2nd Chronicles Chapter 11 - Paipera Tapu 1868 | Te Paipera Tapu 1868

2nd Chronicles Chapter 11 - Paipera Tapu 1868

1
Na, kua tae a Rehopoama ki Hiruharama, a huihuia ana e ia te whare o Hura, raua ko Peniamine, kotahi rau e waru tekau nga mano; he hunga whiriwhiri, he hunga whawhai, hei whawhai ki a Iharaira, kia hoki ai te kingitanga ki a Rehopoama.
2
Na, ko te putanga mai o te kupu a Ihowa ki a Hemaia tangata a te Atua; i mea ia,
3
Korero atu ki a Rehopoama tama a Horomona kingi o Hura, ki a Iharaira katoa ano hoki i a Hura, i a Peniamine, mea atu,
4
Ko te kupu tenei a Ihowa, Kei haere koutou ki runga, kei whawhai koutou ki o koutou tuakana. Hoki atu koutou ki tona whare, ki tona whare; naku hoki tenei mea. Na, rongo tonu ratou ki nga kupu a Ihowa, a hoki ana, kihai i haere ki te whawhai ki a Ieropoama.
5
Na, ka noho a Rehopoama ki Hiruharama, a hangā ana e ia etahi pa tiaki ki Hura.
6
Nana hoki i hanga a Pete-rehema, a Etema, a Tekoa,
7
A Pete-turu, a Hoko, a Aturama,
8
A Kata, a Mareha, a Tiwhi,
9
A Aroraima, a Rakihi, a Ateka,
10
A Toraha, a Atarono, a Heperona. I Hura enei raua ko Peniamine, he pa taiepa.
11
I hangā ano e ia kia kaha etahi pa taiepa, whakawhiwhi rawa ki te rangatira mo roto, ki tona nui ano hoki o te kai, o te hinu, o te waina,
12
Ki nga pukupuku, ki nga tao ano hoki i roto i tenei pa, i tenei pa; no ka tino kaha rawa; i a ia hoki a Hura raua ko Peniamine.
13
Na, nga tohunga me nga Riwaiti puta noa i a Iharaira, haere mai ana ratou ki a ia i o ratou rohe katoa.
14
I whakarerea hoki e nga Riwaiti o ratou wahi i nga pa, me o ratou kāinga ake, a, haere ana ki Hura, ki Hiruharama: i peia hoki ratou e Ieropoama ratou ko ana tama, kei mahi tohunga ratou ki a Ihowa.
15
I whakaritea ano e ia etahi tohunga māna ki nga wahi tiketike, ki nga rewera, ki nga kuao kau i hangā e ia.
16
Na, i muri i a ratou ko te hunga o nga iwi katoa o Iharaira i homai nei i o ratou ngakau ki te rapu i a Ihowa Atua o Iharaira, haere mai ana ratou ki Hiruharama ki te mea patunga tapu ki a Ihowa, ki te Atua o o ratou mātua.
17
Na, he mea whakau ratou i te kingitanga o Hura, he whakakaha hoki i a Rehopoama tama a Horomona, e toru nga tau: e toru hoki nga tau i haere ai ratou i te ara o Rawiri raua ko Horomona.
18
Na, ka tangohia e Rehopoama hei wahine mana a Maharata tamahine a Terimoto tama a Rawiri, raua ko Apihaira tamahine a Eriapa tama a Hehe;
19
Na, ana tamariki i whanau i tenei; ko Ieuhu, ko Hemaria, ko Tahama.
20
A, i muri i tenei wahine ka tangohia e ia ko Maaka tamahine a Apoharama. Na, ana tamariki i whanau i tenei; ko Apia, ko Atai, ko Tita, ko Heromiti.
21
Na, ko Maaka tamahine a Apoharama ta Rehopoama i matenui ai o ana wahine katoa, o ana wahine iti ano hoki: kotahi tekau ma waru hoki nga wahine i tangohia e ia, e ono tekau nga wahine iti; a, e rua tekau ma waru ana tamariki i whanau, e ono tekau nga tamahine.
22
Na, ka meinga e Rehopoama ko Apia tama a Maaka hei upoko, hei rangatira, i roto i ona tuakana, teina; ko ia hoki tana i mea ai hei kingi.
23
Na, ka mahi tupato ia, a, whakamararatia atu ana e ia ana tamariki ki nga whenua katoa o Hura, o Peniamine, ki nga pa taiepa katoa: nui atu hoki te kai i hoatu e ia ki a ratou. Hiahia tonu ano ia kia tokomaha ana wahine.