- 1
- Heoi, e aku teina, he mea tenei na matou, he whakahau ki a koutou i roto i te Ariki i a Ihu, kua riro atu na hoki ta matou i a koutou, ara, te tikanga mo ta koutou haere mo to koutou whakamanawareka atu ki te Atua, na, kia tino hira rawa tera a koutou.
- 2
- E mātau ana hoki koutou ki nga tikanga i whakatakotoria atu e matou ki a koutou i roto i te Ariki i a Ihu.
- 3
- Ko ta te Atua hoki tenei e pai ai ko to koutou whakatapunga, kia mawehe atu koutou i te puremu:
- 4
- Kia mātau koutou katoa ki tona tinana, ki tona tinana, kia mau i runga i te tapu i te honore:
- 5
- Kaua i runga i te toronga atu o te hiahia, kei rite ki nga tauiwi kahore nei e mātau ki te Atua:
- 6
- Kia kaua tetahi e tinihanga e whakapati ki tona teina i tetahi mea; mo te mea ko te Ariki te kai rapu utu mo era mahi katoa, ko ta matou hoki ia i korero ai i mua, i whakaatu atu ai ki a koutou.
- 7
- Kihai hoki tatou i karangatia e te Atua ki te poke, engari ki te tapu.
- 8
- Na, te tangata e whakorekore ana, ehara tana i te whakorekore ki te tangata, engari ki te Atua, nāna nei i homai tona Wairua Tapu ki a tatou.
- 9
- Na, te aroha ki nga teina, kahore a koutou mea e tuhituhi atu ai ahau ki a koutou; he mea whakaako hoki koutou na ano e te Atua ki te aroha tetahi ki tetahi.
- 10
- Ko ta koutou na hoki ia e mea na ki nga teina katoa, a puta noa i Makeronia: heoi he whakahau ano tenei na matou ki a koutou e aku teina, kia hira rawa tenei a koutou:
- 11
- Me whai ano hoki kia ata noho, kia mahia ta koutou mahi ake e tera e tera, ko o koutou ringaringa ake ano hei mahi, kia rite ki ta matou i ako atu ai ki a koutou;
- 12
- Kia ataahua to koutou haere ki te hunga o waho, a kia kaua e matea tetahi mea e koutou.
- 13
- Na, e kore ahau e pai, e aku teina, kia kuare koutou ki te hunga kua moe, kei koingo koutou, kei pera me era atu kahore nei o ratou tumanakotanga atu.
- 14
- Ki te whakapono hoki tatou kua mate a Ihu, kua ara ake ano, whaihoki ko te hunga e moe ana i roto i a Ihu, ka arahina tahitia mai ratou me ia e te Atua.
- 15
- Ko ta matou korero hoki tenei ki a koutou, he mea ki mai na te Ariki, ko tatou ko te hunga kua mahue ki te ora, ki te taenga mai o te Ariki, e kore e pahika atu ki mua o te hunga kua moe.
- 16
- No te mea ko te Ariki pu ano e heke iho i te rangi me te karanga ano, me te reo o te tino anahera, me te tētere a te Atua: a ko te hunga kua mate i roto i a te Karaiti e ara ki mua:
- 17
- Ko reira tatou te hunga kua mahue ki te ora, ka kahakina ngatahitia atu me ratou i runga i nga kapua, ki te whakatau ki te Ariki i te rangi: na, ka noho tonu tatou ki te Ariki.
- 18
- Na, he kupu enei hei whakamarie ma koutou tetahi i tetahi.
Address: 
Phone: 
Email: