- 1
- Na, ka mate a Hamuera, a ka huihui a Iharaira katoa ki te tangi ki a ia, a tanumia iho ia ki tona whare ki Rama. Na, ka whakatika a Rawiri, haere ana ki te koraha o Parana.
- 2
- A i Maono ano tetahi tangata, kei Karamere ona taonga; he nui rawa taua tangata, e toru mano ana hipi, kotahi mano ano hoki nga koati: heoi kei te kutikuti tera i ana hipi ki Karamere.
- 3
- Na, te ingoa o taua tangata ko Napara, ko Apikaira hoki te ingoa o tana wahine; a he pai nga whakaaro a te wahine, he mata ataahua ano hoki: he pakeke ia te tane, i kino ano hoki ana mahi; he uri ano ia no Karepe.
- 4
- A, te rongonga o Rawiri i te koraha kei te kutikuti a Napara i ana hipi.
- 5
- Na, ungā ana etahi tangata e Rawiri, kotahi tekau; i mea hoki a Rawiri ki nga tangata, Haere ki runga ki Karamere, a ka tae atu ki a Napara, na, ka owha atu ki a ia, me te whakahua ano i toku ingoa:
- 6
- Kia penei ano hoki ta koutou ki atu ki taua tangata e noho ora mai nei, Kia mau te rongo ki a koe, kia mau te rongo ki tou whare, kia mau te rongo ki au mea katoa.
- 7
- Na, kua rongo nei ahau he kai kutikuti au: na, au hepara i a matou ra, kihai ratou i ahatia e matou, kihai rawa hoki tetahi o a ratou mea i ngaro i nga ra katoa o ratou ki Karamere.
- 8
- Mau e ui atu ki o tangata, a ka korerotia e ratou ki a koe. Na, kia manakohia nga tamariki na e koe; he mea hoki kua tae mai matou i te rangi pai. Tena, homai ta tou ringa i tupono atu ai ki o pononga, ki to tamaiti hoki ki a Rawiri.
- 9
- Heoi te taenga atu o nga tangata a Rawiri, na, korerotia atu ana e ratou enei kupu katoa ki a Napara, me te whakahua ano i te ingoa o Rawiri, a heoi ano ta ratou.
- 10
- Katahi ka whakahokia mai e Napara ki nga tangata a Rawiri, a ka mea, Ko wai a Rawiri? ko wai hoki te tama a Hehe? he tini nga pononga i enei ra e tahuti mai ana, i o ratou rangatira.
- 11
- Me tango koia e ahau taku taro, taku wai, me aku mea hoki i patua nei e ahau ma aku kai kutikuti, me hoatu ma nga tangata kahore nei e mohiotia e ahau no hea ranei ratou.
- 12
- Na, ka tahuri atu nga tangata a Rawiri ki to ratou ara, a hoki ana, haere ana, korerotia ana e ratou ki a ia enei mea katoa.
- 13
- Na, ko te meatanga atu a Rawiri ki ana tangata, Whitikiria a koutou hoari, e tenei tangata, e tenei tangata. Na, whitikiria ana e ratou tana hoari, tana hoari; i whitikiria ano hoki tana hoari e Rawiri. Katahi ratou ka haere ki runga, ka whai i a Rawiri: tata tonu aua tangata ki te wha o nga rau; e rua hoki nga rau i noho atu ki nga taonga.
- 14
- Na, ka korero mai tetahi o nga tangata ki a Apikaira wahine a Napara, ka mea, Nana, i tonoa mai etahi tangata e Rawiri i te koraha, ki te owha ki to matou rangatira; heoi whakatupehupehu atu ana ia ki a ratou.
- 15
- Otiia pai rawa aua tangata ki a matou, kihai hoki i aha ki a matou, kihai rawa ano hoki i ngaro tetahi mea a matou i nga ra katoa i haereere tahi ai matou me ratou, i a matou ra i te parae.
- 16
- Hei taiepa ratou ki a matou i te po, i te ao, i nga ra katoa i tata ai matou ki a ratou, i a matou e tiaki ana i nga hipi.
- 17
- Na, mau e whakaaro, e titiro ki tau e mea ai; kua takoto hoki he kino mo to matou rangatira, ratou ko tona whare katoa: he tama hoki ia na Periara, a e kore tetahi e korero ki a ia.
- 18
- Na, hohoro tonu a Apikaira, ka mau ki etahi taro, e rua nga rau, ki nga ipu waina e rua, ki nga hipi hoki e rima, he mea kua oti te taka, ki nga mehua e rima o te witi pahūhū, ki nga tautau karepe maroke kotahi rau, ki nga papa piki e rua nga rau, a whakawahā atu ana ki nga kaihe.
- 19
- Na, ka mea ia ki ana tangata, Hoake ki mua i a au; tena au te haere atu na i muri i a koutou. Kihai hoki i korerotia e ia ki tona tahu, ki a Napara.
- 20
- Na, i a ia e haere atu ana i runga i te kaihe, a e heke atu ana i te wahi ngaro o te maunga, na, ko Rawiri ratou ko ana tangata e heke mai ana, e tika mai ana ki a ia; na, pono tonu atu ia ki a ratou.
- 21
- Ko ta Rawiri hoki tenei i ki ai, Maumau tiaki noa ahau i nga mea katoa a tenei koroke i te koraha, kahore rawa hoki tetahi o ana mea katoa i ngaro; na, utua mai ana e ia te pai ki te kino.
- 22
- Kia meatia mai tenei e te Atua ki nga hoa riri o Rawiri, me etahi mea ano hoki, ki te toe i a au i te awatea apopo tetahi o ana mea katoa e pi atu ana ki te taiepa.
- 23
- Na, te kitenga o Apikaira i a Rawiri, hohoro tonu ia, marere ana ki raro i te kaihe, takoto tapapa ana i te aroaro o Rawiri, me te piko iho ano ki te whenua.
- 24
- Na, ka takoto ia ki ona waewae, ka mea, Hei runga i a au, e toku ariki, tenei kino; na, kia korero atu to pononga ki ou taringa, whakarongo mai hoki koe ki nga kupu a to pononga.
- 25
- Kaua te ngakau o toku ariki e mea ki tenei tangata o Periara, ki a Napara: ko tona ingoa hoki, ko ia, rite tahi: ko Napara tona ingoa; he wairangi ano hoki kei a ia. Ko au ia ko to pononga, kihai i kite i nga tangata a toku ariki i tonoa ake ra e koe.
- 26
- Na, e toku ariki, e ora ana a Ihowa, e ora ana hoki tou wairua, i a Ihowa kua pupuri nei i a koe kei haere ki te whakaheke toto, kei pa tou ringa ake ki te rapu utu, kia rite ano hoki ianei ki a Napara ou hoa riri, me te hunga e rapu ana i te he mo toku ariki.
- 27
- Na, tenei manaakitanga i kawea mai nei e tou pononga ki toku ariki, kia hoatu, ne? ki nga tamariki i raro i nga waewae o toku ariki.
- 28
- Tena ra, whakarerea noatia iho te kino a to pononga; he mea kua takoto rawa ta Ihowa whakapumautanga i te whare o toku ariki; e whawhai ana hoki toku ariki i nga whawhai a Ihowa; kihai ano hoki i mau tetahi he ou i ou ra katoa.
- 29
- A ki te whakatika mai tetahi tangata ki te whai i a koe, ki te rapu kia whakamatea koe, na, kia paiherea te wairua o toku ariki ki roto ki te paihere ora ki a Ihowa ki tou Atua; ko nga wairua ia o ou hoa riri kia piua atu, ano no waenga pu i te kotaha.
- 30
- A tenei ake kei ta Ihowa meatanga ki toku ariki i nga mea katoa i korerotia e ia hei pai mou, a ka whakahaua iho koe e ia hei rangatira mo Iharaira;
- 31
- Na, e kore tenei e waiho hei whakawiri mou, hei tutukitanga waewae mo te ngakau o toku ariki, ara, tau whakahekenga pakupakutanga i te toto, te rapunga ranei a toku ariki i te utu mona: raia ka puta ta Ihowa pai ki toku ariki, na, kia mahara koe ki tou pononga.
- 32
- Na, ko te meatanga atu a Rawiri ki a Apikaira, Kia whakapaingia a Ihowa te Atua o Iharaira, mo tanatononga i a koe ki te whakatau i a au.
- 33
- Kia whakapaingia ano tou whakaaro tika, kia whakapaingia ano hoki koe; mou i pupuri i a au i tenei ra, kei haere ki te whakaheke toto, kei rapu utu toku ringa.
- 34
- Na, e ora ana a Ihowa te Atua o Iharaira nana nei ahau i pupuri kei kino ki a koe, me i kahore koe te hohoro te haere mai ki te whakatau i a au, ina, kihai i toe ki te awatea apopo tetahi mea a Napara e pi atu ana ki te taiepa.
- 35
- Katahi ka tangohia mai e Rawiri i tona ringa nga mea i kawea mai e ia ki a ia, a ka mea ki a ia, Haere atu i runga i te rangimarie ki tou whare: titiro, kua whakarongo nei ahau ki tou reo, kua whakapai atu hoki ki a koe.
- 36
- Na, haere ana a Apikaira a Napara, a i te mea hakari tera i roto i tona whare, koia ano kei te hakari a te kingi! koa ana te ngakau o Napara i roto i a ia, he nui hoki tona haurangi. Na, kihai i korerotia e ia tetahi mea ki a ia, ahakoa iti, ahakoa rahi, a mārama noa te ata.
- 37
- A i te ata, i te mea ka hemo atu te waina o Napara, na, korerotia ana e tana wahine ki a ia enei mea katoa; na, mate iho tona ngakau i roto i a ia, heoi kua rite ia ki te kohatu.
- 38
- A ka tekau nga ra, na, ka patua a Napara e Ihowa, a ka mate.
- 39
- A, te rongonga o Rawiri kua mate a Napara, na, ka mea ia, Kia whakapaingia a Ihowa i tohe nei i te tohe a Napara mo toku tawainga; i pupuri nei i tana pononga kei kino, a whakahokia atu ana e Ihowa te kino a Napara ki runga ki tona mātenga ake. Na, ka tono tangata atu a Rawiri ki te korero ki a Apikaira, ki te tiki ano hoki i a ia hei wahine māna.
- 40
- A, te taenga mai o nga tangata a Rawiri ki a Apikaira ki Karamere, na, ka korero ratou ki a ia, ka mea, I tonoa mai matou e Rawiri ki te tiki i a koe hei wahine māna.
- 41
- Katahi tera ka whakatika ake, a piko iho ana tona mata ki te whenua, ka mea, Tenei to pononga hei pononga wahine, hei horoi i nga waewae o nga tangata a toku ariki.
- 42
- Na, hohoro ana a Apikaira, a whakatika ana, eke ana ki runga ki te kaihe; tokorima hoki ana kotiro i haere tahi me ia; na, aru ana ia i nga karere a Rawiri, a ka meinga hei wahine māna.
- 43
- I tangohia ano hoki e Rawiri a Ahinoama o Ietereere; a ka meinga ko raua tokorua hei wahine mana.
- 44
- I hoatu ano ia e Haora a Mikara tana tamahine, te wahine a Rawiri, ki Parati ki te tama a Raihi, he tangata no Karimi.
Address: 
Phone: 
Email: