- 1
- E whitu nga tau o Ioaha i a ia ka kingi nei; a, e wha tekau nga tau i kingi ai ia ki Hiruharama. Na, te ingoa o tona whaea, ko Tipia no Peere-hepa.
- 2
- Na, he tika nga mahi a Ioaha ki te titiro a Ihowa i nga ra katoa o te tohunga, o Iehoiara.
- 3
- A, i tangohia mai ano etahi wahine mana e Iehoiara, tokorua; a ka whanau ana tamariki, ana tamahine.
- 4
- I muri i tenei ka whai ngakau a Ioaha ki te whakahou i te whare o Ihowa.
- 5
- A ka oti nga tohunga ratou ko nga Riwaiti te huihui mai e ia, ka mea ia ki a ratou, Haere atu koutou ki nga pa o Hura, ki te kohikohi moni mai i a Iharaira katoa hei whakahou i te whare o to koutou Atua, he mea mea i tenei tau, i tenei tau; ma koutou hoki e whakahohoro taua mahi. Heoi kihai i whakahohorotia e nga Riwaiti.
- 6
- Katahi te kingi ka karanga ki a Iehoiara, ko te upoko hoki ia, a ka mea ki a ia, He aha koe tē mea ai ki nga Riwaiti kia kawea mai i roto i a Hura, i Hiruharama, te mea i kohikohia, ta Mohi ta te pononga o Ihowa, ratou ko te whakaminenga o Iharaira i ki ai mo te tapenakara o te whakaaturanga?
- 7
- Na nga tama hoki a taua wahine kino a Ataria i wahi te whare o te Atua; a, nga mea tapu katoa o te whare o Ihowa, meinga ana e ratou mo nga Paara.
- 8
- Katahi te kingi ka korero mai, a ka hangā e ratou he pouaka, whakaturia ana ki waho, ki te kuwaha o te whare o Ihowa.
- 9
- A ka karanga ano ratou puta noa i a Hura, i Hiruharama, kia kawea mai ki a Ihowa te kohikohi i whakaritea e Mohi, e ta te Atua pononga, ki a Iharaira i te koraha.
- 10
- Na, koa tonu nga rangatira katoa ratou ko te iwi katoa, a kawea mai ana e ratou, makā ana e ratou ki roto ki te pouaka, a rite noa.
- 11
- A, te wa i kawea mai ai te pouaka e ratou, ara, e nga Riwaiti ki te whare takoha o te kingi; na, ta ratou tirohanga iho, kua rahi te moni, ka haere mai te kai tuhituhi a te kingi, raua ko tetahi tangata a te tino tohunga, a, ringitia ana e raua nga mea i roto i te pouaka, na, ka hapainga ano e raua, whakahokia atu ana ki tona wahi. Pena tonu ratou i ia ra, i ia ra, a, nui atu te moni i kohikohia e ratou.
- 12
- A, homai ana e te kingi raua ko Iehoiara ki nga kai hanga o nga mea i mahia o te whare o Ihowa; hei utu i nga kai mahi kohatu, i nga kamura, hei whakahou i te whare o Ihowa, ki nga kai mahi ano hoki i te rino, i te parahi, hei hanga mo te whare o Ihowa.
- 13
- Na, ka mahi nga kai mahi, a ka oti te mahi i a ratou; na, kua meinga e ratou kia rite ki to mua turanga te tu o te whare o te Atua, kia kaha ano hoki.
- 14
- A ka oti nei i a ratou, ka kawea mai e ratou te toenga o te moni ki te aroaro o te kingi raua ko Iehoiara, a ka waiho hei hanga i etahi oko mo te whare o Ihowa, i nga oko minita, i nga mea mo nga patunga tapu, i nga koko, i nga oko koura, hiriwa; a, he whakaeke tonu ta ratou i nga tahunga tinana i roto i te whare o Ihowa i nga ra katoa a Iehoiara.
- 15
- Na, kua koroheketia a Iehoiara, kua maha ona ra, a ka mate: kotahi rau e toru tekau ona tau i tona matenga ai.
- 16
- A, tanumia ana ia e ratou ki roto ki te pa o Rawiri ki te taha o nga kingi; no te mea i pai tana mahi ki a Iharaira, ki te Atua, ki tona whare ano hoki.
- 17
- Na, i muri nei i te matenga o Iehoiara ka haere mai nga rangatira o Hura, a ka piko iho ki te kingi; na, rongo tonu te kingi ki a ratou.
- 18
- Na, whakarerea ake e ratou te whare o Ihowa, o te Atua o o ratou mātua, mahi ana ratou ki nga ngahere, ki a nga whakapakoko. Na, kua takoto he riri ki a Hura, ki Hiruharama, mo tenei he o ratou.
- 19
- Heoi ungā mai ana e ia nga poropiti ki a ratou hei whakahoki i a ratou ki a Ihowa, a, kauwhau ana ratou ki a ratou. Heoi kihai ratou i whakarongo mai.
- 20
- Na, kua tau te wairua o te Atua ki runga ki te tohunga, ki a Hakaraia tama a Iehoiara; a ka tu ia ki runga i te iwi, ka mea ki a ratou, Ko te kupu tenei a te Atua, He aha koutou ka takahi ai i nga whakahaunga a Ihowa? ma konei hoki ka kore ai koutou e kake. Kua whakarerea nei e koutou a Ihowa, na, ka whakarerea ano koutou e ia.
- 21
- Na, ka whakatupuria e ratou he hē mona, a, akina ana ia e ratou ki te kohatu, (ko to te kingi hoki tena i whakahau ai,) ki te marae o te whare o Ihowa.
- 22
- Kihai hoki a Kingi Ioaha i mahara ki te aroha i whakaputaina e tona pāpā e Iehoiara ki a ia: heoi patua ana e ia tana tamaiti. A, i tona matenga ai, ka mea ia, Ma Ihowa e titiro mai, e rapu he utu.
- 23
- Na, taka rawa ake te tau, ka whakaekea mai ia e te taua o Hiria; a haere mai ana ratou ki a Hura, ki Hiruharama; whakangaromia ana e ratou nga rangatira katoa o te iwi i roto i te iwi, ungā ana e ratou o ratou taonga katoa kia kawea ki te kingi o Ramahiku.
- 24
- He torutoru hoki nga tangata o te taua o nga Hiriani i haere mai nei; a hoatu ana e Ihowa te ope nui whakaharahara ki o ratou ringa, mo ratou i whakakarere i a Ihowa, i te Atua o o ratou mātua. Heoi whakaputaina mai ana e ratou he whakawakanga ki a Ioaha.
- 25
- A, to ratou haerenga atu i a ia, (whakarerea iho hoki ia e ratou, he nui ona mate,) ka whakatupuria he hē mona e ona tangata, mo nga toto hoki o nga tama a Iehoiara tohunga; patua iho ia i runga i tona moenga, a mate iho, tanumia iho e ratou ki roto i te pa o Rawiri; otiia kihai i tanumia ki roto ki nga tanumanga o nga kingi.
- 26
- Ko nga kai whakatupu ano tenei i te hē mona; Ko Tapara, he tama na tetahi wahine o Amona, na Himeata, ko Iehotapara ano hoki, he tama na tetahi wahine o Moapa, na Timiriti.
- 27
- Na, ana tama, me te nui o nga pikaunga i whakaritea mana, me te hanganga i te whare o te Atua, nana, kei te tuhituhi i roto i nga korero o te pukapuka o nga kingi; a ko tana tama ko Amatia te kingi i muri i a ia.
Address: 
Phone: 
Email: