1st Samuel Chapter 24 - Paipera Tapu 1868 | Te Paipera Tapu 1868

1st Samuel Chapter 24 - Paipera Tapu 1868

1
A, te hokinga mai o Haora i te whai i nga Pirihitini, na, ka korerotia te korero ki a ia, Nana, hei te koraha o Enekeri a Rawiri.
2
Na, takiritia mai ana e Haora etahi tangata, e toru nga mano, he hunga whiriwhiri i roto i a Iharaira katoa, a haere ana ki te rapu i a Rawiri ratou ko ana tangata i runga i nga kamaka o nga koati mohoao.
3
A, tona taenga mai ki nga taiepa hipi i te ara, na, he ana kei reira, a ka haere atu a Haora ki te uhi i ona waewae, heoi i nga taha o te ana a Rawiri ratou ko ana tangata e noho ana.
4
Katahi ka mea nga tangata o Rawiri ki a ia, Na ko te ra tenei i mea ai a Ihowa ki a koe, Nana, ka hoatu e ahau tou hoa riri ki tou ringa, a ka meatia e koe ki a ia ta tou hinengaro i whakapai ai. Na, whakatika ana a Rawiri, a tapahia pukutia ana e ia te pito o te koroka o Haora.
5
Heoi muri iho, na, ka whakawiri te ngakau o Rawiri i roto i a ia; mona i tapahi i te pito o to Haora.
6
Na, ko tana meatanga ki ana tangata. Kaua, e Ihowa, tenei e tukua mai ki a au, kia meatia e ahau tenei mea ki toku ariki, ki ta Ihowa i whakawahi ai, kia totoro atu toku ringa ki a ia, ko ta Ihowa hoki ia i whakawahi ai.
7
Ko nga kupu enei a Rawiri i haukotia ai e ia ana tangata, a kihai i tukua kia whakatika mai ki a Haora. Na, whakatika ana a Haora i roto i te ana, a haere ana i te ara.
8
Katahi a Rawiri ka whakatika mai i muri, a puta mai ana i roto i te ana, ka karanga i muri i a Haora, ka mea, E taku ariki, e te kingi. A, te tirohanga mai a Haora ki muri i a ia, na, ka tuohu iho te mata o Rawiri, a piko iho ana ki te whenua.
9
Na, ka mea a Rawiri ki a Haora, He aha koe i whakarongo ai ki nga kupu a te tangata ina mea, Kei te rapu a Rawiri i te he mou.
10
Na kua kite nei ou kanohi i tenei ra i ta Ihowa homaitanga i a koe inaianei ki toku ringa i roto i te ana; i kiia ano hoki koe kia patua; otiia i tohu toku kanohi i a koe; i mea hoki ahau, E kore toku ringa e totoro atu ki toku ariki; ko ta Ihowa hoki ia i whakawahi ai.
11
Titiro mai ano hoki, e toku pāpā, ae ra, tirohia mai te pito o tou koroka i toku ringa nei; ta te mea i a au nei i tapahi i te pito o tou koroka, a kihai i patu i a koe, na, ka mohio koe, ka kite, kahore he kino, he tutū ranei i toku ringa; kahore ano hoki oku hara ki a koe; heoi e whaia nei ahau e koe kia whakamatea.
12
Ma Ihowa e whakarite ta taua whakawakanga, ma Ihowa ano hoki e rapu he utu moku i a koe; ko toku ringa ia e kore e pa ki a koe.
13
Ko te ki tenei o te whakatauki onamata, No te hunga kino te putanga mai o te kino; na, e kore toku ringa e pa ki a koe.
14
He whai i a wai i puta mai ai te kingi o Iharaira? ko wai tenei te arumia nei e koe? he kuri mate, he puruhi.
15
Ma Ihowa e whakarongo, e whakarite ta taua whakawakanga, mana e titiro mai, e tohe taku tohe, e whakaora hoki ahau i roto i tou ringa.
16
Heoi te mutunga o ta Rawiri korerotanga i enei kupu ki a Haora, ka mea a Haora, Ko tou reo tena, e taku tamaiti, e Rawiri? Na, ka puaki nui mai te reo o Haora, a tangi ana ia.
17
Katahi ia ka mea ki a Rawiri, Tika rawa koe i a au; he pai hoki tau utu ki a au, ko taku utu ia ki a koe he kino.
18
Kua whakakitea mai nei hoki e koe inaianei te pai o tau mahi ki a au: i ta Ihowa tukunga putanga hoki i a au ki roto ki tou ringa, na, kihai koe i patu i a au.
19
Ki te tupono atu hoki te tangata ki tona hoa riri, tera ranei ia e tukua paitia atu e ia kia haere? Na, ma Ihowa e homai te pai ki a koe hei utu mo tau mahi ki a au i tenei ra.
20
Na, e mohio ana tenei ahau ko koe pu ano hei kingi, a ka pumau ki tou ringa te kingitanga o Iharaira.
21
Na, oatitia mai a Ihowa ki a au e kore e hautopea atu e koe oku uri i muri i a au, e kore ano hoki e hunā e koe toku ingoa i roto i te whare o toku pāpā.
22
Na, oati ana a Rawiri ki a Haora, a haere ana a Haora ki tona whare; ko Rawiri ia, ratou ko ana tangata, i haere ki runga ki te pourewa.