- 1
- Na, i muri i tenei ka haere mai nga tamariki a Moapa, ratou ko nga tamariki a Amona, a hei hoa mo ratou etahi atu ehara nei i te Amoni, ki te whawhai ki a Iehohapata.
- 2
- Na, ka haere mai etahi, ka korero ki a Iehohapata, ka mea, he ope nui tenei te haere mai nei ki a koe i tera taha o te moana, i Hiria. Nana, kei Hatetono-tamara ratou, ara, kei Ene-keri.
- 3
- Na, ka wehi a Iehohapata, a ka tahuri tona aroaro ki te rapu i a Ihowa: i karangatia ano hoki e ia he noho puku puta noa i a Hura.
- 4
- Na, ka huihuia mai a Hura ki te rapu i ta Ihowa. I haere mai ano hoki ratou i nga pa katoa o Hura ki te rapu i ta Ihowa.
- 5
- Na, ka tu a Iehohapata i roto i te huihui o Hura raua ko Hiruharama i te whare o Ihowa, i mua i te marae hou,
- 6
- A ka mea, E Ihowa, e te Atua o o matou mātua, he teka ianei ko koe te Atua i te rangi, ko koe hoki te kai whakahaere tikanga mo nga kingitanga katoa o nga tauiwi; kei tou ringa ano hoki te kaha me te marohirohitanga; kahore hoki he hoa riri mou.
- 7
- He teka ianei ko koe to matou Atua i peia ai nga tangata o tenei whenua i te aroaro o tou iwi, o Iharaira, a, homai ana e koe ki nga uri o Aperahama, o tou hoa aroha, a, ake ake ake.
- 8
- Na, noho ana ratou ki konei; hangā ana e ratou ki konei he wahi tapu mo tou ingoa; i mea hoki ratou,
- 9
- Ki te puta mai he aitua ki a matou, he hoari, he whakawakanga, he mate uruta, he mate-kai ranei, a ka tu matou ki te aronga o tenei whare, ki tou aroaro, (kei tenei whare hoki tou ingoa,) a ka karanga ki a koe, i a matou ka mate nei, na, mau e whakarongo mai, e whakaora.
- 10
- Na, tenei nga tamariki a Amona raua ko Moapa, me Maunga Heira ano hoki, kihai nei i hoatu e koe ki a Iharaira kia whakaekea e ratou i to ratou haerenga mai i te whenua o Ihipa; (i peka ke atu hoki ratou i a ratou, kihai hoki i huna i a ratou.)
- 11
- Nana, ko ta ratou utu tenei ki a matou. E haere mai ana hoki ratou ki te pei i a matou i tou kāinga tupu i homai nei e koe hei kāinga tupu mo matou.
- 12
- E to matou Atua, e kore ianei koe e whakarite whakawa ki a ratou? kahore hoki o matou kaha i te aroaro o tenei ope kua tae mai nei ki a matou; kahore hoki matou e mohio me aha matou. Otiia e anga ana o matou kanohi ki a koe.
- 13
- Tu tonu ano hoki a Hura katoa ki te aroaro o Ihowa, a ratou kohungahunga ano hoki, a ratou wahine, me a ratou tamariki.
- 14
- Na, ko Tahatiere tama a Hakaraia, tama a Penaia, tama a Teiere, tama a Matania, he Riwaiti, no nga tama a Ahapa, puta mai ana te wairua o Ihowa ki runga ki a ia i waenganui o te whakaminenga.
- 15
- Na, ko tana meatanga mai, Whakarongo mai, e Hura katoa, ratou ko nga tangata o Hiruharama, me koe ano hoki, e Kingi Iehohapata, Ko te kupu tenei a Ihowa ki a koutou, Kaua koutou e wehi, kaua e pawera ki tenei ope nui. No te mea ehara i a koutou te whawhai, engari na te Atua.
- 16
- Heke atu koutou apopo ki te tu i a ratou. Nana, kei te piki mai ratou i te pikitanga i Titi, a ka kite koutou i a ratou i te pito o te awaawa, i te ritenga atu o te koraha o Ieruere.
- 17
- Kahore he rawa e whawhai ai koutou aianei. Tu tonu koutou, ka matakitaki atu i ta Ihowa whakaoranga mo koutou, e Hura, raua ko Hiruharama. Kaua e wehi, kaua e pawera. Apopo ka haere atu koutou ki to ratou aroaro; a ko Ihowa hei hoa mo koutou.
- 18
- Na, piko tonu iho te kanohi o Iehohapata ki te whenua. A, takoto ana a Hura katoa, ratou ko nga tangata o Hiruharama, ki te aroaro o Ihowa, koropiko ana ki a Ihowa.
- 19
- Na, ko te whakatikanga ake o nga Riwaiti, o nga tamariki a nga Kohati, o nga tamariki a nga Korohi; kei te whakamoemiti ki a Ihowa Atua o Iharaira; he nui whakaharahara te reo.
- 20
- Na ka maranga wawe ratou i te ata, a ka haere atu ki te koraha o Tekoa; a, i a ratou e haere atu ana, ka tu a Iehohapata, ka mea, Whakarongo, e Hura, ratou ko nga tangata o Hiruharama, Whakapono atu ki ta Ihowa, ki ta to koutou Atua, a ka u koutou; whakapono ki ta ana poropiti, a ka kake koutou.
- 21
- Katahi ia ka whakatakoto whakaaro ki te iwi, a, whakaritea ana e ia etahi hei waiata ki a Ihowa, hei whakamoemiti hoki ki te ataahuatanga o te tapu, i a ratou e haere ana i mua i te ope, hei mea ano hoki, Whakamoemiti atu ki a Ihowa, e mau tonu ana hoki tana mahi tohu.
- 22
- Na, ka timata nei ratou te waiata, te whakamoemiti, ka whakatakotoria e Ihowa etahi pehipehi mo nga tamariki a Amona, a Moapa, ratou ko o Maunga Heira i haere mai nei ki te whawhai ki a Hura; a ka patua ratou.
- 23
- I whakatika mai hoki nga tamariki a Amona raua ko Moapa ki nga tangata o Maunga Heira, ki te huna, ki te whakangaro i a ratou; a ka poto i a ratou nga tangata o Heira, na, kua piri mai tenei tangata, ki tenei tangata, hei whakangaro i a ratou whakaratou.
- 24
- A, te haerenga atu o Hura ki te pourewa i te koraha, te tirohanga atu ki te ope, nana, o ratou tinana e takoto ana i runga i te whenua, kihai tetahi i ora.
- 25
- Na, te haerenga atu o Iehohapata ratou ko tona iwi ki te tango i nga taonga, he tini nga taonga i kitea ki a ratou, me nga tupapaku, me nga mea e matenuitia ana; huia mai ana mo ratou; kihai i taea te pikau; na, e toru o ratou ra e tango ana ratou i nga taonga, i te tini hoki.
- 26
- A, i te wha o nga ra ka huihui ratou ki Raorao Peraka: i whakapai hoki ratou ki a Ihowa ki reira; koia i tapā ai te ingoa o taua wahi, Ko Raorao Peraka, e mau nei ano, a tae noa ki tenei ra.
- 27
- Na, hoki ana nga tangata katoa o Hura, o Hiruharama, me Iehohapata ano i mua i a ratou; hoki koa ana ki Hiruharama; na Ihowa hoki ratou i mea kia koa ki o ratou hoa riri.
- 28
- Na, haere mai ana ki Hiruharama, me te tangi ano nga hatere, nga hāpa, nga tētere, ki te whare o Ihowa.
- 29
- Heoi tau ana te wehi o te Atua ki runga ki nga kingitanga katoa o nga whenua i to ratou rongonga ai kua whawhai a Ihowa ki nga hoa riri o Iharaira.
- 30
- Na, ata takoto ana te kingitanga o Iehohapata, kua meinga hoki ia e tona Atua kia whai tānga manawa i tetahi taha, i tetahi taha.
- 31
- Heoi kingi ana a Iehohapata ki a Hura. E toru tekau ma rima ona tau i tona kingitanga ai; a, e rua tekau ma rima nga tau i kingi ai ia ki Hiruharama. Na, te ingoa o tona whaea ko Atupa, he tamahine na Hirihi.
- 32
- I haere ano hoki ia i runga i te ara o tona pāpā, o Aha, kihai hoki i mahue i a ia; i mahia e ia te mea e tika ana ki te titiro a Ihowa.
- 33
- Otiia kihai nga wahi tiketike i whakakahoretia; kiano hoki te iwi i whakaanga i o ratou ngakau ki te Atua o o ratou mātua.
- 34
- Na, era atu meatanga a Iehohapata, o mua, me o muri, kei te tuhituhi i roto i te pukapuka a Iehu tama a Hanani, a tera ra i korerotia i roto i te pukapuka o nga kingi o Iharaira.
- 35
- I muri i tenei ka huihuia nga whakaaro e Iehohapata kingi o Hura raua ko Ahatia kingi o Iharaira; he kino rawa ano hoki nga mahi a tenei.
- 36
- I huihuia hoki a raua whakaaro kia hangā etahi kaipuke hei rere ki Tarahihi. Na, hangā ana e raua he kaipuke ki Ehiono-kapere.
- 37
- Katahi a Erietere tama a Rorawa o Mareha ka poropiti i te he mo Iehohapata, ka mea, Kua huihuia na ā korua whakaaro ko Ahatia, mo reira kua pakaru o mahi i a Ihowa. Na, kua pakaru nga kaipuke, a kihai i ahei te rere ki Tarahihi.
Address: 
Phone: 
Email: