2nd Chronicles Chapter 22 - Paipera Tapu 1868 | Te Paipera Tapu 1868

2nd Chronicles Chapter 22 - Paipera Tapu 1868

1
A, whakakingitia ana a Ahatia e nga tangata o Hiruharama i muri i a ia; ko tana tama o muri rawa ia: i patua hoki nga tuakana katoa e te taua i haere mai nei i nga Arapi ki te puni. Na, ko Ahatia hei kingi ko te tama a Iehorama kingi o Hura.
2
E wha tekau ma rua nga tau o Ahatia i tona kingitanga ai, a, kotahi te tau i kingi ai ia ki Hiruharama. Na, te ingoa o tona whaea ko Ataria, he tamahine na Omori.
3
I haere ano ia i nga ara o te whare o Ahapa: ko tona whaea hoki tana kai whakatakoto whakaaro mo nga mahi he.
4
I mahia ano e ia te kino ki te titiro a Ihowa, i pera ano me te whare o Ahapa. Ko ratou hoki ana kaiwhakatakoto whakaaro i muri i te matenga o tona pāpā, hei whakangaromanga ano mona.
5
Na, haere ana ia i runga i to ratou whakaaro. I haere tahi ano raua ko Iehorama tama a Ahapa kingi o Iharaira ki te whawhai ki a Hataere kingi o Hiria ki Ramoto-kireara. Na, kua tu a Iorama i nga Hiriani,
6
A, hoki ana ki Ietereere kia rongoatia nga tūnga i tu ai ia ki Rama, i tona whawhaitanga ki a Hataere kingi o Hiria. Na, ko te haerenga mai o Ataria tama a Iehorama kingi o Hura kia kite i a Iehorama tama a Ahapa ki Ietereere, e mate ana hoki ia.
7
Na, na te Atua te whakangaromanga o Ahatia, i a ia ra i haere ki a Iorama. Tona taenga hoki, ka puta mai raua ko Iehorama ki te tu i a Iehu tama a Nimihi, i whakawahia nei e Ihowa hei hatepe atu i te whare o Ahapa.
8
A, i a Iehu e whakarite whakawa ana ki te whare o Ahapa, ka tutaki ia ki nga rangatira o Hura, ratou ko nga tama a nga tuakana o Ahatia, he tangata hoki ratou na Ahatia: patua iho ratou e ia.
9
Na, ka rapua ano a Ahatia e ia, a ka mau i a ratou; i te piri hoki ia i roto i Hamaria. Na, ka kawea mai ia ki a Iehu, a, whakamatea iho e ratou, tanumia iho; i ki hoki ratou, he tama ia na Iehohapata, na te tangata i whakapaua nei tona ngakau ki te rapu i a Ihowa. Na, kore ake he kaha o te whare o Ahatia ki te pupuri i te kingitanga.
10
A, te kitenga o Ataria whaea o Ahatia, kua mate tana tamaiti, na, whakatika ana ia, a whakangaromia ana e ia nga uri kingi katoa o te whare o Hura.
11
Heoi kua tango a Iehohapeata tamahine a te kingi i a Ioaha, i te tamaiti a Ahatia, tahaetia atu ana ia i roto i nga tamariki a te kingi i whakamatea ra, kawea atu ana raua ko tona kai hiki ki te whare-moenga. Na, hunā ana ia e Iehohapeata tamahine a Kingi Iehorama, wahine a Iehoiara tohunga (he tuahine ano ia no Ahatia,) tē kitea e Ataria, i kore ai e whakamatea.
12
Na, i a ratou ia e huna ana i roto i te whare o te Atua, e ono nga tau; a, ko Ataria te kuini o te whenua.