- 1
- Ko nga wa ia me nga taima, e aku teina, kahore he rawa e tuhituhi atu ai ahau ki a koutou.
- 2
- E mātau pu ana hoki koutou, tera e haere mai te ra o te Ariki, ano he tahae i te po.
- 3
- I a ratou hoki e ki ana, He whenua rangatira, he oranga; ko reira te whakangaromanga huaki tata ai ki a ratou, ka pera me te mamae ki te wahine hapū, a e kore ratou e mawhiti.
- 4
- Ko koutou ia, e aku teina, kahore he pouritanga i a koutou, e rite ai ki ta te tahae te hopu a taua ra i a koutou.
- 5
- He tamariki koutou katoa no te māramatanga, he tamariki no te ra: ehara tatou i te po, ehara i te pouritanga.
- 6
- Na, aua tatou e moe, kei pera me era atu; engari kia mataara tatou, kia whai whakaaro.
- 7
- Te hunga hoki e moe ana, e moe ana i te po; a, te hunga e haurangi ana, e haurangi ana i te po.
- 8
- Ko tatou ia te hunga o te ra, kia whai whakaaro, kia kakahuria iho te whakapono me te aroha hei pukupuku; a hei potae, ko te tumanakotanga atu ki te ora.
- 9
- Kihai hoki tatou i waiho e te Atua mo te riri, engari kia meinga tatou kia whiwhi ki te oranga he mea na to tatou Ariki na Ihu Karaiti;
- 10
- I mate nei he whakaaro ki a tatou mo tatou, ahakoa mataara, ahakoa moe, kia ora tahi me ia.
- 11
- Na, whakamarie koutou tetahi i tetahi, hangā hoki te pai o tetahi e tetahi, peratia ano me ta koutou e mea na.
- 12
- Na, he mea tenei na matou ki a koutou, e aku teina, kia mātau koutou ki te hunga e mahi ana i roto i a koutou, e tohutohu ana i a koutou i roto i te Ariki, e whakatupato ana i a koutou;
- 13
- Kia nui whakaharahara ano a koutou whakaaro ki a ratou i runga i te aroha, me whakaaro ki ta ratou mahi. Kia mau ta koutou rongo ki a koutou ano.
- 14
- Na, ko ta matou whakahau tenei ki a koutou, e aku teina, whakatupatoria te hunga whakakeke, whakamarietia te hunga ngakau rahirahi, tautokona ake te hunga ngoikore, kia manawanui nga tāngata katoa.
- 15
- Kia tupato kei hoatu he kino mo te kino e tetahi ki tetahi; engari i nga wa katoa whaia he pai mo tetahi mo tetahi, mo nga tāngata katoa ano hoki.
- 16
- Kia hari i nga wa katoa.
- 17
- Kei whakamutua te inoi.
- 18
- I nga meatanga katoatanga me whakawhetai atu; ko ta te Atua hoki tenei e pai ai i roto i a Karaiti Ihu hei mahi ma koutou.
- 19
- Kei tineia te Wairua.
- 20
- Kaua e whakahawea atu ki nga poropititanga.
- 21
- Whakamatamatauria nga mea katoa; kia u ki te pai.
- 22
- Mawehe atu i nga ahua katoa o te kino.
- 23
- A ma te Atua pu ano o te rangimarie e tino whakatapu rawa koutou: kia tiakina hoki o koutou wairua, o koutou ngakau, o koutou tinana, kia toitū kia hē-kore, i te taenga mai o to tatou Ariki o Ihu Karaiti.
- 24
- E pono ana te kai karanga i a koutou, māna ano hoki e whakaoti.
- 25
- E aku teina, inoi mo matou.
- 26
- Oha atu ki nga teina katoa hei te kihi tapu ano.
- 27
- Na, he whakahua tenei naku i te Ariki ki a koutou, korerotia tenei pukapuka ki nga teina tapu katoa.
- 28
- Kia tau ki a koutou te aroha noa o to tatou Ariki o Ihu Karaiti. Amine.
Address: 
Phone: 
Email: