- 1
- E aku teina, e kore ahau e pai kia kuare koutou, i raro o te kapua o matou mātua katoa, i haere katoa ano hoki ra roto i te moana;
- 2
- A iriiria katoatia ana ratou ki a Mohi, i roto i te kapua i roto hoki i te moana;
- 3
- A, te kai i kainga e ratou katoa, te mea wairua, kotahi tonu;
- 4
- Te wai ano hoki i inumia e ratou katoa, te mea wairua, kotahi tonu; i inu hoki ratou i ta te mea wairua, ara, i ta te Toka i whai nei i a ratou: a taua Toka na ko te Karaiti.
- 5
- Otiia kihai te Atua i ahuareka atu ki te nuinga o ratou; i turakina iho hoki ratou i te koraha.
- 6
- Na, enei mea hei tohu ki a tatou, kia kaua ai tatou e hiahia ki nga mea kino, kei pera me ratou i hiahia ra.
- 7
- Kaua ano hoki koutou e karakia ki nga whakapakoko, kei pera me etahi o ratou; kua oti na hoki te tuhituhi, I noho te iwi ki te kai ki te inu, a whakatika ana ki te takaro.
- 8
- Kaua ano hoki tatou e puremu, kei pera me etahi o ratou i puremu, a hinga ana e rua tekau ma toru nga mano i te ra kotahi.
- 9
- Kaua ano hoki tatou e whakamatautau i a te Karaiti, kei pera me etahi o ratou i whakamatautau ra, a ngaro ana i nga nakahi.
- 10
- Kaua hoki koutou e amuamu, kei pera me etahi o ratou i amuamu, a ngaro ana i te kai whakangaro.
- 11
- Na, i pa enei mea katoa ki a ratou hei tohu: a kua tuhituhia nei hei whakatupato i a tatou, i te hunga ka tae nei ki nga whakamutunga o te ao.
- 12
- Na, te tangata e mea ana e to ana ia, kia tupato ia kei hinga.
- 13
- Kahore ano kia pono ki a koutou tetahi whakamatautauranga e rereke ana i to te tangata: a e pono ana te Atua, e kore nei e tuku kia nui ake i to koutou kaha te whakamatautauranga mo koutou; a ki te whakamatautauria koutou ka meatia e ia he putanga, kia u ake ai koutou.
- 14
- Na, e oku hoa aroha, rere atu i te karakia whakapakoko.
- 15
- Taku korero nei he mea ki te hunga mahara; whakaaroa e koutou taku e mea nei.
- 16
- Te kapa whakapainga e whakapai nei tatou, ehara koia i te inumanga tahitanga i te toto o te Karaiti? te taro e whatiwhatiia nei e tatou, ehara ianei i te kainga tahitanga i te tinana o te Karaiti?
- 17
- No te mea kotahi ano taro, kotahi ano tinana tatou tokomaha; kotahi tonu nei hoki taua taro e kainga nei e tatou katoa.
- 18
- Whakaaroa a Iharaira o te kikokiko: he teka ianei ko te hunga e kai ana i nga patunga tapu, e uru tahi ana ratou ki to te āta?
- 19
- Na, he pehea ra taku korero? he tikanga mea ranei te whakapakoko? he tikanga mea ranei te mea e patua ana ma te whakapakoko?
- 20
- Na, nga mea e patua ana e nga tauiwi, e patua ana ma nga rewera, he teka ma te Atua: a e kore ahau e pai kia uru tahi koutou ko nga rewera.
- 21
- E kore koutou e ahei te inu i te kapa a te Ariki, me te kapa ano hoki a nga rewera: e kore koutou e ahei te kai i to te Ariki tepu, i to nga rewera tepu ano hoki.
- 22
- E mea ana ranei tatou kia hae mai te Ariki? e kaha ana koia tatou i a ia?
- 23
- E tika ana nga mea katoa maku, otira e kore e pai katoa: e tika ana nga mea katoa maku, otira e kore te whare e hangā e nga mea katoa.
- 24
- Kaua tetahi e rapu ki tana ake, engari me rapu katoa i ta tera i ta tera.
- 25
- Kainga nga mea katoa e hokoa ana i te makete, kaua e uiui atu kei hē te hinengaro:
- 26
- No te Ariki hoki te whenua, me ona tini mea.
- 27
- Na, ki te karangatia koutou e tetahi o te hunga whakapono kore, a e pai ana koutou kia haere; kainga nga mea katoa e whakatakotoria ana ki to koutou aroaro, kaua e uiui atu kei hē te hinengaro.
- 28
- Ki te mea ia tetahi ki a koutou, I patua tenei ma te whakapakoko, aua e kai, me whakaaro ki te kai whakaatu, ki te hinengaro ano hoki: no te Ariki hoki te whenua, me ona tini mea:
- 29
- I a au i mea nei, Ki te hinengaro, ehara i te mea nou, engari no tera: he aha hoki toku herekoretanga i whakahengia ai e to tera hinengaro?
- 30
- Ki te mea hoki na te aroha noa ahau i kai ai, he aha ahau i korerotia kinotia ai mo te mea i whakawhetai ai ahau?
- 31
- Na, ahakoa kai koutou, ahakoa inu, aha ranei, meinga katoatia hei whakakororia mo te Atua.
- 32
- Kei ai koutou hei tūtukitanga waewae, ki nga Hurai, ki nga Kariki, ki te hahi ranei o te Atua:
- 33
- Kia penei me au e whakamanawareka nei i te katoa i nga mea katoa, i ahau kahore nei e rapu i te pai moku ake, engari i to te tokomaha kia ora ai ratou.
Address: 
Phone: 
Email: