- 1
- Nawai a, ka u te kingitanga o Rehopoama, a ka whai kaha ia, whakarerea ake e ia te ture a Ihowa, e ratou tahi ano ia ko Iharaira katoa.
- 2
- Na, i te rima o nga tau o Kingi Rehopoama ka haere mai a Hihaka kingi o Ihipa ki Hiruharama; kua whakakeke nei hoki ratou ki a Ihowa.
- 3
- Kotahi tekau ma rua rau ana hariata, e ono tekau mano nga hoia eke hoiho, kahore hoki he tauanga o te hunga i haere tahi mai i a ia i Ihipa; ko nga Rupimi, ko nga Hukiimi ko nga Etiopiana.
- 4
- Na, kua riro i a ia nga pa taiepa o Hura, a, haere mai ana ki Hiruharama.
- 5
- Katahi a Hemaia poropiti ka haere mai ki a Rehopoama, ki nga rangatira o Hura i huihui mai nei ki Hiruharama i te wehi i a Hihaka, a ka mea ki a ratou, Ko te kupu tenei a Ihowa. Na koutou ahau i whakarere, na, ka whakarerea atu koutou e ahau ki te ringa o Hihaka.
- 6
- Na, ko te whakaitinga o nga rangatira o Iharaira ratou ko te kingi i a ratou, ka mea, He tika ta Ihowa.
- 7
- A, te kitenga o Ihowa kua whakaiti ratou i a ratou, ka puta mai te kupu a Ihowa ki a Hemaia; i mea ia, Kua whakaiti nei ratou i a ratou, e kore ratou e hunā e ahau; ka hoatu ano e ahau ki a ratou he oranga, he mea iti nei; e kore ano hoki taku riri e ringitia ki Hiruharama e te ringa o Hihaka.
- 8
- Otiia ka meinga ratou hei pononga mana, a ka mohio ratou ki taku mahi, ki te mahi ano hoki a nga kingitanga o nga whenua.
- 9
- Na, haere mai ana a Hihaka kingi o Ihipa ki Hiruharama, tangohia ana e ia nga taonga o te whare o Ihowa, me nga taonga o te whare o te kingi: riro katoa ana i a ia: tangohia ana ano e ia nga pukupuku koura i hangā nei e Horomona.
- 10
- Katahi ka hangā e Kingi Rehopoama etahi pukupuku parahi hei whakakapi mo era, a, tukua atu ana e ia ki te ringaringa o te rangatira o nga kai tiaki, i tiaki nei i te tatau o te whare o te kingi.
- 11
- Na, i te wa e haere ai te kingi ki te whare o Ihowa, ka haere mai nga kai tiaki ki te tiki mai, a, whakahokia atu ana e ratou ki te whare o nga kai tiaki.
- 12
- Na, i a ia ka whakaiti nei i a ia, ka tahuri atu te riri a Ihowa i a ia, kihai hoki ia i mea kia whakangaromia rawatia ai: he pai ano hoki nga meatanga ki a Hura.
- 13
- Na, kua u a Kingi Rehopoama ki Hiruharama hei kingi: e wha tekau ma tahi hoki nga tau o Rehopoama i a ia ka meinga hei kingi, a, kotahi tekau ma whitu nga tau i kingi ai ia ki Hiruharama, ki te pa i whiriwhiria e Ihowa i roto i nga iwi katoa o Iharaira hei waihotanga iho mo tona ingoa. Na, te ingoa o tona whaea ko Naama, he Amoni.
- 14
- He kino ano hoki tana mahi; kihai hoki i whakatikaia e ia tona ngakau ki te rapu i a Ihowa.
- 15
- Na, nga meatanga a Rehopoama, o mua, o muri, kahore ianei i tuhituhia ki te pukapuka a Hemaia poropiti, ki ta Iro matakite ano hoki, kei reira nei nga korero whakapapa? Na, he whawhai ano ta Rehopoama raua ko Ieropoama ki a raua i nga ra katoa.
- 16
- Na, kua moe a Rehopoama ki ona mātua, a, tanumia iho ki te pa o Rawiri, a, ko Apia ko tana tama hei kingi i muri i a ia.
Address: 
Phone: 
Email: