2nd Chronicles Chapter 21 - Paipera Tapu 1868 | Te Paipera Tapu 1868

2nd Chronicles Chapter 21 - Paipera Tapu 1868

1
Na, kua moe a Iehohapata ki ona mātua, kua tanumia ki ona mātua ki te pa o Rawiri, a, ko Iehorama ko tana tama te kingi i muri i a ia.
2
He teina ano ona, he tama na Iehohapata, ko Ataria, ko Tehiere, ko Hakaraia, ko Ataria, ko Mikaera, ko Hepatia. Enei katoa he tama na Iehohapata kingi o Iharaira.
3
I homai hoki etahi hakari nui e to ratou pāpā ki a ratou, he hiriwa, he koura, he taonga utu nui, me nga pa taiepa i Hura: ko te kingitanga ia i hoatu e ia ki a Iehorama; no te mea ko te matamua ia.
4
A, te whakatikanga ake o Iehorama ki runga ki te kingitanga o tona pāpā, a ka whai kaha ia, na, patua iho e ia ona teina katoa ki te hoari, me etahi ano o nga rangatira o Iharaira,
5
E toru tekau ma rua nga tau o Iehorama i tona kingitanga ai, a, e waru nga tau i kingi ai ia ki Hiruharama.
6
Na, haere ana ia i te ara o nga kingi o Iharaira, pera ana ano ia me ta te whare o Ahapa i mea ai; he wahine hoki nana te tamahine a Ahapa; heoi he kino tana mahi ki te titiro a Ihowa.
7
Otiia kihai i pai a Ihowa ki te whakangaro i te whare o Rawiri: i whakaaro ki te kawenata i whakaritea e ia ki a Rawiri, ki tana hoki i ki ai, Ka hoatu he rama ki a ia, ratou ko ana tama, i nga ra katoa.
8
I ona ra ka maunu mai a Eroma i raro i te ringa o Hura, a, whakakingitia ake e ratou he kingi mo ratou.
9
Na, haere atu ana a Iehorama ratou ko ana rangatira, me ana hariata katoa. Na, maranga ana ia i te po, a, patua iho e ia nga Eromi i karapotia ai ia, ratou ko nga rangatira o nga hariata.
10
Heoi kua maunu atu nga Eromi i raro i te ringa o Hura, a taea noatia tenei ra. I maunu mai ano a Ripina i taua wa i raro i tona ringa, nona hoki i whakarere i a Ihowa, i te Atua o ona mātua.
11
I hangā ano e ia he wahi tiketike ki nga Maunga o Hura, a, meinga ana e ia nga tangata o Hiruharama kia puremu, kumea ana ano e ia a Hura ki taua mahi.
12
Na, kua tae mai ki a ia he mea i tuhituhia e Iraia poropiti, hei ki mai, Ko te kupu tenei a Ihowa, a te Atua o tou pāpā o Rawiri. Na, kihai koe i haere i nga ara o tou pāpā, o Iehohapata, i nga ara ano o Aha kingi o Hura.
13
Heoi haere ana koe i te ara o nga kingi o Iharaira, a, meinga ana e koe a Hura, ratou ko nga tangata o Hiruharama, kia puremu, kia rite ano ki nga puremutanga o te whare o Ahapa; patua iho ano e koe ou teina o te whare o tou pāpā, he hunga i pai ake i a koe.
14
Nana, he nui te whiunga e whuia ai e Ihowa tou iwi, o tamariki, o wahine, me ou rawa katoa.
15
A, tera e nui ou mate, he mate no ou whekau, no ka puta mai ki waho ou whekau i te mate i tenei ra, i tenei ra.
16
I whakaarahia ake ano e Ihowa hei whawhai ki a Iehorama te wairua o nga Pirihitini, o nga Arapi ano i tata ki nga Etiopiana.
17
Na, ka whakaekea mai a Hura e ratou; kua pakaru ki roto, kahakina ake e ratou nga taonga katoa i rokohanga mai ki roto ki te whare o te kingi, ana tamariki ano hoki, me ana wahine, kihai tetahi tamaiti ana i mahue, ko Iehoahata anake, ko te iti rawa o ana tama.
18
I muri i tenei katoa patua iho e Ihowa ona whekau; he mate kihai i taea te rongoa.
19
A ka maha nga ra, ka taea te mutunga o nga tau e rua, ka puta mai ona whekau ki waho, he meatanga hoki na tona mate, a, mate iho ia, he kino ona mate; kahore hoki he tahunga mona i tahuna e tona iwi, kihai i pera me era i tahuna mo ona mātua.
20
E toru tekau ma rua ona tau i tona kingitanga ai, a, e waru nga tau i kingi ai ia ki Hiruharama. Heoi kihai ia i matenuitia i tona haerenga; a, kihai i tanumia ki nga tanumanga o nga kingi, engari ki te pa o Rawiri.