- 1
- Na Paora, i karangatia nei hei Apotoro ma Ihu Karaiti, ta te Atua hoki i pai ai, na te teina ano hoki na Hotene,
- 2
- Ki ta te Atua hahi e noho ana i Koriniti, ki te hunga kua oti te whakatapu i roto i a Karaiti Ihu, kua karangatia hei hunga tapu, ratou ko te hunga katoa i nga wahi katoa e karanga ana ki te ingoa o Ihu Karaiti o to tatou Ariki, to ratou to tatou:
- 3
- Kia tau ki a koutou te aroha noa, me te rangimarie, he mea na te Atua na to tatou Matua, na te Ariki hoki na Ihu Karaiti.
- 4
- He whakawhetai tonu taku ki toku Atua mo koutou, mo te aroha noa a te Atua kua homai nei ki a koutou i roto i a Karaiti Ihu;
- 5
- No te mea kua hua nga mea katoa, nga korero katoa, nga matauranga katoa, ma koutou i roto i a ia;
- 6
- Me te whakaaturanga na hoki i a te Karaiti kua u na i roto i a koutou.
- 7
- I kore ai koutou e hapa i tetahi homaitanga; i a koutou e tatari na ki te whakakitenga mai o to tatou Ariki o Ihu Karaiti:
- 8
- Māna ano hoki koutou e whakau taea noatia te mutunga, he hunga e kore e ekengia e te kupu i te ra o to tatou Ariki o Ihu Karaiti:
- 9
- Pono tonu te Atua, nāna nei koutou i karanga kia uru tahi ki tana Tama ki a Ihu Karaiti ki to tatou Ariki.
- 10
- He tohe tenei naku ki a koutou, e aku teina, i runga i te ingoa o to tatou Ariki o Ihu Karaiti, kia kotahi ano ta koutou katoa korero, kia kaua he wehewehenga i roto i a koutou; engari kia tino tika koutou, kia kotahi te ngakau, kia kotahi te whakaaro.
- 11
- Kua oti hoki koutou, e aku teina, te korero ki a au e te hunga o te whare o Koroi, he whawhai ena kei roto i a koutou.
- 12
- Ko taku kupu ano tenei, Ko te ki tenei a tetahi a tetahi o koutou, Ko ahau no Paora; Ko ahau no Aporo; Ko ahau no Kipa; Ko ahau no te Karaiti.
- 13
- Kua oti koia a te Karaiti te wahi? i ripekatia ranei a Paora mo koutou? i iriiria ranei koutou ki runga ki te ingoa o Paora?
- 14
- E whakawhetai ana tenei ahau ki te Atua, no te mea kihai ahau i iriiri i tetahi o koutou, ko Kirihipu anake raua ko Kaiu;
- 15
- Kei mea tetahi i iriiri ahau i runga i toku ingoa.
- 16
- I iriiri ano hoki ahau i nga tāngata o te whare o Tepana: kahore hoki ahau e mahara ki taku iriiringa i tetahi atu.
- 17
- Kihai hoki ahau i tonoa e te Karaiti ki te iriiri, engari ki te kauwhau i te rongo pai: ehara i te mea i runga i te mohiotanga ki te korero, kei whakakahoretia te ripeka o te Karaiti.
- 18
- Ki te hunga hoki e whakangaromia ana he mea kuare te korero o te ripeka; ki a tatou ia e whakaorangia nei ko te kaha o te Atua.
- 19
- Ka oti hoki te tuhituhi, Ka ngaro i a au te whakaaro nui o te hunga whakaaro, ka kore hoki i a au te matauranga o te hunga mātau.
- 20
- Kei hea te tangata whakaaro? kei hea te Karaipi? kei hea te tangata tohe o tenei ao? kahore ano koia i whakakuaretia e te Atua te whakaaro nui o tenei ao?
- 21
- I te mea hoki i runga i o te Atua whakaaro nui, kihai nga whakaaro nui o te ao i mātau ki te Atua, na, ka pai te Atua kia meinga te kuaretanga o te kupu kauwhau hei whakaora i te hunga e whakapono ana.
- 22
- Ta nga Hurai nei hoki he tono tohu, ta nga Kariki he rapu whakaaro nui:
- 23
- Ta matou ia he kauwhau i a te Karaiti kua oti nei te ripeka, he tūtukitanga waewae ki nga Hurai, he mea kuare ki nga Kariki;
- 24
- Ki te hunga ia e karangatia ana, ki nga Hurai, ki nga Kariki, ko te Karaiti ko te kaha o te Atua, ko ta te Atua whakaaro mohio.
- 25
- No te mea hoki he kuaretanga no te Atua, nui atu i nga tāngata te mohio; he ngoikoretanga no te Atua, kaha atu i nga tāngata.
- 26
- Ka kite nei hoki koutou, e aku teina, i to koutou karangatanga, ehara i te mea he tokomaha te hunga whakaaro o te wahi ki te kikokiko e karangatia ana, ehara i te mea he tokomaha te hunga nunui, ehara i te mea he tokomaha nga rangatira:
- 27
- Engari i whiriwhiria e te Atua nga mea kuare o te ao, hei mea e whakama ai te hunga whakaaro; a kua whiriwhiria ano e te Atua nga mea ngoikore o te ao, hei mea e whakama ai nga mea kaha;
- 28
- Kua whiriwhiria ano hoki e te Atua nga mea ware o te ao, me nga mea e kinongia ana, me nga kahore noa iho, hei whakakahore i nga tino mea;
- 29
- Kia kore ai e whakamanamana tetahi kikokiko ki tona aroaro.
- 30
- Nāna hoki koutou i roto i a Karaiti Ihu, kua meinga nei ia hei take whakaaro nui mo tatou, he mea na te Atua, hei tika, hei whakatapu, hei hoko:
- 31
- Kia rite ai ki te mea kua oti te tuhituhi, Ki te whakamanamana tetahi, me whakamanamana ki te Ariki.
Address: 
Phone: 
Email: