana, he mea taka hoki na o ratou tuakana, teina.
- 40
- Na, te hunga tata ki a ratou, tae noa ki a Ihakara, ki a Hepuruna, ki a Napatari, i kawea mai ano e ratou he taro i runga i nga kaihe, i nga kamera, i nga muera, i nga kau, he kai, he paraoa; etahi papa piki, etahi tautau karape, he waina, he hinu, he kau, he hipi, tona tini; he koa hoki no Iharaira.
Address: 
Phone: 
Email: