- 1
- Na Paora, ratou ko Hirawanu, ko Timoti ki te hahi o te hunga o Teharonika i roto i te Atua i to tatou Matua, i te Ariki hoki i a Ihu Karaiti:
- 2
- Kia tau ki a koutou te aroha noa, me te rangimarie, he mea na te Atua, na to tatou Matua, na te Ariki hoki na Ihu Karaiti.
- 3
- Tika rawa kia whakawhetai matou ki te Atua i nga wa katoa mo koutou, e aku teina, he mea pai ra hoki ia, no te mea e neke ake ana to koutou whakapono, a he nui rawa te aroha o koutou katoa o tetahi ki tetahi:
- 4
- A whakamanamana noa iho matou nei ki a koutou i roto i nga hahi o te Atua, ki to koutou u, ki to koutou whakapono i o koutou whakatoinga katoa, i nga tukinotanga hoki e whakaririka kau na koutou;
- 5
- He tohu tenei mo te tika o ta te Atua whakarite whakawa, e whakatikangatia ai koutou mo te rangatiratanga o te Atua, he whakaaro nei hoki ki tera i mate ai koutou:
- 6
- He mea tika nei hoki ki te Atua kia utua ki te tukinotanga te hunga e tukino ana i a koutou;
- 7
- A ki a koutou e tukinotia na, kia okioki tahi me matou; i te whakakitenga mai o te Ariki o Ihu i runga i te rangi me nga anahera o tona kaha,
- 8
- I roto i te mura ahi e rapu utu ana i te hunga kahore e mātau ki te Atua, kahore nei hoki e ngohengohe ki te rongo pai o to tatou Ariki o Ihu Karaiti:
- 9
- Te utu hoki e whakapangia ki a ratou he whakangaromanga, he mea mutunga-kore i te aroaro ano o te Ariki, i te kororia ano hoki o tona kaha;
- 10
- Ina haere mai ia kia whakakororiatia i roto i tona hunga tapu, kia whakamoemititia i roto i te hunga whakapono katoa, i taua ra; i whakapono na hoki koutou ki ta matou kupu whakaatu i roto i a koutou.
- 11
- Koia nei hoki matou ka inoi tonu nei mo koutou, kia whakatikangatia koutou e to tatou Atua mo tenei karangatanga, kia whakaotia ano hoki e ia i runga i te kaha nga mea katoa i ahuareka ai tona pai, me te mahi ano hoki o te whakapono,
- 12
- Kia whakakororiatia ai te ingoa o to tatou Ariki o Ihu Karaiti i roto i a koutou, me koutou hoki i roto i a ia, kia rite ai ki ta te aroha noa o to tatou Atua o te Ariki hoki o Ihu Karaiti.
Address: 
Phone: 
Email: