- 1
- Kia rite ta koutou ki taku, me taku nei ka rite ki a te Karaiti.
- 2
- Na, e whakamoemiti ana au ki a koutou, e aku teina, mo koutou ka mahara ki ahau i nga mea katoa, a ka pupuri ano i nga whakarerenga iho, i aku i tuku atu ra ki a koutou.
- 3
- E mea ana ahau kia mātau koutou, ko te Karaiti te upoko o nga tāne katoa; ko te tāne te upoko o te wahine; a ko te Atua te upoko o te Karaiti.
- 4
- Te tangata e inoi ana e poropiti ana ranei, me te hipoki ano te upoko, e whakaiti ana ia i tona upoko.
- 5
- Me te wahine ano hoki e inoi ana e poropiti ana ranei, a kahore he hipoki o te upoko, e whakaiti ana ia i tona upoko: e rite tonu ana hoki ki te upoko kua oti te heu.
- 6
- Ki te kahore hoki te wahine e hipokina, kia waruhia hoki ia: ki te mea ia he mea whakama ki te wahine kia waruhia kia heua ranei, me hipoki.
- 7
- E kore hoki e tika mo te tāne kia hipokina tona upoko, ko te ahua hoki ia me te kororia o te Atua: ko te wahine ia te kororia o te tāne.
- 8
- Ehara hoki i te mea no te wahine te tāne engari no te tāne te wahine;
- 9
- Kihai ano hoki te tāne i hangā ma te wahine, engari ko te wahine ma te tāne.
- 10
- Koia i tika ai hei runga i te upoko o te wahine te tohu o te mana, he mea ma nga anahera.
- 11
- Ahakoa ra e kore te tāne e motuhia mai i te wahine, e kore ano hoki te wahine e motuhia mai i te tāne, i roto i te Ariki.
- 12
- No roto hoki i te tāne te wahine, whaihoki na te wahine mai ano te tāne: na te Atua ano ia nga mea katoa.
- 13
- Ma koutou ake ano e whakaaro: he mea tika ranei kia inoi hipoki kore te wahine ki te Atua?
- 14
- E kore ranei te whakaaro maori nei ano e ako i a koutou, ki te mea he makawe roroa o te tāne, he mea whakatutua ia mona?
- 15
- Tena ki te mea he makawe roroa o te wahine, hei whakakororia ia mona: ina hoki kua hoatu ki a ia te makawe hei hipoki.
- 16
- Otira ki te mea he ahua, tohe to tetahi, kahore a matou ritenga pera, kahore hoki a nga hahi a te Atua.
- 17
- Na, i a au e korero atu nei i tenei, kahore aku whakamoemiti, kahore hoki koutou e whakamine mai mo te pai, engari mo te kino.
- 18
- Te tuatahi, i a koutou ka whakamine mai ki roto ki te hahi, ka rongo ahau he wehewehenga kei roto i a koutou; a e whakaponohia ana ano e ahau tetahi wahi.
- 19
- He mea takoto rawa hoki kia whai titorehanga koutou, kia kitea ai te hunga e paingia ana i roto i a koutou.
- 20
- Na, ka huihui mai koutou ki te wahi kotahi, ehara i te mea ki te kai i te hapa a te Ariki.
- 21
- I te mea hoki e kai ana, ko tana ake hapa ta tetahi ta tetahi e tango wawe ai: a e hiakai ana tetahi, e haurangi ana tetahi.
- 22
- Kahore koia o koutou whare e kai ai e inu ai koutou? e whakahawea ana ranei koutou ki te hahi a te Atua, a e mea ana kia whakama te hunga kahore nei a ratou mea? Kia pehea atu taku kupu ki a koutou? kia whakamoemiti atu ahau ki a koutou mo tenei mea? e kore ra ahau e whakamoemiti.
- 23
- Kua riro mai hoki i a au ta te Ariki, taku i tuku atu ra ki a koutou, ara, I tangohia te taro e te Ariki e Ihu, i taua po i tukua ai ia:
- 24
- A ka mutu te whakawhetai, ka whatiia e ia, na, ka mea ia, Tangohia, kainga; ko toku tinana tenei, ka whatiwhatiia nei mo koutou: meinga tenei hei whakamaharatanga ki a au.
- 25
- Me te kapa ano hoki i te mutunga o te hapa, me tana mea ano, Ko tenei kapa te kawenata hou i runga i oku toto: meinga tenei i nga inumanga katoatanga hei whakamaharatanga ki a au.
- 26
- I nga wa katoa hoki e kai ai koutou i tenei taro, e inu ai i tenei kapa, e whakakitea ana e koutou te matenga o te Ariki kia tae mai ra ano ia.
- 27
- Mo reira ki te kai hē tetahi i tenei taro, ki te inu hē i te kapa a te Ariki, ka whai hara ia i te tinana i nga toto o te Ariki.
- 28
- Engari kia uiui te tangata ki a ia ano, ka kai ai i taua taro, ka inu ai i taua kapa.
- 29
- No te mea ki te kai hē ki te inu hē tetahi, e kai ana e inu ana i te whakawakanga mona, tē whakaaro ko te tinana o te Ariki.
- 30
- Na konei hoki he tokomaha i roto i a koutou e ngoikore ana, e mate ana, a he tokomaha ano kua moe.
- 31
- Me i whakawa hoki tatou i a tatou ano, kihai i whakataua te hē ki a tatou.
- 32
- Na, ka whakawakia, he mea whakaako tatou na te Ariki, kei tukua ngatahitia tatou me te ao ki te hē.
- 33
- Heoi, e aku teina, ka huihui koutou ki te kai, me tatari tetahi ki tetahi.
- 34
- A ki te hiakai tetahi tangata, hei roto i tona whare ia kai ai; kei ai to koutou huihuinga hei take whakawakanga. Era atu mea hoki maku e whakatika, ina tae atu ahau.